Ti anôk mă bruă, bi ala khua kiă kriê 3 čar Lâm Đồng, Bình Thuận lehanăn Dak Nông hưn mthâo leh bruă hluê ngă hdră mtrŭn bi mguôp 3 čar, hdră mkŏ dăp anôk bruă knŭk kna thơ̆ng kơ bruă, bi mŭt gưl să lehanăn mkŏ mjing gru hmô mkŏ mjing anôk bruă knŭk kna alŭ wăl 2 gưl; hưn mdah hdră bi hgŭm ngă bruă ksiêm dlăng, čih mkra hră mơar Klei bi kƀĭn bruă Đảng čar Lâm Đồng mrâo, hră mơar Klei bi kƀĭn bruă Đảng gưl nah gŭ.

Leh mâo hdră mtrŭn bi mŭt 3 čar, mnuih ƀuôn sang ti Lâm Đồng ăt bi êdah klei mđing dlăng kơ bruă găn êrô, mkŏ dăp anôk dôk kơ phung knuă druh mơ̆ng dua čar Dak Nông lehanăn Bình Thuận srăng nao mă bruă ti ƀuôn prŏng Đà Lạt. fHồ Trung Hiếu, ti ƀuôn hgŭm 4, ƀuôn prŏng Đà Lạt brei thâo:

 “Kâo mđing mĭn êdi hlăk giăm 2.000 čô ayŏng adei, knuă druh mơ̆ng dua čar Dak Nông lehanăn Bình Thuận srăng hriê tinei, bruă mkŏ dăp, msir mghaih klei čiăng mơ̆ng ayŏng adei anei si srăng ngă. Kyua tơdah ayŏng adei hriê tinei, klei găn êrô srăng dleh dlan, klei čiăng dôk ti Đà Lạt, tơdah hlăm wưng sui srăng mđĭ klei čiăng kơ anôk dôk. Kâo čang hmăng Lâm Đồng srăng mâo hdră msir mghaih jih klei anei”.

Ti anăp klei mđing dlăng, mđing uêñ mơ̆ng mnuih ƀuôn sang kơ bruă găn êrô, anôk dôk kơ phung knuă druh leh bi mŭt mbĭt, Nguyễn Ngọc Phúc, Kơiăng khua Anôk bruă sang čư̆ êa čar Lâm Đồng brei thâo, alŭ wăl mâo leh hdră msir mghaih kơ bruă anei.

 “Hmei brei nao ksiêm dlăng leh 10 anôk bruă čiăng phung knuă druh mơ̆ng čar hriê dôk mă bruă. Tinei, sang dôk mơ̆ng knŭk kna ăt dôk ksiêm tĭng, čiăng rơ̆ng kơ jih jang ayŏng adei mâo anôk dôk hơĭt kjăp. Kdrăp găn êrô, hmei đăo tĭng tơdah êdeh 50 mdhô̆ snăn čar Dak Nông čiăng hlăm brô 10 boh êdeh sa blư̆, srăng nao hlăm knăm kjuh amâo dah aguah ưm knăm sa čiăng kơ ayŏng adei mă bruă, Bình Thuận ăt čiăng hlăm brô dua pluh boh mơh. Hmei akâo kơ Knŭk kna brei mâo klei bhiăn mrâo, hdră đru prăk kăk kơ knuă druh anei nao ngă bruă”.

Kơiăng khua knŭk kna Nguyễn Hòa Bình bi mni klei sa ai mơ̆ng 3 čar hlăm hdră kiă kriê, bi hgŭm hluê ngă hdră bi mŭt mbĭt, mkŏ dăp anôk bruă, mprăp jăk mta phŭn kơ Klei bi kƀĭn bruă Đảng dŭm gưl. Mbĭt anăn mtă, dŭm alŭ wăl brei mđĭ lar ai tiê hgŭm mguôp hluê ngă bruă klam mbĭt, boh nik hlăm bruă čih mkra hră mơar Klei bi kƀĭn, mkŏ dăp mnuih mă bruă kơ dŭm êpul, anôk bruă; gĭt gai hluê ngă tŭ dưn bruă klam mđĭ kyar hdră duh mkra ala ƀuôn. Boh nik, čar Lâm Đồng brei ngă jăk hdră kđi čar, klei mĭn hlăm phung knuă druh, đảng viên, mkŏ dăp mnuih mă bruă bi knar, rơ̆ng hnơ̆ng čuăn, boh tŭ dưn mbĭt.

 “Brei ngă jăk hdră mđĭ ai, hdră kđi čar klei mĭn mơ̆ng jih knơ̆ng, dhar bruă, dŭm să, kdriêk leh bi mŭt mbĭt. Ară anei, hluê ngă klei kah mbha bruă mơ̆ng Đảng, ya bruă brei ngă drei ngă, amâo duah mĭn bruă anei ngă, bruă adih amâo ngă. Kâo mtă kơ drei brei hluê ngă kjăp mta kñăm, hnơ̆ng čuăn, klei găl, rơ̆ng klei kpă mngač hlăm bruă msir mghaih. Kơ mdê bi pô, brei mâo klei duh myơr, săn asei”.

Kơ hdră mkŏ dăp mnuih mă bruă, Kơiăng khua knŭk kna Nguyễn Hòa Bình mñă: Anei jing bruă klam mjêč, dŭm alŭ wăl brei rơ̆ng hluê ngă kjăp dŭm klei kčah mtrŭn mơ̆ng Đảng lehanăn Knŭk kna čiăng ngă djŏ, rơ̆ng klei kpă mngač. Brei mdưm hnơ̆ng čuăn kơ phung knuă druh jing mrô sa, rơ̆ng hnơ̆ng čuăn, kơhưm lehanăn klei bi knar dŭm alŭ wăl, mđing kơ bruă mkŏ dăp knuă druh phŭn ti gưl să, mkăp djŏ hŏng bruă klam mrâo. 

Bruă bi mguôp mbĭt 3 čar Lâm Đồng, Dak Nông lehanăn Bình Thuận amâo djŏ jing hdră êlan prŏng kñăm bi khuăt anôk bruă, mđĭ boh tŭ dưn hdră kriê dlăng ƀiădah lŏ jing knhuang nao yuôm bhăn mđing truh kơ hdră mđĭ kyar hơĭt kjăp ti krĭng Dhŭng Lăn dap kngư lehanăn ktuê hang ksĭ Dhŭng kwar krah. Dŭm klei mđing mĭn mơ̆ng mnuih ƀuôn sang lehanăn knuă druh klei kơ anôk dôk, găn êrô, ăt msĕ mơh hdră mkŏ mjing, mnuih mă bruă mâo leh phung khua alŭ wăl lehanăn Knŭk kna mđing hmư̆, gĭt gai. Hŏng klei sa ai, klei gĭr lehanăn ai tiê bi hgŭm mguôp, 3 alŭ wăl dôk mprăp čiăng mđing truh kơ bruă mkŏ mjing sa gru hmô anôk bruă mrâo, tŭ dưn, hơĭt kjăp, mkăp djŏ hŏng klei čiăng đĭ kyar hlăm wưng mrâo./.