Phạm Quốc Lựu, 70 thŭn, ti alŭ Đăk Tô 5, să Đăk Tô nao ti Anôk bruă Hră mơar knŭk kna să ngă hră mơar dưn hdră đru ala ƀuôn kơ phung amĭ. Anei jing gưl tal êlâo Lưụ nao ngă hră mơar ti anôk drông mnuih ƀuôn sang sa boh ƀăng:

“Hriê tinei snăn knuă druh đru kơ jih jang dŭm bruă, ya klei čiăng ăt dưi ktrâo lač klă. Knuă druh ară anei lu jing phung mda asei, dưi ruah, ngă bruă jăk. Kâo čang hmăng êpul anei êdei anăp jing leh kmeh gơ̆ng mơ̆ng êpul knuă druh să Đăk Tô”

 Ngă gru hmô bruă sang čư̆ êa dua gưl, să Đăk Tô bi leh êpul mă bruă, mbha klă bruă klam kơ phung knuă druh, phung mă bruă knŭk kna leh anăn pŏk ngă jih boh phŭn hlăm dŭm mta bruă. Knuă druh să pral bi blŭ hrăm hŏng dŭm knơ̆ng, dhar bruă mơ̆ng čar čiăng ktrâo lač, kyua anăn bruă knuă klă mngač.

Kơ klei mlih mrô, leh bi mŭt, kdrăp hâo hưn hđăp amâo lŏ dưi ba yua ôh, knua druh bi mưng hŏng kdrăp mrâo kyua anăn tal êlâo adôk mtŭk mtŭl. Wăt tơdah ka mâo ôh phung knuă druh thơ̆ng, êpul knuă druh ti Anôk bruă ngă hră mơar knŭk kna ti să čŏng hriăm, rơ̆ng kơ bruă ngă leh anăn tŭ mă hră mơar online kjăp. Ară anei, 100% hră mơar knŭk kna ti să dưi msir djŏ wưng. Mai Huy Hưng, K’iăng Khua Knơ̆ng bruă sang čư̆ êa să Đăk Tô brei thâo, knuă druh gĭr găn klei dleh dlan, lu hruê mă bruă truh krah mlam čiăng hmao hnơ̆ng:

“Mă bruă msĕ si amâo mâo knăm năm, knăm kjuh ôh.  Ayŏng adei lu blư̆ 10 mmông mlam ăt dôk mă bruă mơh, ksiêm dlăng êjai, êmuh gưl dlông êjai čiăng dưi ktrâo lač. Dŭm bruă klam jăk leh, ƀiădah thơ̆ng kơ bruă mtô adôk kƀah. Đa đa bruă msĕ si mlih mrô klam bruă ƀiădah knuă druh ăt čŏng hriăm, pŏk ngă djăp ênŭm hlue si boh phŭn gĭt gai”.

Leh 4 mlan ngă bruă, să Đăk Rve, čar Quảng Ngãi rơ̆ng hnơ̆ng bruă knuă lu snăk, hlăk êjai klei thâo bruă mơ̆ng phung knuă druh, phung mă bruă ka bi knar. Mơ̆ng boh sĭt anăn, să mâo leh hră mơar akâo kơ čar đru, dăp thiăm phung mă bruă hlăm dŭm mta brei mâo klei thâo êlam kơ kdrăp mrâo hâo hưn, mdrao mgŭn, mtô bi hriăm… Ară anei, knuă druh să Đăk Rve khăng bi blŭ hrăm nanao hŏng dŭm knơ̆ng, dhar bruă ti čar čiăng dưi đru kơ bruă thơ̆ng. Kyua anăn, lu bruă êlâo dih kƀah mnuih mă bruă dưi mđĭ, amâo mâo ôh klei lui bruă sui amâodah lui bruă klam.

Huỳnh Ngọc Phong,  Khua Knơ̆ng bruă sang čư̆ êa să Đăk Rve, čar Quảng Ngãi brei thâo, kdrăp mnơ̆ng, anôk bruă nah gŭ kdrăp mrâo hâo hưn ti lu alŭ ka dưi bi liê hrăm mbĭt, kyua anăn bruă bi hgŭm, bi drông adôk êmưt. Čiăng msir boh klei anei, să pŏk ngă leh hdră čŏng hriăm, čŏng ksiêm dlăng, mđĭ klei thâo hlăm êpul knuă druh, phung mă bruă:

“Mđĭ ktang bruă yua kdrăp mrâo hâo hưn hlăm bruă knuă, păn kjăp boh klei ti alŭ pral, mguôp hŏng bruă klam phung khua ƀuôn. Yuôm bhăn hĭn jing mđĭ ai jih jang phung knuă druh, phung mă bruă knŭk kna mâo ai tiê čŏng ngă, kjăp, ngă bruă klam hlăm ai tiê kyua mnuih ƀuôn sang. Kâo mtă kơ ayŏng adei hlăm êpul gĭt gai Knơ̆ng bruă sang čư̆ êa să, phung khua adŭ bruă brei rơ̆ng ai tiiê “5 klă” čiăng ksiêm dlăng leh anăn đru mđĭ bruă knuă”.

 Hlue si klei ksiêm yap mơ̆ng Hdră êlan hâo hưn msir mgaih hră mơar knŭk kna ti čar Quảng Ngãi, hlăm wưng êgao, ênoh hră mơar ti dŭm să, ƀuôn hgŭm, wăl duh mkra dưi msir mgaih êlâo kơ wưng kčah leh anăn djŏ wưng mâo ênoh giăm 99%. Anôk dlăng bruă Đảng čar mtă kơ dŭm knơ̆ng, dhar bruă lŏ dơ̆ng tiŏ nao phung knuă druh, êpul đru bruă knuă, boh nik hlăm bruă lăn ala, ngă dŏ wăl hdĭp mda, ngăn prăk ti dŭm alŭ wăl mâo hdră bruă phŭn msĕ si êlan êdeh treng êran pral, êlan dơ̆ng êran pral Quảng Ngãi - Bờ Y, ktuê êlan hang ksĭ Dung Quất - Sa Huỳnh…; mbĭt anăn, mđĭ klei hriăm mjuăt, ktrâo lač online leh anăn đru kơ gưl să. Nguyễn Hoàng Giang,  Khua Knơ̆ng bruă sang čư̆ êa čar Quảng Ngãi bi mklă, knuă druh čar lŏ dơ̆ng hrăm mbĭt, đru kơ dŭm alŭ wăl hlăm bruă mlih mrô čiăng duh jăk hĭn kơ mnuih ƀuôn sang:

“Hmei ksiêm dlăng bruă ngă bruă sang čư̆ êa dua gưl, hmao msir klei dleh dlan, ruh mgaih klei kpăk. Grăp Anôk bruă kriê dlăng đa đa phung khua hlăm bruă Đảng čar, grăp čô khua hlăm bruă Đảng čar kriê dlăng sa amâodah dua să, hưn mdah kluôm hŏng gưl dlông. Rơ̆ng bruă sang čư̆ êa dua gưl ngă bruă nanao, boh nik hlăm klei pŏk ngă bruă knŭk kna online, mguôp hŏng mnuih ƀuôn  sang leh anăn anôk bruă duh mkra”./.