Drei mrâo hmư̆ leh asăp mmuñ mơ̆ng pô thâo mbruă Rơ Ô Bhung. Pô thâo mbruă yăl dliê, ênhiang klei mmuñ mnuih Jarai hmư̆ jăk sơnăk, hmư̆ kma hlăm ai tiê leh anăn amâo mâo dưi kƀah ôh hlăm klei hdĭp yang ƀuôn, boh nik jing dŭm knăm mơak. Pô thâo mbruă Rơ Ô Bhung thâo klei mmuñ ênhiăng mơ̆ng hlăk dôk êdam ngiêk. Mbĭt hŏng anăn, ñu lŏ duah hriăm klei pĕ brô̆ gông mơ̆ng phung amiêt awa hlăm ƀuôn. Ñu lŏ thâo raih dŭm ênhiang čing mơ̆ng mnuih Jarai. Grăp blư̆ hlăm ƀuôn mkŏ mjuing dŭm knăm mơak mâodah klei ngă yang, amâodưi kbah ôh sa čô thâo mbruă msĕ si ñu.

Ti anăp ênuk mrâo mrang, pô thâo mbruă Rơ Ô Bhung yăl dliê, knŏng klei hriăm yơh phung mda asei dưi ƀuh klă klei yuôm bhăn mơ̆ng dhar kreh djuê ana pô. Êjai mâo klei hriăm, phung mda asei srăng ƀuh klă klei yuôm mơ̆ng knhuah siam djuê ana pô. Kyuanăn, hlăm dŭm wưng mâo ênŭm ênap mnuih ƀuôn sang, pô thâo mbruă Rơ Ô Bhung hnêč mtă mtăn kơ anak čô srăng kreh kriăng hriăm hră mơar truh hnơ̆ng.

 “Mnuih Jarai kreh mtă mtăn kơ anak čô kreh kriăng hriăm hră mơar, mtă kơ anak čô amâo mâo bi dôk ung mô̆ mda, khădah ară anei klei hdĭp dôk dleh dlan, amĭ ama suaih êmăn ƀiădah ăt brei anak čô nao sang hră mơar čiăng kơ êdei anei dưi mâo klei hdĭp jăk leh anăn đru kơ amĭ ama”.

Hluê si pô thâo mbruă Rơ Ô Bhung, sa bruă yuôm bhăn leh anăn năng mjêč hĭn ară anei hŏng ñu jing mtô kơ anka čô thâo răk, thâo čih klei Jarai. Êjai diñu thâo čih, thâo dlăng srăng mtô klei mmuñ ênhiang. Ñu mđing tal êlâo hlăm dŭm mmông hriăm tlam knhal jih hruê kăm mbĭt hŏng phung hđeh hriăm boh hră, hriăm blŭ, lŏ bi čuê klei khăp kơ phung hđeh. Grăp blư̆ ƀuôn sang mâo knăm mơak, dlăng kơ phung hđeh ñu kma mbĭt hŏng klei mmuñ ênhiang êdu êun, hlăm kơ klei kdŏ čhuang mgei ai tiê. Anăn ăt jing sa klei mđĭ ai ñu lŏ dơ̆ng čuê hlăm bruă mtô tông čing, mtô klei mmuñ êhiang, mtô klei Jarai kơ ƀuôn sang. Pô thâo mbruă Rơ Ô Bhung brei thâo:

 “Kâo pô ăt jêñ jêñ mtô klei Jarai kơ phung hđeh hlăm grăp mmông tlam, leh anăn lŏ mtô kơ diñu dŭm klei mmuñ ênhiang djuê ana pô čiăng diñu lŏ rông ba klei khăp čiăng, huĭ dah êdei anăp srăng luč ram kyua hmei mduôn khua leh, sa kdrêč čiăng kơ diñu mâo mmông găl mjĕ êrô nao hgŭm hlăm dŭm hruê knăm tông čing, mmuñ ênhiang čiăng bi mni kơ Đảng leh anăn knŭk kna, msĕ si Awa Hồ iêo mthưr jih jang mnuih ƀuôn sang răng mgang lăn čar, mtrŭt mjhar mnuih ƀuôn sang čoh bruă ngă hma, đru bruă cách mạng, hyuă kjăp klei bi mguôp hlăm dŭm ƀuôn êlan”.

Pô thâo mbruă Rơ Ô Bhung brei thâo, đưm leh hlăm ƀuôn mâo lu sang mâo čing, mâo čeh, ară anei knŏng mâo ƀiă sang dôk djă pioh leh anăn knŏng mâo mă ƀiă mnuih thâo tông čing. Klei hdĭp mrâo mrang hŏng ênhiang mmuñ mrâo ngă kơ klei mtô klei mmuñ ênhiang djuê ana ăt dleh dlan hĭn. Ênguôt hĭn, phung mda asei mnuih Jarai lu bĭt anôk amâo mâo thâo dlăng, amâo mâo thâo boh blŭ amĭ k’kiêng. Kyuanăn, grăp blư̆ mâo sa čô hđeh kriăng hriăm klei Jarai, hriăm tông čing, anăn jing klei hơ̆k mơak prŏng hŏng phung thâo mbruă msĕ ñu.

 “Mâo klei ênguôt ară anei jing phung anak čô amâo mâo lu mnuih thâo dlăng, thâo čih klei Jarai ôh, ƀiădah mâo klei uêñ mĭn mơ̆ng bruă sang čư êa alŭ wăl, ară anei mnuih ƀuôn sang thâo djă poih knhuah gru dhar kreh djuê ana pô mơ̆ng klei tông čing, klei mmuñ ênhiang leh anăn dŭm klei yăl dliê đưm, kyuanăn kâo hơ̆k mơak êdi kyua mnuih ƀuôn sang sa ai”.

Khădah thŭn khua mduôn leh, ƀiădah pô thâo mbruă Rơ Ô Bhung, ti ƀuôn Mlăh, să Phú Cần, kdriêk Krông Pa (čar Gia Lai) ăt dôk khăp nanao hŏng bruă mtô klei tông čing kơ phung mda asei. Ñu dưi dlăng msĕ si “Êlah pui hlăm ai tiê” kơ dŭm mta bruă mjĕ mjuk dhar kreh, tông čing čhar ti alŭ wăl. Hĭn kơnăn, pô thâo mbruă Rơ Ô Bhung ăt jing sa čô nai mtô klei blŭ leh anăn boh hră kơ mnuih Jarai ti alŭ wăl.