Sa anôk mkŏ mjing Knăm ngă yang Mtao Hùng hruê 10/3 hluê hruê mlan ƀlĕ thŭn anei jing Sang yơng Tháp Kỳ Quang, ti să Đăk Mar, kdriêk Đăk Hà, čar Kon Tum. Mnuih djuê ana Sedang, Bahnar…. Hlăm krĭng nao hgŭm leh mơ̆ng dŭm hdră dôk mprăp. Mbĭt hŏng hdră đru kơ Anôk bruă mkŏ mjing mprăp kơ bruă, tŭ drông tuê hiu čhưn, lu phung êdam êra lŏ nao bi lông dŭm hdră mjuăt ktang asei mlei djiê ana msĕ si trŭt hlâo, ktŭng klei, đĭ gơ̆ng êbhơr…

Hlăm knăm ngă yang, mbĭt hŏng bruă ba myơr mnơ̆ng jăk, mnơ̆ng yuôm mâo pô pla, mkra mjing, msĕ si điŏ ƀâo mngưi, kphê, boh kroh… kơ Mtao Hùng, mnuih ƀuôn sang lŏ mdah klei tông čing čhar, kdŏ čhuang čiăng bi êdah klei mơak lehanăn hdơr knga kơ Mtao Hùng lehanăn phung aê ama nao êlâo mâo leh klei đru mguôp hlăm bruă mkŏ mkra, răng mgang ala čar. Ayŏng A Thiếk, ƀuôn Kon Klôc, să Đăk Mar, kdriêk Đăk Hà, brei thâo:

“Grăp thŭn, truh knăm ngă yang Mtao Hùng, alŭ Kon Klôc hmei kreh mâo phung mduôn, phung êdam ểa bi tông čing čhar, kdŏ mmuñ čiăng bi hdơr kơ Mtao Hùng. Bruă mkŏ mjing anei amao djŏ knŏng dưi bi tuôm. Mjĕ mjuk mbĭt ƀiădah yuôm bhăn hĭn jing mđĭ klei bi hgŭm mguôp hlăm ƀuôn sang. Grăp blư̆ ƀuôn sang mâo knăm m’ak amao dah hlăm dŭm hruê mơak prŏng mŏng ala čar, amao dưi kƀah ôh ênai čing čhar, kdŏ čhuang, ênhiang mmuñ. Bi hdơr kơ Mtao Hùng hmei amâo djŏ knŏng mkŏ mjing ti sa ƀuôn anei ôh ƀiădah ti dŭm ƀuôn mkăn ăt mkŏ mjing mơh čiăng mjuăt bi hriăm phung hđeh ênuk gưl êdei thâo kơ knhuah gru “Mnăm êa hdơr kơ akŏ”, bi hdơr kơ Mtao hùng mâo leh klei đru mguôp prŏng prĭn hlăm hdră mkŏ mkra, răng mgang ala čar, mŏng anăn drei mâo klei hdĭp trei mđao, yâo mơak msĕ hruê anei.