Tlam 4/5 ti ƀuôn prŏng Cần Thơ, Khua gĭt gai Đảng Tô Lâm gĭt gai mmông mă  bruă hŏng Anôk dlăng bruă Đảng ƀuôn prŏng Cần Thơ leh anăn Anôk dlăng bruă Đảng čar Sóc Trăng leh anăn Hậu Giang kơ boh klei hlue ngă dŭm hdră mtrŭn, klei klah čŭn mơ̆ng Gưl dlông; bruă bi mŭt anôk bruă knŭk kna gưl čar leh anăn mkŏ mjing bruă Đảng ƀuôn prŏng Cần Thơ leh bi mŭt hlue si Hdră mtrŭn 60 mơ̆ng Gưl dlông ti 3 alŭ wăl.

Khua gĭt gai Đảng bi mklă, bruă bi mŭt 3 aluŭ wăl jing ƀuôn prŏng Cần Thơ mrâo srăng mjing klei găl hlue ngă klei bi hgŭm kjăp kơ wăl bruă duh mkra, dhar kreh, ala ƀuôn, bi khuăt êpul mă bruă, mđĭ boh tŭ dưn ngă bruă kriê dlăng knŭk kna, mđĭ lar klei găl hlue si hnơ̆ng leh anăn bi mguôp klei găl mơ̆ng grăp alŭ wăl. Thŭn 2025 jing thŭn yuôm bhăn snăk, wưng bi leh hdră bi mŭt gưl čar, jing thŭn mkŏ mjing Klei bi kƀĭn dŭm gưl truh kơ klei bi kƀĭn Đảng tal XIV, Khua gĭt gai Đảng mtă, kƀĭn pioh wưng kơ bruă mprăp leh anăn mkŏ mjing tŭ jing kơ Klei bi kƀĭn bruă Đảng dŭm gưl, hlăm anăn bruă mkŏ mjing hră mơar klei bi kƀĭn, brei dưi ngă bi jăk, klă klơ̆ng leh anăn kreh knhâo, păn kjăp Asăp mtrŭn mrô 45 mơ̆ng Phŭn bruă kđi čar.