Dŭm hruê akŏ mlan 6 anei, ênoh phung tuê nao ti Đà Lạt, čar Lâm Đồng đĭ lu. Ti dŭm bĭt êlan dơ̆ng wăl krah msĕ si Trần Phú, amâodah jŭm dar ênao Xuân Hương…truh kơ dŭm đang war jŭm dar ƀuôn prŏng ti Ljac Dương, Tà Nung, mâo lu sơnăk phung tuê. Ayŏng Nguyễn Khắc Hoàng Lâm, sa čô hdĭp sui thŭn ti ƀuôn hgŭm mrô 4 brei thâo:

“Hlăm yan mdei prŏng, ƀuôn prŏng jing hơ̆k mơak hĭn. Mnuih ƀuôn sang Đà Lạt hmei bi drông phung tuê hŏng klei blŭ tlao, boh kroh doh leh anăn dŭm klei yăl dliê kơ ƀuôn prŏng. Kâo pô ăt khăp dưi bi tuôm, blŭ tlao hŏng phung tuê, hưn hŏng diñu dŭm bĭt anôk mâo ƀiă mnuih thâo leh anăn dŭm anôk hiu čhưn ênguê mrâo mơ̆ng alŭ wăl pô”.

Leh gưl bi lông mŭt adŭ 10, lu phung hđeh sang hră lui hĕ klei uêñ mĭn êjai nao bi lông, Đà Lạt lŏ drông lu gŏ sang, lu hĭn mơ̆ng Hà Nội, Hồ Chí Minh, Vũng Tàu leh anăn dŭm čar kwar Yŭ. Amai Thùy Dương, tuê mơ̆ng ƀuôn prŏng Hồ Chí Minh brei thâo:

          “Gưl nao hiu anei, hmei mdei msăn ti sa wăl anôk ktuê ênao Tuyền Lâm, mâo wăl anôk siam, êđăp ênang. Boh nik mnơ̆ng ƀơ̆ng huă Đà Lạt mâo mnâo ƀâo mngưi leh anăn jăk êdi. Êngao kơnăn, klei mă bruă jăk leh anăn ênoh ênil djŏ đru kơ gưl mdei msăn jing jăk hĭn êdi”.

Klei jăk yâo mơ̆ng Đà Lạt lŏ dưi mđĭ hĭn kyua mâo klei gĭr mơ̆ng dŭm knơ̆ng bruă alŭ wăl hlăm klei bi mrâo bruă mă leh anăn mđĭ hnơ̆ng tŭ jăk. Amai Bùi Lê Giáng Tiên, pô kiă kriê Dalat Edensee Lake Resort & Spa brei thâo:

          “Hmei ngă lu mta bruă bi mguôp hŏng mdei msăn leh anăn dŭm bruă mkăn msĕ si Spa, mnơ̆ng ƀơ̆ng huă ti dŭm tour amâodah anôk nao čuă dlăng ti Đà Lạt. Êngao kơ anôk mdei msăn phung tuê dưi yua dŭm mta bruă mkăn mơ̆ng čar Lâm Đồng hŏng ênoh găl guôp”.

Đinh Văn Dôn, khua knơ̆ng bruă hiu čhưn ênguê Happy Day brei thâo:“Hmei mâo lu mta mnơ̆ng hiu čhưn ênguê kơ phung tuê, mđing truh kơ bruă lŏ hma dưn yua kdrăp mrâo mrang, kyua ară anei phung tuê uêñ mĭn kơ dŭm mta boh mnga bruă lŏ hma, boh nik jing kphê,mdei msăn, massage leh anăn dŭm bruă hiu čhưn ênguê mkăn”.

Mâo yan adiê êđăp, wăl siam, bruă hiu čhưn ênguê jăk, ƀuôn prŏng Đà Lạt, čar Lâm Đồng amâo djŏ knŏng iêo jak phung tuê hlăm lăn čar, ƀiădah lŏ jing anôk truh jăk mơ̆ng phung tuê tar rŏng lăn. Akŏ yan hjan anei, ti Đà Lạt mkŏ mjing hdră bi mguôp, mjĕ mjuk “Mkŏ dhar kreh, bi mguôp bruă hiu čhưn ênguê plah wah Lâm Đồng hŏng ƀĭng hgŭm Dhŭng Korea”. Nguyễn Tiến Hải, k’iăng khua knơ̆ng bruă dhar kreh, mjuăt asei mlei leh anăn hiu čhưn ênguê čar Lâm Đồng brei thâo, čiăng iêo jak phung tuê Dhŭng Korea hriê ti Lâm Đồng adôk mâo lu mta kñăm srăng ngă:

“Đà Lạt – Lâm Đồng mâo yan adiê êđăp, mâo lu mta klei hlăp lêñ, dhar kreh mnuih djuê ƀiă leh anăn lu mta klei mjuăt asei mlei msĕ si golf, đĭ čư̆ kơ tuê Dhŭng Korea čuă dlăng, mdei msăn”.

Bi Trần Hải Linh, khua êpul hgŭm phung mnia mblei leh anăn duh bi liê Việt Nam – Dhŭñg Korea (VKBIA) lač, bruă mkŏ dhar kreh hŏng hiu čhưn ênguê plah wah Lâm Đồng leh anăn dŭm ƀĭng hgŭm amâo djŏ knŏng mđĭ kyar bruă duh mkra, ƀiadah lŏ hyuă kjăp klei bi hgŭm, klei bi mguôp suia plah wah mnuih ƀuôn sang dua lăn čar.

"Wưng kơ anăp, Lâm Đồng srăng bi mŭt 3 čar, dưi lač anei jing sa hlăm dŭm knhuang đru kơ Lâm Đồng bi mguôp leh anăn mđĭ kyar hŏng dŭm ƀĭng hgŭm Dhŭng Korea. Boh nik hlăm dua mta bruă kñăm hiu čhưn ênguê leh anăn mnia mblei. Ară anei, mâo 35 knơ̆ng bruă hlăm bruă hiu čhưn ênguê mâo hmei ba hlăm hdră mjĕ mjuk, mta kñăm jing si srăng ngă čiăng ngă bruă hiu čhưn ênguê ti Lâm Đồng đĭ kyar ktang hĭn”.

Wưng anei, pô bi ala dŭm anôk bruă Dhŭng Korea leh anăn Việt Nam bi klă lu hră bi hdơr, pŏk klei găl bi mguôp kơ dŭm mta bruă duh bi liê msĕ si hiu čhưn ênguê mdei msăn, bruă lŏ hma doh, bruă mkram jing mtah leh anăn logistics hiu čhưn ênguê…Dŭm knơ̆ng bruă Dhŭng Korea hmăng hmưi lŏ dơ̆ng đru jih hnơ̆ng hdră êlan, bruă mkŏ mkra, ai dưi leh anăn wăl duh bi liê. VKBIA ƀuăn ngă bruă klam kdrông mkŏ, bi mguôp mtrŭt mđĭ klei mnia mblei, dhar kreh leh anăn hiu čhưn ênguê grăp tuôr, ba Lâm Đồng jing anôk bruă mkŏ Việt Nam – Dhŭng Korea./.