Knhal jih thŭn, Knơ̆ng bruă mkra mjing asăr kñŭl Hải Bình Gai Lai, ƀuôn prŏng Pleiku, čar Gia Lai hlăk hlê dôk bi đeh asăr kñŭl pioh kơ klei čhĭ Tết Nguyên đán. Hoàng Văn Quang, Pô bi ala mơ̆ng knơ̆ng bruă brei thâo, ăt jing asăr kñŭl mơh mơ̆ng dŭm krĭng pla mjing kñŭl jhlăm čar, ƀiădah mnơ̆ng knơ̆ng bruă djăp ênoh čuăn OCOP 4 mtŭ, anăp đuĕ nao kơ 5 mtŭ, jing klei ngă bruă jăk hĭn, jing asăr kñŭk đeh hŏng pui djuh, snăn asăr kñul mâo leh lu mnuih khăp hŏng knơ̆ng bruă mđĭ bi lar anôk blei mnia hlăm ala čar lehanăn chĭ kơ ala tač êngao:

 “Anôk duh mkra mâo mơh dŭm klei găl. Anăn jing klei bi mnia mblei hŏng ala tač êngao, mâo leh klei bi mlih prŏng mkă hŏng dŭm thŭn êlâo. Dŭm ala čar mơ̆ng Ơrôp lehanăn dŭm ala čar Ngŏ dhŭng Asi mkănčŏng tui duah čiăng pŏk mlar anôk mnia mblei. čiăng dưi mâo djăp ênoh čuăn pioh čhĭ mnia kơ ala tač êngao, anôk duh mkra ăt dôk gĭr bi djăp hŏng ênoh čuăn prŏng hĭn”.

Truh jih thŭn 2024,  Alŭ wăl lăn dap kngư mâo leh êbeh 1.300 mnơ̆ng  OCOP mâo tŭ yap mơ̆ng 3 - 5 mtŭ. Mnơ̆ng OCOP Lăn dap kngư amâo mâo djŏ knŏng jing klei bi klin mơ̆ng ai tiê mă bruă, lehanăn hŏng klei mbruă, lehanăn lŏ jing klei pưng myưng kơ krĭng lăn jiă knhuah gru, msĕ si čê mnga kñĭ, OCOP 3 mtŭ mơ̆ng kdriêk Krông Pač, car Daklak. Nguyễn Ngọc Quỳnh, pô mkra mjing boh mnga anei bi êdah, mơ̆ng sui leh ñu mđing hmư̆ kơ klei yuôm bhăn mơ̆ng mta ana êa drao anei, kyua anăn leh truh hlăm dliê ti lăn dap kngư mâo lu anôk mâo čê mnga kñĭ, ñu mđing ngă mkra mta mnơ̆ng anei. Leh giăm 10 thŭn pla mjing, ñu mâo truh 3.000 phŭn hlăm ênhă 2 hec ta, čiăng čhuang hlăm gưl mkra mjing mnơ̆ng pioh čhĭ. Ñu yăl dliê:

"Kâo ƀuh Việt Nam mâo lu mta boh mnga, hlăm anăn mâo ana êa drao. Hŏng klei khâwp kơ lăn ala krĭng lăn, kâo čiăng kriê pioh, lehanăn lŏ mđĭ bi lar truh hŏng mnuih ƀuôn sang hlăm alŭ wăl, ieo mthưr jih jang mnuih bi răng kriê, rŭ mjing anôk mjut bi lar, lehanăn răng kriê anôk pô pla mjing mbĭt hŏng jih jang mnuih”.

Klei khăp, klei myưng m’ang lehanăn klei thâo dưn yua krĭng lăn jăk jing mâo lu mta mnơ̆ng dhơ̆ng hdĭp, Lê Thùy Kim Loan, khua kiă kriê knơ̆ng bruă Pyloherb ti čar Kon Tum dưi tal wĭt leh hŏng 15 mta mnơ̆ng djăp ênoh čuăn mơ̆ng  OCOP. Tui si Lê Thùy Kim Loan, jing jang mnơ̆ng anei mâo mkŏ mjing mơ̆ng ana êa drao hlăm dliê. Mnuih ƀuôn sang ti dŭm boh ƀuôn krĭng čư̆ čhiăng hlăm kdriêk  Kon Plông lehanăn Đắk Glei, čar Kon Tum jing pô mkăp djăp mta ana êa drao jăk pioh mkra mjing. Kyuanăn, dŭm mta mnơ̆ng OCOP mâo leh klei đru mguôp prŏng hŏng yang ƀuôn:

"klei tŭ yap OCOP jing klei bi klă kơ mnơ̆ng jăk tui si krĭng wăl. Leh mâo klei tŭ yap djăp ênoh čuăn OCOP, hmei ƀuh mnơ̆ng pô mkra mâo klei jing hjăn pô mơh, hnơ̆ng jăk êa drao, mơ̆ng mta ana êa drao, kle imkra mjing hlŏng truh kơ mnuih mă bruă hlăm krĭng lăn anei. Tem OCOP mkăp leh ti čar Kon Tum mâo bi klă jing ana êa drao jăk mơ̆ng krĭng”.

Mơ̆ng mnơ̆ng mkra mjing jing boh mnga mơ̆ng bruă pla mjing, ƀiădah hŏng ai tiê klei khăp, klei myưng m’ang kơ mnơ̆ng mâo mơ̆ng ƀuôn sang pô, grăp čô mnuih ti lăn dap kngư mâo mkra mjing leh mnơ̆ng djăp ênoh čuăn OCOP jiă knhuah bhiăn pô guôp hŏng lăn ala krĭng wăl. Jih jang dŭm boh tŭ dưn mâo mơ̆ng grăp să sa mta mnơ̆ng, ti anei brei ƀuh klei găl prŏng kơ bruă bi mklin knhuah gru dhar kreh krĭng lăn hŏng klei mlih mrâo klei mĭn. Klei anei amâo mâo djhŏ knŏng đru mguôp kơ bruă mđĭ kyar klei hdĭp mnuih ƀuôn sang, ƀiădah lŏ bi lar klei hưn ktưn kơ lăn dap kngư căt đĭ./.