Ti krah adiê mđiă hlơr, angĭn ktang mơ̆ng yan bhang Lăn dap kngư, ênai maĭ mŏk dôk kwang ti wăl anôk ngă mkra hdră bruă mrô 3, kdrêč 3 mơ̆ng hdră êlan êran pral Khánh Hòa - Ƀuôn Ama Thuôt. Ayŏng Nguyễn Đình Lợi, knuă druh hdră kdrăp tinei, brei thâo, giăm sa êtuh čô mnuih mă bruă mbĭt hŏng 60 kdrăp maĭ mŏk dôk mđĭ pral hdră ngă mkra.

“Hluê si ai tiê gĭt gai mơ̆ng Khua knŭk kna anăn jing “hgao hjăn hgao mđiă”, ayŏng adei knuă druh, hdră kdrăp, phung mgăt êdeh, kriê dlăng maĭ mŏk gĭr hluê ngă aguah, tlam, mlam hŏng 4 êpul mă bruă; ai tiê gĭr ktưn mâo mđĭ lar hlăm wăl anôk ngă bruă.

Mbĭt hŏng hdră êlan pral mkŏ Ƀuôn Ama Thuôt hŏng Khánh Hòa, dŭm pluh čô mnuih mă bruă lehanăn kdrăp maĭ mŏk dôk mjêč ruăt ktir čư̆, pŏk êlan mur hluh kčŭn čư̆ Phượng Hòang. Ngô Hiểu Khoa, Khua Anôk bruă kriê dlăng Êpul group Đèo Cả, đao knang: Êlan mur kčŭn čư̆ Phượng Hoàng dlông 1,7 km mbĭt hŏng 10 boh kban dôk hlăm hdră ngă mkra mâo boh taih dlông 11 km srăng dưi ngă leh êgao hnơ̆ng bi kčah.

“Hŏng klei găl msĕ ară anei, hmei srăng rơ̆ng knhal jih thŭn 2025 dưi bi hluh êlan mur kčŭn čư̆ Phượng Hoàng, dŭm kdrêč kban srăng ngă leh gơ̆ng dră”.

Mbĭt hŏng Hdră êlan êran pral Ƀuôn Ama Thuôt – Khánh Hoà (mâo boh taih dlông 117,5km) dôk mjêč ngă mkra, dŭm čar hlăm krĭng Lăn dap kngư ăt mjêč dôk mprăp dŭm klei găl čiăng ngă mkra dŭm hdră êlan êran pral mlir krĭng. Ti čar Dak Nông, dŭm knơ̆ng, dhar bruă djŏ tuôm, bruă sang čư̆ êa alŭ wăl dôk mprăp kơ bruă mkra êlan êran pral Dưr – Dhŭng nah Yŭ kdrêč găn Gia Nghĩa (Dak Nông) - Chơn Thành (Bình Phước). Hồ Văn Mười, Khua anôk bruă sang čư̆ êa čar Dak Nông mñă, êlan êran pral Gia Nghĩa - Chơn Thành srăng dưi ba yua djŏ wưng kčah hlăm thŭn 2027.

“Klă sĭt thŭn 2025 srăng ngă mkra êlan anei, anăn jing asăp mtrŭn mơ̆ng Đảng, Knŭk kna kơ hdră êlan êran pral Gia Nghĩa – Chơn Thành. Čar Bình Phước mphŭn ngă mkra leh mơ̆ng Chơn Thành nao Bình Dương lehanăn mkŏ hŏng Ƀuôn prŏng Hồ Chí Minh, leh mâo êlan êran pral Gia Nghĩa hŏng Chơn Thành srăng pŏk sa klei găl mrâo kơ hdră mđĭ kyar bruă duh mkra – ala ƀuôn mơ̆ng čar Dak Nông.

