Lŏ bi hdơr kơ dŭm klei dôk bi mĭn mơ̆ng phung khua kiă kriê bruă Đảng čar Kon Tum hlam wưng mlan 6 thŭn 2020, Nguyễn Đức Tuy, K’iăng khua bruă Đảng čar Kon Tum brei thâo, mbĭt hŏng hdră êlan djŏ, klei kơ mnuih mă bruă jing yuôm bhăn, mjing klei tŭ dưn hlăm bruă bi hrŏ ƀun. Hŏng bruă klam jing khua êpul trŭn kơ bruă mơ̆ng bruă Đảng čar Kon Tum (pia klah čŭn jing Êpul 262), Nguyễn Đức Tuy, brei thâo, bruă kiă kriê lehanăn gĭt gai mâo ngă hŏng klei siă suôr, čar jao bruă klam klă mngač kơ phung khua kiă kriê kơ dŭm knơ̆ng dhar bruă, lehanăn gưl kdriêk, să đru mnuih ƀuôn sang Mường Hoong, Ngọk Linh pral tlaih mơ̆ng ƀun:

“ Êpul mă bruă mrô 262 kreh siă suôr hŏng nah gŭ, nao mă bruă nanao hlăm dŭm boh să, bi êdah bruă klam mơ̆ng jih bruă kđi čar hlăm klei đru mnuih ƀuôn sang mđĭ kyar klei duh mkra ala ƀuôn. Mbĭt anăn, jih jang phung knuă druh, đảng viên hlăm gưl să, ƀuôn mâo klei thâo săng, diñu klă sĭt mđrăm mbĭt hŏng mnuih ƀuôn sang dua să anei čiăng pral tlaih mơ̆ng ƀun ƀin”.

Păn kjăp klei kiă kriê mơ̆ng bruă Đảng čar Kon Tum, dŭm knơ̆ng dhar bruă Đảng dŭm gưl, lehanăn bruă sang čư̆ êa pral mâo mtam dŭm hdră mă bruă hŏng klei tŭ hŏng 2 să ƀun hĭn hlăm čar. Huỳnh Mười, K’iăng khua knơ̆ng bruă čuăl mkă lehanăn duh bi liê čar Kon Tum brei thâo, mbĭt hŏng 3 anôk mkăp prăk hlăm hdră ala čar kñăm (giăm 100 êklai prăk hlăm wưng thŭn 2021-2025), hlăm klei mbha ênoh bi liê tĭng bi liê tal êlâo kơ 2 să anei čiăng mâo ai dưi kpưn đĭ. Êlan dơ̆ng čar mkŏ hŏng krah kdriêk Đắk Glei hŏng Mường Hoong, Ngọk Linh lehanăn kdriêk Tu Mơ Rông mâo boh taih 100km dưi bi leh, mjing êlan klông găl ênưi kơ klei êrô hiu lehanăn mnia mblei.

Huỳnh Mười hưn, čar hlăk mkŏ mjing, klei iêo jak duh bi liê 2 bruă pla, lehanăn mđĭ bruă mkra mjing dŭm mta ana êa drao, hŏng ênoh duh bi liê jih jang êbeh 2.000 êklai prăk ti dua să, anei srăng jing boh kdrŭt čiăng kơ 2 să lŏ dơ̆ng đĭ kyar pral hĭn lehanăn kjăp.

“Đru kơ 2 să Mường Hoong, Ngọk Linh snăn klei mĭn hmei jing ktrâo atăt hdră mă bruă hŏng mđup brei mnơ̆ng kơ mnuih ƀuôn sang. Hlăm klei kah ngă prăk duh bi liê snăn kơ 2 să dleh dlan ngă bi djŏ hŏng ênoh čuăn. Êngao anăn, hmei iêo jak phung duh mkra, phung duh bi liê đĭ hriê hŏng 2 să, mơ̆ng dưi mjing bruă knuă mă, lehanăn klei mnuih ƀuôn sang duah ƀơ̆ng”.

Jing anôk bruă mâo jao kiă kriê klei mtrŭt mjhar, hâo hưn mtă mtăn kơ mnuih ƀuôn sang ti 2 să ƀun hĭn hlăm čar mâo klei bi mlih hdră êlan mă bruă, bi mlih klei duah ƀơ̆ng, Trịnh Ngọc Tâm, K’iăng khua anôk bruă đru čung ba mnuih ƀuôn sang mơ̆ng bruă Đảng čar Kon Tum brei thâo, anôk bruă anei kčĕ leh kơ čar čiăng tiŏ nao knuă druh, đảng viên mda asei mơ̆ng dŭm anôk bruă mâo klei thâo hlăm bruă nao truh hlăm să, hlăm ƀuôn.

“Knuă druh, đảng viên dưi tiŏ nao đru bruă jing phung knuă druh mda asei mâo ai tiê hur har, thâo hlăm bruă nao đru hâo hưn, mtô mblang mtrŭt mjhar klei ba yua kreh knhâo, ba dŭm mta klei mrâo truh hŏng să, hŏng ƀuôn, mâo đru mnuih ƀuôn sang, ktrâo atăt kơ mnuih ƀuôn sang bi mlih hdră duh ƀơ̆ng ba wĭt klei tŭ dưn”.

