
Hlăm sa boh sang mrâo, Y Tơn, djuê ana M’Nông, ti bon Dak Săk, să Dak Săk, kyua klei hdĭp mâo leh klei bi mlih. Y Tơn brei thâo, anei jing boh tŭ dưn mơ̆ng klei tlaih kơ ƀun hŏng hŏng klei kjăp mơ̆ng bruă sang čư̆ êa alŭ wăl, boh nik klei bi đru mơ̆ng phung đảng viên hlăm bruă Đảng bon. Dŭm thŭn êlâo, êbeh 2ha hma lu jing pla hbei ƀlang, kăn dưi rông leh dŭm čô huă ƀơ̆ng hlăm sang. Ƀiădah ară anei, ăt 2 hecta anei mơh, leh mâo pla kphê, boh durian boh kneh, snăn gŏ sang mâo leh ênoh hrui wĭt hơĭt. “Mâo knŭk kna mđing, mâo êpul bruă Đảng bon ktrâo atăt lehanăn dưi čan prăk mơ̆ng knơ̆ng prăk đru ba bruă yang ƀuôn snăn gŏ sang mâo klei găl mđĭ kyar, snăn gŏ sang mâo klei găl mđĭ kyar bruă duh mkra. Ară anei mâo pla kphê lehanăn lu ana boh kroh, mâo ba wĭt leh ênoh hơĭt, klei hdĭp mdul hĭn leh, mâo klei găl čiăng brưih đĭ”.

Mbĭt hŏng dŭm hdră, klei bi hrŏ ƀun, msir klei ư̆ êpa, mâo dŭm ênoh prăk dưi čan, mâo dŭm gưl bruă đảng lehanăn jih bruă kđi čar bi đru dŭm gŏ sang ƀun hŏng dŭm bruă, hdră mă bruă klă mngač đru leh dŭm bruă bi hrŏ ƀun hŏng klei tŭ jing. Jing đảng viên, kahan hđăp mâo k’hưm, snăn grăp hrue khua mduôn Y Bleng, djuê ana M’Nông, ti bon mrô 9, să Krông Knô, mbĭt hŏng êpul khua kiă kriê ƀuôn, nao čuă dŭm gŏ sang knap mñai hlăm bon, bi mđĭ ai kơ hdră duah ƀơ̆ng lehanăn mă bruă.

Khua mduôn Y Bleng brei thâo, hlăm 5 đảng viên, 5 gŏ sang thâo mâo srăng đru kơ sa gŏ sang ƀun. Dŭm gŏ sang ƀun mâo djă ti kngan ktrâo ti bruă, mâo klei mđĭ ai êjai hlăm ai tiê lehanăn mnơ̆ng dhơ̆ng pioh kơ klei kpưn đĭ:
“Ayŏng adei đru bi mtrŭt mjhar hdơ̆ng găp, mtrŭt mnuih ƀuôn sang thâo bi mguôp, bi đru hlăm klei duah ƀơ̆ng. Phung kahan hđăp amâo mâo djŏ jing hjăn păn ôh, diñu lŏ thâo bi đru hŏng mnuih ƀuôn sang, nao čuă dŭm gŏ sang dôk hlăm klei dleh dlan. Hlei sang knap hĭn snăn iêo jak jih jang mâo klei bi đru, hlei gŏ sang thâo mâo leh đru kơ gŏ sang dôk hlăm klei dleh dlan”.

