Ti Gia Lai, bruă ngă hdơr hruê djiê mtao Hùng dưi mkŏ mjing ti Sang yang Mtao Hùng ti đang mnga Đồng Xanh, ƀuôn prŏng Pleiku, iêô jak lu mnuih ƀuôn sang leh anăn tue hiu čhưn nao myơr brui mngưi bi hdơr leh anăn hdơr knga kơ ai tiê phung mtao Hùng. Knăm myơr brui mngưi bi êdah klei bhiăn “mnăm êa hdơr kơ hnoh” mơ̆ng mnuih ƀuôn sang Gia Lai hŏng phung mtao Hùng hlăm knăm hdơr hruê djuê mtao Hùng. Hŏng mnuih Jarai ti Gia Lai, hŏng klei hdơr knga kơ ai tiê phung mtao Hùng, mnuih ƀuôn sang mâo klei đăo kkuh kơ yang, hŏng klei mĭn “jih jang mnơ̆ng mâo yang”, msĕ si Yang čư̆, Yang êa, Yang dliê…

Khua mduôn Rơ Ô Phung- ti ƀuôn Gum Góp, să Ea Rmok, kdriêk Krông Pa brei thâo hlăm mlan 4 grăp thŭn, mnuih Jarai ăt mkŏ mjing knăm ngă yang kơ Pơtao Apui čiăng akâo adiê hlĭm djŏ yan, hjan djŏ wưng, mdiê bŏ brŏng, ktơr bŏ sang.

 “Hŏng mnuih Jarai, mơ̆ng đưm đăm truh ară anei, mnuih ƀuôn sang mđĭ lar knhuah gru mpŭ kơ phung mtao, hlăm anăn mâo Mtao Pui. Kyua anei jing pô mđing uêñ kơ klei hdĭp mnuih ƀuôn sang, čang hmăng klei hdĭp mnuih ƀuôn sang ƀrư̆ trei mđao, adiê hlĭn hjan djŏ yan, boh nik hlăm yan không snăn anei srăng jing pô bi ala kơ mnuih ƀuôn sang ngă knăm akâo adiê hjan, gưl mnuih ƀuôn sang bi êdah klei bi mguôp bi đru, găn jih wưng dleh dlan. Ară anei snăn bruă sang čư̆ êa alŭ wăl ăt mđing čiăng kơ hmei dưi lŏ wĭt mkŏ mjing knăm akâo adiê hjan, leh anăn ăt čiăng kơ mnuih ƀuôn sang jĕ giăm taih kbưi hriê hlăm knăm akâo adiê hjan leh anăn ăt jing mđĭ lar dhar kreh djuê ana mnuih Jarai”.