Hlăm gưl nao čhưn ti Senegal, Khua bruă kƀĭn ala Trần Thanh Mẫn bi tuôm leh hŏng Khua mil čhil Senegal Bassirou Diomaye Faye ti sang Khua mil čhil.

Khua Bruă Kƀĭn Ala mñă klă Việt Nam dlăng yuôm klei mđĭ kyar klei bi mguôp lu mta bruă hŏng Senegal, boh nik hlăm bruă duh mkra, mnia mblei, duh bi liê, bruă lŏ hma, dăng kông leh anăn klei kreh knhâo mrâo mrang.

Khua Bruă Kƀĭn Ala brei thâo, lu êpul grŭp prŏng mơ̆ng Việt Nam dôk duah klei găl duh bi liê ti Senegal. Čiăng đru tŭ dưn hlăm klei bi mguôp, khua Bruă Kƀĭn Ala mñă kơ dua tĭng hnưm bi kluôm hdră bhiăn, ti anăp jing mtrŭt bi pral dŭm klei kuôl kă tur knơ̆ng msĕ si Klei kuôl kă rơ̆ng kơ klei duh bi liê leh anăn ñĕ kơ klei čoh prăk jia dua blư̆, mkŏ mjing hdră bhiăn hơĭt kơ knơ̆ng bruă dua ala čar.