Mgăt boh êdeh mdiăng mnơ̆ng hlăm ktuê êlan tuh gu drŏng, mdiăng êbeh 2.000 ana kphê hŏng 300 ana măkka mjeh mơ̆ng đang mjeh ba pla bi mlih đang pla mjing amâo tŭ dưn, Điểu Đi, Bon Bu Prâng 2, să knông lăn Quảng Trực, čar Lâm Đồng mơak snăk. Kyua mâo Knŭk kna bi liê anăn ktuê êlan prŏng siam, klei mnia blei găl ênưih.  Dŭm hdră bruă nah gŭ ƀrư̆ bi leh, dŭm hdră bruă đru kơ klei hdĭp mda dưi pŏk ngă, gŏ sang Điểu Đi leh anăn mnuih ƀuôn sang hlăm să ăt mơ̆ng anăn mâo klei đĭ kyar.

 “Bi mni kơ Đảng, Knŭk kna đru leh mnuih  ƀuôn sang mâo êsei huă, djam ƀơ̆ng leh anăn mkŏ mjing pưk sang. Klei hdĭp mda hơĭt kjăp, ară anei knŏng mđing mđĭ kyar bruă duh mkra, mnuih ƀuôn sang hlue ngă hdră êlan mơ̆ng Đảng leh anăn Hdră bhiăn mơ̆ng knŭk kna đuč.”

Nguyễn Văn Anh, Khua Knơ̆ng bruă sang čư̆ êa să Quảng Trực, brei thâo, bi mguôp pŏk ngă dŭm hdră êlan, hdră bruă, alŭ wăl kƀĭn mđing kơ mnuih ƀuôn sang bi mlih ana pla mjing, mnơ̆ng rông djŏ guôp hŏng klei mdê kơ lăn ala, yan adiê. Mơ̆ng klei găl bi liê mơ̆ng Knŭk kna,hŏng klei ngă djŏ guôp hŏng klei gĭr ktưn mơ̆ng mnuih ƀuôn sang knông lăn bi hrŏ leh pral ênoh gŏ êsei ƀun.

 “Alŭ wăl lŏ dơ̆ng ksiêm dlăng êlam Hdră mtrŭn klei bi kƀĭn Đảng dŭm gưl, mơ̆ng tur knơ̆ng pŏk ngă hrăm mbĭt dŭm hdră bruă, hdră kčah, hdră duh bi liê leh anăn lŏ dơ̆ng hâo hưn, mtrŭt mjhar mnuih ƀuôn sang gĭr ngă bruă mkra mjing, lăm lui klei ư̆ êpa, kthŭl mluk. Gĭr mkŏ mjing alŭ wăl đĭ kyar, tlaih ƀun hlăm thŭn 2025.”

 Kơ klei tŭ jing hlăm jih êbeh 20 thŭn mkŏ mjing čar Dak Nông (hđăp), K’Khét Atô, Khua hđăp Knơ̆ng bruă djuê ana leh anăn Klei đăo brei thâo, wưng mơ̆ng 2004 truh 6/2025, Dak Nông mâo Gưl dlông bi liê hlăm brô 2.800 êklai prăk kơ 3 hdră kñăm ala čar. Mbĭt hŏng ênoh prăk brei čan êbeh 820 êklai prăk,  klei găl bi liê dưi ba djŏ mnuih, djŏ hdră, đru kơ bruă bi hrŏ ƀun mâo klei tŭ dưn lu.

  “Mâo klei mđing dlăng mơ̆ng Đảng, Knŭk kna leh anăn Bruă kƀĭn ala ba mdah leh Hdră êlan pŏk ngă 3 hdră kñăm ala čar hlăm krĭng mnuih djuê ƀiă, krĭng čư̆ čhiăng. Mnuih ƀuôn sang dŭm djuê ana bi lông ngă bruă, mkra mjing, msưh kdŭn klei dleh dlan, ƀun ƀin, čiăng kơ alŭ wăl tlaih mơ̆ng čar ƀun ƀin.”

 Wưng 2021 truh ară anei, grăp thŭn krĭng knông lăn čar Lâm Đồng (Dak Nông) êlâo dih hrŏ êbeh 3% gŏ êsei ƀun leh anăn truh akŏ thŭn 2025, ênoh gŏ êsei ƀun knŏng adôk êbeh 3%. Bruă ba anăp nanao krĭng Lăn Dap Kngư leh anăn dôk hlăm êpul tal sa kơ klei bi hrŏ ƀun, brei ƀuh klei gĭr hŏng dŭm hdră ngă tŭ dưn mơ̆ng alŭ wăl hlăm klei pŏk ngă hdră kñăm ala čar, mđĭ kyar hơĭt kjăp krĭng mnuih djuê ƀiă leh anăn krĭng čư̆ čhiăng.