Mmăt mbruê (19/06), ti Anôk bruă Knŭk kna, Khua knŭk kna Phạm Minh Chính bi tuôm hŏng phung khua gĭt gai dŭm anôk bruă klei mrâo ƀri gưl bi hdơr 100 thŭn Hruê hră klei mrâo Cách mạng Việt Nam (21/06). Ti anôk bi tuôm, Khua knŭk kna čang hmăng phung ngă bruă klei mrâo mđĭ lar knhuah gru 100 thŭn hră klei mrâo cách mạng Việt Nam, hŏng “ai tiê mngač, klei mĭn êngeh,  klei čih êlam” lŏ dơ̆ng đru mguôp kơ klei đĭ kyar mơ̆ng lăn čar, mơ̆ng djuê ana leh anăn mnuih ƀuôn sang.

Khua knŭk kna mtă kơ Phŭn bruă dhar kreh mjuăt asei mlei hiu čhưn ênguê hlăm 1 mlan mkŏ mjing Hdră mtrŭn kčah klă klơ̆ng kơ bruă kčah klei čih, boh phŭn, klei bhiăn tĭng tla… kơ hră klei mrâo. Djŏ tuôm kơ anôk bruă nah gŭ kdrăp mrâo hâo hưn, Khua knŭk kna jao kơ Phŭn bruă kreh knhâo leh anăn kdrăp mrâo mkŏ mjing Hdră bhiăn, hdră msir djŏ guôp mơ̆ng tur knơ̆ng bi kna klei tŭ dưn 3 phung ngă bruă knŭk kna, internet, čih klei mrâo. Rơ̆ng kơ 3 tĭng mâo klei tŭ dưn. Khua knŭk kna mtă hnưm mâo Hdră mtrŭn kơ klei hưn mdah hlăm hră klei mrâo, lŏ dơ̆ng msir mgaih bruă adôk mâo hlăm wưng êgao. Khua knŭk kna ăt mtă,  Phŭn bruă ngăn prăk ksiêm dlăng mđĭ ênoh hrui wĭt kơ bruă klei mrâo.