(Hà Nội, hruê 28 mlan 01 thŭn 2025)

Ơ mnuih ƀuôn sang, dĭng kna, lĭng kahan kluôm ala, lehanăn mnuih ƀuôn sang drei ti ala tač êngao!

Sa yan mnga mrâo – yan mnga Ất Tỵ truh leh, ba hrie klei mơak, klei čang hmăng lehanăn klei hmăng hmưi jăk siam. Hlăm mmông yuôm bhăn đuĕ nao kơ thŭn mrâo, bi ala kơ Phung khua kiă kriê Đảng, Knŭk kna, kâo hŏng ai tiê klei khăp mơĭt truh hŏng jih jang mnuih ƀuôn sang, dĭng kna, lĭng kahan kluôm ala, lehanăn mnuih ƀuôn sang drei hdĭp ti ala tac êngao klei hơêč hmưi thŭn mrâo jăk siam hĭn. Kâo hŏng klei mpŭ mơĭt truh hŏng mah jiăng, mnuih ƀuôn sang dŭm ala car dlông rŏng lăn klei hơêč hmưi thŭn mrâo êđăp ênang, jăk mơak, bi hgŭm lehanăn đĭ kyar.

Thŭn leh êgao, drei găn leh lu klei kpư̆ mgei prŏng, ƀiădah ăt jing sa thŭn sa thŭn mâo ba wĭt lu klei tŭ dưn năng myưng m’ang. Hlăm klei dleh dlan, klei lông dlăng, ai tiê klei thâo bi mguôp, klei thâo bi khăp, jih jang ƀuôn sang, lehanăn ai tiê  kpưn đĭ mơ̆ng djuê ana drei knư̆ hĭn mơh lŏ bi klă hŏng klei ktang hĭn. Kluôm đảng, jih jang mnuih ƀuôn sang, mâo leh klei gĭr prŏng, tơl dưi djăp lehanăn kdlưn hĭn kơ 15/15 ênoh čuăn mđĭ kyar klei duh mkra ala ƀuôn, klei đĭ kyar bruă duh mkra dôk hlăm êpul ba akŏ dlông rŏng lăn, klei hdĭp mda mnơ̆ng dhơ̆ng lehanăn ai tiê mnuih ƀuôn sang amâo mâo mdei dưi bi mlih, bruă kđĭ čar, bruă yang ƀuôn hơĭt kjăp, bruă lĭng kahan kjăp ktang, bruă hŏng ala tač êngao dưi pŏk mlar, mâo leh mah jiăng mpŭ mni. Grăp čô mnuih ƀuôn sang Việt Nam, hlăm ala ca amâodah ti ala tac êngao, mơ̆ng mnuih mă bruă, mnuih ngă lŏ hma, phung duh mkra, phung thâo lu hlŏng truh kơ lĭng kahan ti knông lăn, plao ksĭ mâo sơăi klei dưi pưn myưng kơ dŭm klei đru mguôp kơ boh tŭ jing mbĭt hlăm lăn car.

Thŭn 2025, jing thŭn bŏ hŏng klei yuôm bhăn kơ lăn čar, thŭn  đĭ kyả pral, bluh đĭ ktang , mjing atur kơ klei lăn čhuang mŭt hlăm ênuk gưl mrâo hŏng klei mdrŏng sah, klei mĭn mơ̆ng Đảng mđrăm mbĭt hŏng ai tiê mnuih ƀuôn sang bi truh kơ anôk kčah mơ̆ng djuê ana pô. khădah dôk tuôm hŏng lu klei dleh dlan, klei lông dlăng, ƀiădah Việt Nam hung nao phă anăp, amâo mâo pô dưi gang mkhư̆ klei kpưn đĭ lehanăn sa klei kdrưh k'’m mơ̆ng djuê ana. Kluôm Đảng, jih jang mnuih ƀuôn sang lehanăn lĭng kahan lŏ dơ̆ng mâo klei bi mguôp prŏng sa ai tiê, klei mĭn čŏng kpưn đĭ, dưn yua jih klei găl, dưi hgao djăp mta klei dleh dlan, klei lông dlăng čiăng bluh đĭ prŏng ktang, rŭ mdơ̆ng lăn čar Việt Nam mnuih ƀuôn sang mdrŏng sah, ala čar ktang kjăp, mtăp mđơr, kreh dhar, jih jang mnuih ƀuôn sang mâo klei hdĭp trei mđao, hnŭk êngiê jăk yâo; đru mguôp ƀrư̆ hrue ƀrư̆ lu kơ klei êđăp ênang, hơĭt kjăp, mđĭ kyar alŭ wăl lehanăn tar rŏng lăn.

Hlăm ai êwa lăn adiê hnŭk ênang, ai tiê anak mnuih kpư̆ mgei, mtluk mtlak hơ̆k mơak drông lan mnga mrâo, sa blư̆ dơ̆ng kâo hơêč hmưi kơ mnuih ƀuôn sang, dĭng kna, lĭng kahan kluôm ala lehanăn mnuih ƀuôn sang drei hdĭp ti ala tač êngao sa thŭn mrâo mâo klei suaih pral, tŭ jing. Thŭn mrâo sĭt nik srăng mâo ba wĭt lu klei tŭ dưn jăk.

Kkuh alum hlăm klei khăp!