Klei mkŏ mjing ti alŭ wăl knhuah gru pô jhŏng ktang Núp lehanăn wăl tač Đại Đoàn Kết, ƀuôn prŏng Pleiku – sa anôk jăk pioh bi lar klei tŭ dưn kphê ti Gia Lai.  40 phung duh mkra lehanăn mnuih pla kphê hlăk mâo leh knưng mnơ̆ng pô pioh čhĭ, kñăm mđĭ klei tŭ dưn kphê ti Gia Lai. Nguyễn Thị Nga, K’iăng khua Êpul bruă hgŭm bruă lŏ hma mnia mblei Nam Yang, lač:

 “Mơ̆ng bruă mkŏ mjing tal anei. Drei čang hmăng mâo hưn mdah kơ kphê Đăk Yang lehanăn kphê hlăm čar Gia Lai dưi truh hŏng phung blei mnia hlăm ala čar, lehanăn hŏng ala tač êngao, ba kphê Gia Lai čhuang nao hlăm sa knhuang mrâo, jing kphê jăk”.

Hŏng mta kñăm mđĭ boh tŭ kphê hlăm čar, Gia Lai Coffee Festival mđing ngă hlăm dŭm mta bruă msĕ si: Lông djiêl mta kphê jăk, hrŏng ruah mta kphê jăk, mdah klei đeh mkra kphê, bi lông mkra kphê, lehanăn ngă bruă bi hgŭm mkŏ klei mnia mblei…  Nguyễn Thị Thanh Tâm, Khua êpul mkŏ mjing, lač:

 “Gia Lai Coffee Festival jing bruă hlăm yang ƀuôn, lehanăn jih jang bruă ngă anei srăng tui si concept jing mơ̆ng đang kphê hlŏng truh kơ kčŏk kphê. Čang hmăng kơ krĭng pla kphê mđĭ hnơ̆ng jăk kphê Gia Lai đĭ lu hĭn, lehanăn dưi bi lar truh hŏng dŭm gŏ sang pla kphê knư̆ hrue knư̆ mâo klei thâo mđĭ bruă kphê pô jing kphê tŭ lehanăn đĭ kyar kjăp”.

Leh gưl tal êlâo mkŏ mjing hlăm klei tŭ jing thŭn 2023, thŭn anei Gia Lai Coffee Festival mâo ngă hlăm lu mta bruă hĭn; jing anôk kơ mnuih yua kphê tui duah klei thâo săng kơ kphê, lehanăn kơ dŭm bruă djŏ tuôm hŏng kphê hlăm čar… Tui si Nguyễn Văn Hòa, Khua bi ala adŭ bruă Lab hlăm knơ̆ng bruă ksiêm duah kơ kphê tar rŏng lăn ti Việt Nam, klei anei hlăk hlê lŏ dơ̆ng mbŏ bi ênŭm, ba klei jăk kơ mnuih pla kphê ti Gia Lai anăp đuĕ nao hŏng lu mta jăk, lehanăn bi lar lu.

 “Ară anei, kâo hlăk dôk klam bruă kăp djiêl, lehanăn mkă hnơ̆ng jăk kphê hĭn mơ̆ng êbeh 48 mta kphê mâo hlăm čar Gia Lai pioh hrŏng ruah dŭm mta pioh mjing mnơ̆ng bi hmô kơ thŭn tinăp, srăng mkŏ mjing klei bi lông kphê jăk čar Gia Lai. Si srăng ngă dưi mâo klei mđĭ ai, lehanăn klei gĭr hĭn hŏng ai tiê mda asei, hlăm klei khăp, klei hur har pioh mđĭ kyar bruă kphê ti Gia Lai”