Tĭng kơ čar Lâm Đồng, bruă sang čư̆ êa alŭ wăl dôk bi hgŭm hŏng čar Khánh Hòa lehanăn dŭm êpul djŏ tuôm dôk hluê ngă hră mơar čih mkra hdră êlan êran pral Nha Trang – Liên Khương giăm 100km. Mbĭt anăn, dua ktuê êlan êran pral mkŏ Lâm Đồng hŏng krĭng Ngŏ kwar Dhŭng jing Tân Phú – Bảo Lộc (66km) lehanăn Bảo Lộc – Liên Khương (73km) ăt dôk ruh mtlaih dŭm klei gun kpăk čiăng pŏk ngă. Trần Hồng Thái, Khua Anôk bruă sang čư̆ êa čar Lâm Đồng brei thâo:

“Hnơ̆ng dlông ktuê êlan amâo mâo bi mlih ƀiădah brei mâo hdră mkra mlih kyua dŭm mta phŭn djŏ tuôm mkăn. Jih dua hdră bruă snăn čar Lâm Đồng dôk gĭr bi mklă ngă pral hră mơar čiăng dưi pŏk ngă bruă hlăm thŭn 2025 anei mtam.

Mtrŭt mđĭ bruă pŏk ngă dŭm hdră êlan klông mkŏ Lăn dap kngư jing sa hlăm dŭm mta phŭn yuôm bhăn dưi bi trông ti anôk bi kƀĭn Êpul hgŭm kriê dlăng krĭng Lăn dap kngư mrâo mkŏ mjing hlăm dŭm hruê akŏ thŭn 2025. Rah Lan Chung, Khua Anôk bruă sang čư̆ êa čar Gia Lai mtă kơ gưl dlông brei mâo klei bhiăn mđing duh kơ dŭm hdră bruă phŭn hluê si Hdră mtrŭn mrô 23 mơ̆ng Phŭn bruă kđi čar lehanăn Klei bi mklă mrô 377 mơ̆ng Khua knŭk kna.

“Dŭm hdră bruă ară anei mâo Gia Lai mđing dlăng jing: Mkra mđĭ tač êdeh phiơr Pleiku, duh mkra êlan êran pral Pleiku – Quy Nhơn, êlan êran pral Dưr – Dhŭng nah Yŭ, êlan treng mkŏ Lăn dap kngư, êlan mkŏ krĭng Ayŭn Pa (Gia Lai) hŏng kdriêk Êa Hleo (Dak Lak) lehanăn tal 6 jing êlan mkŏ Gia Lai – Phú Yên.”

Krĭng Lăn dap kngư mâo lu klei găl kơ mnơ̆ng pla sui thŭn hŏng dŭm anôk bruă êklai đolar, mbĭt hŏng klei jăk găl prŏng kơ lăn mnga ea mơak, dhar kreh… Mbĭt hŏng klei duh bi liê mơ̆ng gưl dlông, dŭm alŭ wăl brei mđĭ lar klei găl mâo, mjing tur knơ̆ng kơ wưng đĭ kyar mrâo, anei jing klei mtă mơ̆ng Khua gĭt gai Đảng Tô Lâm ti mmông mă bruă hlăm čar Gia Lai mrâo anei.

“Drei bi mklă klei gĭr ktưn, mâo klei mĭn prŏng hĭn, mjing tur knơ̆ng brei mkŏ mjing mtam hlăm thŭn 2025 anei čiăng mâo klei đăo knang kjăp mŭt hlăm wưng mrâo, bi mklă dŭm hdră êlan mđĭ kyar kơ wưng păn bruă ti anăp, hnơ̆ng trah dlăng thŭn 2025 mơ̆ng ala čar drei si srăng ngă? Alŭ wăl si srăng ngă? Drei gĭr ktưn mđĭ kyar Gia Lai, Lăn dap kngư mâo hdră ngă lŏ hma lu jơr, knhuah dhar kreh jăk siam, ala ƀuôn lehanăn wăl hdĭp mda hơĭt kjăp, mtrŭt mđĭ hdră mđĭ kyar lehanăn mđĭ hnơ̆ng tŭ jăk klei hdĭp mnuih ƀuôn sang.

Thŭn 2024, hnơ̆ng đĭ kyar bruă duh mkra ka djŏ msĕ hŏng klei čang hmăng, ƀiădah hnơ̆ng GRDP mơ̆ng krĭng Lăn dap kngư dưi mâo êbeh 484 êbâo êklai prăk, GRDP kah knar mâo 78,5 êklăk prăk/čô, đĭ 16% mkă hŏng thŭn 2023. Thŭn 2025 anei, hlăk dŭm hdră êlan êran pral dưi pŏk ngă, srăng mjing tur knơ̆ng čiăng Lăn dap kngư mjing boh kdrŭt mđĭ kyar bruă duh mkra – ala ƀuôn, đăo knang kjăp mŭt hlăm wưng mrâo./.