- Ơ ayŏng Y Bhiông Buôn Yă, lŏ dlăng kơ boh tŭ ih pô leh anăn ƀuôn sang hlăm thŭn mrâo êgao snăn si ih bi mĭn?

Ayŏng Y Bhiông Buôn Yă: Snăn kâo ƀuh thŭn mrâo êgao jing sa thŭn mâo lu klei găl kơ yan adiê, yan boh mnga, ênoh yuôm anăn lu mta mnơ̆ng dhơ̆ng lŏ hma đĭ, mnuih ƀuôn sang hơ̆k mơak. Klei hdĭp mnuih ƀuôn sang mâo lu klei bi mlih, êpul êya bi hgŭm. Msĕ si ung mô̆ kâo snăn hlăm thŭn êgao gĭr lar ƀra dhar kreh djuê ana pô hŏng mnuih ƀuôn sang leh anăn tue hiu čhưn ti ƀuôn prŏng Ƀuôn Ama Thuôt.  Ti ƀuôn sang snăn hmei mâo 2 boh sang krum dlông duh kơ bruă hưn mthâo dŭm ênoh yuôm dhar kreh hlăm klei hdĭp mda, dôk jưh kơ tue jĕ giăm taih kbưi tơdah diñu truh leh anăn mâo klei čiăng ksiêm hriăm kơ dhar kreh. Leh anăn hlăm thŭn êgao snăn ti ƀuôn sang ăt drông leh lu êpul tue hiu čhưn hlăm ala čar leh anăn ala tač êngao hriê čhưn, ksiêm hriăm, đru hưn mthâo leh anăn hưn mdah dhar kreh djuê ana.

-  Mơ̆ng dŭm klei ih ngă snăn mâo leh ya klei bi mlih, jăk siam kơ ih pô leh anăn kơ ƀuôn sang pô?

Ayŏng Y Bhiông Buôn Yă:  Kâo ƀuh mâo lu klei bi mlih, hlăm êpul êya, ƀuôn sang mâo klei bi hgŭm ktang hĭn, kriê pioh jăk hĭn dŭm ênoh yuôm djuê ana aduôn aê pô, leh anăn pô ti êngao, bi tuôm hŏng ayŏng adei djuê ana mkăn snăn diñu ăt bi êdah klei mpŭ, mđĭ ênoh yuôm pô leh anăn êpul êya pô.

 Êlâo hĭn ñu ba klei yuôm bhăn klă mngač kơ klei găl bruă duh mkra gŏ sang, tal dua jing phung mda asei ƀuh leh anăn ƀrư̆ lŏ wĭt, mđing uêñ hĭn kơ ênoh yuôm djuê ana, kơrŭ wĭt lu klei dhar kreh jăk siam, klei bhiăn hdĭp mda jăk siam. Mơ̆ng anăn, mâo lu klei jăk siam dưi kơrŭ wĭt, wăt dŭm mjeh ana pla mjing msĕ si djam tam, trŏng phĭ, êtak êbai…mâo mơ̆ng êlâo leh ƀiădah ƀiă mnuih pla kyua amâo mâo ênoh yuôm ôh snăn ară anei lŏ jing mnơ̆ng jăk, mâo lu mnuih duah, mơ̆ng anăn ênoh yuôm ăt dưi mđĭ.

 Kyua anăn kâo čang hmăng mnuih ƀuôn sang pô dưi lŏ dơ̆ng kriê pioh, mđĭ lar mjeh ana pla mjing snăn čiăng dưi mâo knhuah mdê hjăn hưn mthâo hŏng tue hiu čhưn tơdah diñu hriê čhưn dlăng ti ƀuôn sang.

-  Hŏng klei jăk siam jăk snăn mjing leh si klei mđĭ ai kơ oh leh anăn kơ ngŏ sang tơdah mŭt hlăm yan mnga Ất Tỵ anei?

Ayŏng Y Bhiông Buôn Yă: Čang hmăng  jing mnuih ƀuôn sang mâo nanao klei suaih pral, bruă knuă đĭ kyar, klei bi hgŭm ƀrư̆ hruê ƀrư̆ đĭ sa hnơ̆ng mrâo. Mbĭt anăn bruă kriê pioh leh anăn mđĭ lar ênoh yuôm djuê ana srăng dưi mđing dlăng lu hĭn, bi êdah hnơ̆ng, ênoh yuôm dhar kreh djuê ana pô leh anăn lar bra ênoh yuôm anei hŏng ƀĭng găp ala tač êngao.

Hlăm thŭn mrâo anei snăn kâo pô mĭn tĭng srăng lŏ dơ̆ng bi leh bruă mkra mlih hlăm sang krum dlông, hiu duah thiăm kdrăp mnơ̆ng yua hlue knhuah djuê ana djăp ênŭm hĭn, duh jăk hĭn kơ tue hiu čhưn dlăng, dôk jưh ti sang leh anăn ƀuôn sang pô.

-  Snăn, lač jăk kơ Ih kyua klei gĭr ktưn lar bra ênoh yuôm jăk siam ƀuôn sang pô. Hlăm ai êwa akŏ yan mnga mrâo, hơêč hmưi kơ Ih leh anăn gŏ sang srăng mâo lu klei suaih pral, klei myun leh anăn tŭ jing.