Gưl čar mâo 23 knơ̆ng dhar bruă trŭn nao lu knuă druh, đảng viên mŭt hlăm êpul ngă bruă mơ̆ng bruă Đảng čar Kon Tum nao đru mnuih ƀuôn sang  Mường Hoong, Ngọk Linh. Mđrĭng hŏng anăn, kdriêk Đắk Glei ăt mkŏ mjing mơh êpul ngă bruă đru kơ 2 să. Lê Viết Nam, Khua knơ̆ng bruă sang čư̆ êa kdriêk Đắk Glei brei thâo, 22 boh ƀuôn hlăm 2 să mâo leh sơăi êpul mă bruă, knuă druh đảng viên dôk mbĭt huă ƀơ̆ng mbĭt, mă bruă mbĭt hŏng mnuih ƀuôn sang, djă ti kngan ktrâo ti bruă kơ mnuih ƀuôn sang, čiăng bi mâo klei tŭ dưn. Knuă druh čar, kdriêk lehanăn să iêo jak lu knuă druh, đảng viên mơ̆ng dŭm boh ƀuôn mâo klei bi mguôp, ngă klei bi hmô ba êlan êlâo hlăm jih jang klei mă bruă, bi mlih mnơ̆ng pla mnơ̆ng rông.

Truh ară anei, klei tŭ jing prŏng hĭn jing bi mlih knhuah mĭn, hdră mă bruă ba yua klei kreh knhâo hlăm klei duh mkra pla mjing. Hŏng dŭm đang pla sâm Ngọc Linh, dŭm đang kphê bi kyut boh, dŭm pruĕ mbuôn ana sâm mtah mda, ară anei mnuih ƀuôn sang amâo mâo djŏ knŏng tlaih mơ̆ng ƀun ƀiădah lŏ duah hdră čiăng đĭ nao kơ mdrŏng. Tui si Lê Viết Nam, jăk yan adiê, jăk lăn ala, jăk anak mnuih snăn 2 boh să Mường Hoong, Ngọk Linh hlăk kpưn đĭ.

“Hŏng klei kut kat mơ̆ng jih bruă kđi čar, mnuih ƀuôn sang amâo mâo djŏ knŏng tlaih mơ̆ng ƀun ƀin, ƀiădah dôk duah hdră mđĭ kyar nao kơ sang mdrŏng hlăm ƀuôn sang pô hŏng djăp mta hdră êlan duh ƀơ̆ng. hdră ểlan djŏ, knuă druh jih ai tiê trŭn kơ bruă, đru jih jang bruă kđi čar, boh nik jing phung duh bi liê, phung duh mkra mđrăm mbĭt sĭt nik mnuih ƀuôn sang srăng mâo klei bi mlih”.

Ba hdră mtrŭn mơ̆ng klei bi kƀĭn prŏng Đảng, ba dŭm asăp mtrŭn mơ̆ng êpul khua kiă kriê bruă Đảng nao hlăm bruă knuă, čar Kon Tum tŭ jing leh hlăm bruă msir klei ư̆ êpa, bi hrŏ klei ƀun knap ti 2 boh să Mường Hoong lehanăn Ngọk Linh (kdriêk Đắk Glei). Hdră êlan djŏ, mâo knuă druh, đảng viên jih ai tiê trŭn hlăm bruă, čiăng kơ klei hdĭp mnuih ƀuôn sang mâo klei bi mlih. Bi mlih klei mĭn, bi mlih hdră ƀmă bruă, jhŏng čan prăk duh kơ bruă, bi mlih hdră pla mjing, anăn yơh jing knơ̆ng čiăng kơ mnuih Xơ Đăng hlăm krĭng dlông anei tlaih mơ̆ng ƀun. Hŏng dŭm klei bi hmô mă bruă tŭ jing mơ̆ng anôk ala, yan adiê jăk snăn ana kphê, ana êa drao, boh nik ana sâm Ngọc Linh, hlăk dôk bi lar, mjing atur knơ̆ng kjăp kơ mnuih ƀuôn sang kjăp ai tiê kpưn đĭ tlaih mơ̆ng ƀun lehanăn ânăp đuĕ nao kơ mdrŏng.

Mơ̆ng klei tŭ jing lehanăn mă klei hriăm hlăm bruă msir klei ư̆ êpa bi hrŏ klei ƀun knap ti 2 să Mường Hoong, Ngọk Linh, bruă Đảng čar Kon Tum hlăk lŏ dơ̆ng pŏk mlar hdră mă bruă djŏ đru kơ 57 boh ƀuôn ti 8 să dleh dlan hlăm čar.  58 anôk bruă, êpul êya mâo jao leh klă ênhŭm bruă knuă čiăng đru kơ grăp boh ƀuôn dưi msir klei ư̆ êpa, bi hrŏ klei ƀun knap, mđĭ kyar klei duh mkra ala ƀuôn./.