Hruê 7/5, ti Hải phòng, Êpul kahan êa mkŏ mjing Bi hdơr 70 thŭn Hruê mkŏ mjing êpul kahan êa yang ƀuôn Việt Nam (7/5/1955 - 7/5/2025) leh anăn mă mêdai Hồ Chí Minh. Khua lăn čar Lương Cường, Khua Êpul gơ̆ng răng mgang klei êđăp ênang ala čar, Khua gĭt gai Êpul lĭng kahan yang ƀuôn nao leh anăn mđup brei Mêđai Hồ Chí Minh kơ Êpul kahan êa.

Mđup brei medai Hồ Chí Minh, mnơ̆ng yuôm bhăn mơ̆ng Đảng, Knŭk kna kơ Êpul kahan êa leh anăn blŭ hrăm hlăm klei bi kƀĭn, bi ala kơ Khua gĭt gai Đảng, Knŭk kna, Khua lăn čar Lương Cường hơ̆k mơak, bi mni kơ boh tŭ leh anăn klei đru muôp prŏng prĭn mơ̆ng Êpul kahan êa yang ƀuôn Việt Nam hlăm bruă krŭ kdơ̆ng drưh kơăm mơ̆ng Đảng, mơ̆ng djuê ana hlăm 70 thŭn êgao. Khua lăn čar lač klă, hlăm dŭm thŭn kơ anăp, boh klei dlông rŏng lăn, krĭng wăl êđăp ênang, bi hgŭm ăt jing klei phŭn; ƀiădah dleh ktuê dlăng, đăo knăl, klei bi ktưn plah wah dŭm ala čar prŏng, dŭm anôk bruă mâo klei dưi ktang snăk. Khua lăn čar mñă klă, êa ksĭ, plao ksĭ mâo bruă klam yuôm bhăn snăk kơ bruă răng mgang klei êđăp ênang. Răng mgang kluôm klei dưi hlăm êa ksĭ, plao ksĭ čar kwar jing klei mĭn, klei čang hmăng, bruă klam mơ̆ng kluôm Đảng, jih jang mnuih ƀuôn sang, lĭng kahan, hlăm anăn mâo kahan êa yang ƀuôn Việt Nam jing êpul kmeh gơ̆ng./.