Aguah ưm hlăm kdrăn čuah hang ksĭ Nha Trang, dŭm kdrăn čuah anăn ară anei lŏ wĭt doh leh msĕ si êlâo, kñĭ siam, Phung tue hiu čhưn lŏ dơ̆ng êbat hiu hlăm kdrăn čuah mđŭ angĭn êđăp mơ̆ng êa ksĭ, hŏng klei mơak. Dŭm boh adŭ bi kƀlêč kƀlir êa mil mdê mdê ktue hang ksĭ, ênai phung hđeh bi mơak mñai êran hiu, ênai êa ksĭ poh yă msĕ si ênai bi êwa kơ klei lŏ bluh đĭ leh klei êa lip prŏng.

Trần Văn Tân ti ƀuôn hgŭm Nha Trang brei thâo, knŏng dŭm hrue êlâo, anôk anei bŏ hŏgn djah djâo êa lêč mơ̆ng hnoh krông Cái kluh hriê. Kyâo mtâo, boh đung krô, giêt ksu, kdrăp trah mă kan mbĭt hŏng lŭ lăn mkăp bi kƀŭt truh dŭm km. Dŭm êtuh čô mnuih ngă bruă bi mdoh wăl hdĭp mda mbĭt hŏng dŭm anôk bruă hiu čhưn ênguê, lehanăn mnuih ƀuôn sang tinăn, hrui êmiêt hrue mlam. Tân ƀuh hơĭt ai tiê leh dŭm hrue dôk hrui êmiêt, hang ksĭ lŏ wĭt siam doh ba klei jăk kơ mnuih ƀuôn sang lehanăn tue hiu čhưn.

“Grăp čô mnuih bi mguôp čô ƀiă, čô ƀiă, mâo mbĭt hŏng mnuih ala tač êngao nao bi mguôp mơh. Knŏng 2-3 hrue doh yơh hang ksĭ. Ară anei dlăng êa ksĭ lŏ wĭt êngeh leh msĕ si hđăp. Ƀuh jing ară anei mơak leh.”

Amâo mâo djŏ knŏng bi mdoh klei čhŏ djahn hlăm hang ksĭ, dhar bruă hiu čhưn ênguê Khánh Hòa hlăm dŭm hrue hjan prŏng, ăt ktuh êyuh kyua mnuih ƀuôn sang, dŭm pluh boh ca nô, mô tô êa, mran ê’I mơ̆ng phung duh mkra mâo bi đru dŏnbg mnuih hlăm krĭng tlung êa lip. Leh êa hrŏ, dŭm êpul êya bi đru tŭk kna lu mnơ̆ng ƀơ̆ng, mnơ̆ng yua, braih mkuê̆, čhum ao, đru kơ klei hdĭp mda mnuih ƀuôn sang.

Truh kơ ară anei, jih jang knơ̆ng bruă hiu čhưn ênguê ktue hang krông  Cái lŏ wĭt pŏk ƀăng mă bruă leh dŭm hrue mdei hĕ. Nguyễn Văn Hòa, Khua knơ̆ng bruă dhar kreh – mjuăt asei mlei lehanăn hiu čhưn ênguê Khánh Hòa brei thâo:

“Tue hriê čhưn ênguê, mdei msăn lŏ wĭt mjhĭt m’uăt msĕ hŏng hđăp. Kơ kdrêč anôk bruă dhar kreh srăng mtrŭt mjhar, đru phung duh mkra duh bi liê dŭm mta bruă mrâo kơ bruă hiu čhưn ênguê. Anôk bruă srăng mkŏ mjing dŭm mta bruă knar hŏng tač êngao čiăng iêo jak tue truh hŏng čar Khánh Hòa hlăm wưng knhal jih thŭn”.

Nghiêm Xuân Thành, Khua bruă Đảng čar Khánh Hòa, brei thâo: Bruă hiu čhưn ênguê jing prŏng hĭn hlăm bruă duh mkra čar Khánh Hòa, dưi djap jing akŏ kăp ktŭng lŏ bi kơrŭ wĭt bruă duh mkra mâo klei đĭ kyar. Ñu kiă kriê:

“Mđiă siam leh, phung tue hlăk truh, kyuanăn, bi pral hlue ngă bruă mtrŭt mđĭ klei hiu čhưn ênguê hŏng klei êđăp ênang. Bruă hiu čhưn ênguê srăng hmăidjŏ hŏng phung duh mkra, anôk duh mkra, hmăi djŏ hŏng klei hrui wĭt ngăn prăk kơ knŭk kna, mjing bruă mă, snăn bruă hiu čhưn eneguê năng ngă mtam”./.