Lu thŭn êgao, mnuih ƀuôn sang ti alŭ 6, să Dak Buk So, kdriêk Tuy Đức, čar Dak Nông ktưn hưn kyua mâo Sang yang Mtao Hùng prŏng siam, ƀâo mngưi dhư̆ nanao brui mngưi. Sang yang Mtao Hùng dưi mkra mơ̆ng thŭn 2003, hŏng ênhă 250 m2, mâo mnuih ƀuôn sang Phú Thọ ti să Dak Buk So čŏng myơr lăn, đru mguôp ngă mkra. Chử Văn Chúc, Khua anôk bruă mkŏ mjing Knăm ngă yang Mtao Hùng tinei brei thâo, dŭm thŭn mrâo mkŏ mkra, knŏng mâo mnuih ƀuôn sang hlăm să Dak Buk So nao čuh myơr brui mngưi hlăm dŭm knăm Têt hat, boh nik knăm ngă yang kơ Mtao Hùng. Êdei kơnăn, mnuih ƀuôn sang ti lu krĭng mkăn ăt hriê ngă yang mơh.

“Jih jang mnuih ƀuôn sang Phú Thọ hriê tinei ngă bruă duh mkra kbưi êdi. Kbưi hĭn mơh lŏ ênguôt kơ ƀuôn sang. Mơ̆ng anăn, mnuih ƀuôn sang myơr lăn, bi đru prăk kăk čiăng mdơ̆ng sang yang. Hmei hriê tinei, hlăm ai tiê klei mĭn ăt dul ƀiă mơh klei ênguôt kơ ƀuôn sang, čiăng kơ ênuk êdei anei phung hđeh lŏ čuê aê ama nao êlâo, ngă jăk hdră ngă yang anei.

Ti čư̆ Phượng Hoàng hlăm wăl drai êa Prenn, ƀuôn hgŭm 3, ƀuôn prŏng Đà Lạt, čar lâm Đồng ăt mâo sang yang Mtao Hùng, dưi mdơ̆ng thŭn 2022 hluê gru hmô Sang yang Mtao Hùng ti dlông čư̆ Nghĩa Lĩnh, čar Phú Thọ. Tinei ăt mâo Sang yang Lạc Long Quân lehanăn Âu Cơ, ti krah mâo Sang yang kơ Mtao tal 7 lehanăn ti tluôn hĭn mâo Sang yang ngă yang kơ phung mtao knhal tuič hlăm ênuk Mtao Hùng. Lu blư̆ tuôm nao ti knăm ngă yang Mtao Hùng tinei, amai Nguyễn Thị Minh Hiếu, ti ƀuôn hgŭm 3, ƀuôn prŏng Đà Lạt brei thâo:

“Jing sa čô mnuih ƀuôn sang prŏng Đà Lạt, grăp thŭn kâo mbĭt hŏng gŏ sang hriê hgŭm nanao ti knăm anei. Kâo čang hmăng phung anak mâo klei găl tui ksiêm kơ knhuah gru djuê ana Việt Nam mbĭt anăn ăt jing sa klei găl čiăng kơ hmei nao hgŭm hlăm hdră dhar kreh ala ƀuôn čiăng đru mguôp ngă bi lu jơr knhuah dhar kreh djuê ana Việt Nam”.

Knăm ngă yang Mtao Hùng ăt dưi mkŏ mjing grăp thŭn ti Wăl knhuah gru ala čar Đình Lạc Giao, ƀuôn prŏng Ƀuôn Ama Thuôt, čar Dak Lak hŏng klei hgŭm mơ̆ng phung khua kiă kriê dŭm čar, knơ̆ng, dhar bruă lehanăn mnuih ƀuôn sang. Grăp čô mnuih nao čuh myơr brui mngưi bi hdơr, kkuh kơ mnguh mngăt Mtao Hùng. Thŭn anei, knăm ngă yang dưi mkŏ mjing hlăm 2 hruê, 9-10/3 hluê hruê mlan ƀlĕ, hŏng lu hdră msĕ si đŭng ƀêñ điŏ lehanăn Knăm čuh myơr brui mngưi, mnơ̆ng dhơ̆ng, mnga kơ Mtao Hùng. Lại Đức Đại, K’iăng khua Knơ̆ng bruă Dhar kreh, Mjuăt ktang asei mlei lehanăn hiu čhưn ênguê čar Dak Lak brei thâo:

          “Truh ti knăm ngă yang Mtao Hùng ti Đình Lạc Giao ti ƀuôn prŏng Ƀuôn Ama Thuôt amâo djŏ knŏng bi mĭn kơ knăm ngă yang ƀiădah tinei lŏ jing anôk bi hgŭm mguôp mnuih djuê ana Yuăn -Djuê ƀiă. Grăp thŭn, hlăm hruê ngă yang kơ Mtao Hùng, 10-3, mnuih ƀuôn sang mđing êdi bi nao čuh myơr brui mngưi, akâo kơ ala čar êđăp ênang, akâo klei suaih pral lehanăn mđing truh kơ ai tiê hgŭm mguôp ti sang yang bŏ hŏng klei yuôm bhăn anei”.

Ăt hluê si Lại Đức Đại, Hdră mkra Sang yang Mtao Hùng mơ̆ng krĭng Lăn dap kngư ti Dak Lak mâo Anôk bruă sang čư̆ êa čar Dak Lak pŏk ngă dưi ba m’ĭt kơ Phŭn bruă Dhar kreh mjuăt ktang asei mlei lehanăn hiu čhưn ênguê ba mdah kơ Khua knŭk kna. Sang yang anei dưi rŭ mdơ̆ng hluê hdră đru mơ̆ng yang ƀuôn ti ênhă lăn hlăm brô 20ha, ti čư̆ Mblĭm, să Êa Kao, ƀuôn prŏng Ƀuôn Ama Thuôt lehanăn ti să Êa Tiêu, kdriêk Čư̆ Kuiñ. Bruă duh mkra Sang yang kñăm bi êdah klei hdơr knga mơ̆ng mnuih Lăn dap kngư hŏng aê aduôn mâo leh klei duh myơr hlăm hdră mkŏ mkra, răng mgang ala čar. Mbĭt anăn, mkăp kơ klei čiăng ngă yang, klei ai tiê klei mĭn đăo mơ̆ng mnuih ƀuôn sang ti čar Dak Lak lehanăn Lăn dap kngư.

Ti anôk mâo mnuih Việt Nam hdĭp mda tinăn mâo klei ngă yang Mtao Hùng. Dŭm sang yang Mtao Hùng ti Lăn dap kngư đru leh kơ mnuih ƀuôn sang tinei bi êdah klei mpŭ, hdơr knga kơ Mtao Hùng./.