Bruă mơ̆ng phung đảng viên ngă klei bi đru kơ dŭm gŏ sang ƀun bi kpưn đĭ , lehanăn hdră anei mâo bi lar leh truh hŏng dŭm boh ƀuôn mkăn hlăm čar Dak Nông hđăp, čar Lâm Đồng mrâo. Dŭm êtuh gŏ sang hlăk mâo leh dŭm êpul bruă đảng nah gŭ, phung đảng viên hlăm bon bi đru čiăng pral tlaih mơ̆ng klei dleh dlan. Vương Thị Hiền, Khua bruă mặt trậ să Dak Ndrung, kdriêk Dak Song êlâo dih brei thâo, mâo dŭm đảng viên mơ̆ng lu gưl, mơ̆ng ƀuôn truh să, kdriêk, lehanăn klei sa ai mơ̆ng phung duh mkra, phung thâo bi đru, snăn bruă đru kơ dŭm gŏ sang ƀun mâo klei dưi bi đru jăk:
“Klă sĭt klei hdĭp mnuih ƀuôn sang dôk tuôm hŏng lu klei dleh dlan, diñu dôk kƀah lu mta klei, snăn amâo lŏ tui tiŏ kơ ênoh ôh, ƀiădah mđing kơ boh tŭ. Kyuadah mâo dŭm gŏ sang ƀun snăn drei bi đru hlăm lu mta, amâo mâo djŏ knŏng đru prăk pioh mă bruă ôh. Snăn alŭ wăl mkă tĭngya mta klei đru bi jăk, đru hlăm djăp mta čiăng kơ digơ̆ tlaih mơ̆ng klei dleh dlan”.
Hlue ngă hdră ala čar kñăm kơ bruă bi hrŏ ƀun, mlan 12/2021 bruă Đảng čar Daknông hđăp mâo leh hdră mtrŭn mrô 13 kơ bruă bi hrŏ ƀun wưng thŭn 2021-2025, tă êlan mă bruă truh thŭn 2030. Hdră mtrŭn mâo leh mta kñăm bi hrŏ ƀiă êdi 3% gŏ sang ƀun hlăm grăp thŭn, hŏng krĭng mnuih djuê ƀiă jing 5% grăp thŭn, kdlưn hĭn êbeh 2 blư̆ ênoh čuăn ala čar kñăm. Dưn yua jih bruă klam mơ̆ng dŭm êpul bruă Đảng, dŭm êpul bruă Đảng nah gŭ, phung đảng viên mâo čar mđing êdi. Kyuanăn, 5 thŭn êgao, čar Daknông hđăp djăp nanao lehanăn kdlưn hĭn hdră kčah bi hrŏ ƀun, jing klei bi hrŏ ƀun pral hĭn hlăm alŭ wăl lăn dap kngư, lehanăn sa hlăm dŭm alŭ wăl bi hrŏ ƀun pral hĭn hlăm kluôm ala. Ngô Thanh Danh, Khua bruă Đảng čar Dak Nông hđăp êlâo dih brei thâo:
“Mâo lu hdră bi đru, mâo ngă jăk hdră êlan djuê ana, hdră êlan bi hrŏ ƀun hŏng klei kjăp, mkŏ mkra krĭng ƀuôn sang mrâo, hlue hŏng hdră êlan mđĭ kyar kjăp. Hlue ngă jăk dŭm hdră êlan ala čar kñăm kơ klei mđĭ kyar bruă duh mkra ala ƀuôn krĭng mnuih djuê ƀiă lehanăn krĭng čư̆ čhiăng, duh hĭn jih jang ai dưi kơ klei mđĭ kyar, lehanăn bi leh bruă nah gŭ, klei kơ sang dôk, lăn dôk, lăn pla mjing”.
Asăp mtrŭn mrô 05 thŭn 2021 mơ̆ng êpul khua kiă kriê bruă Đảng bi mklă, bruă bi hrŏ ƀun hŏng klei kjăp jing hdră êlan prŏng, yuôm bhăn, sa hnơ̆ng hlăm jih klei mlih mrâo, rŭ mdơ̆ng lehanăn mđĭ kyar lăn čar. Dŭm bruă hlue ngă ti Daknông mrâo leh êgao brei ƀuh, klei jih ai tiê mơ̆ng hdră mơ̆ng Đảng čar mtrŭn, jih jang bruă ngă hlăm ƀuôn sang dưi đru leh kơ bruă bi hrŏ ƀun hŏng klei jăk. Klei mlih mrâo mơ̆ng bruă kiă kriê mơ̆ng dŭm êpul bruă Đảng nâo mđring hŏng jih jang phung đảng viên mâo ba wĭt leh klei tŭ dưn klă mngač hlăm bruă bi hrŏ ƀun./.
Viết bình luận