Mbĭt hŏng êpul mă rup leh anăn ksiêm dlăng klei siam ti Gành Đá Đĩa,, ƀuôn hgŭm Tuy An, čar Dak Lak, amai Đào Thị Hiền, sa čô tuê mơ̆ng ƀuôn prŏng Hà Nội bi kngăr êdi ti anăp klei siam čư̆ dliê mkŏ mjing. Amai Hiền brei thâo, phung amai ruah Dak Lak jing sa anôk hiu čhưn ênguê čiăng nao dlăng dliê kmrơ̆ng leh anăn ktuê dlăng knhuah mrâo mơ̆ng sa čar mrâo bi mbĭt êjai mâo êa ksĭ leh anăn mâo dliê.

 “Gưl tal êlâo hmei hriê ti čar Dak Lak, dưi dlăng êa ksĭ mơ̆ng Dak lak, dlăng kơ Gành Đá Đĩa, mă rup tinei jing siam êdi. Hmei ăt mĭn tĭng leh nao ti Phú yên srăng lŏ nao čuă dlăng Ƀuôn Đon čiăng bi kluôm klei thâo ƀuh kơ êa ksĭ kơ dliê. Srăng lač ară anei hriê Dak Lak dưi hiu čhưn ênguê leh anăn dlăng ti Êa ksĭ. Ka klei mkăn tinei jing kan hdang doh êbăt leh anăn djŏ ênoh”.

Mơ̆ng knŭk kna mâo hdră êlan bi mŭt mbĭt, bi mŭt 2 čar, bruă hiu čhưn ênguê Dak Lak – Phú Yên mâo lu klei mlih jăk. Ênoh phung tuê đĭ lu hĭn mkă hŏng êlâo. Boh nik amâo djŏ knŏng phung tuê mơ̆ng dŭm čar mkăn ƀiădah wăt phung tuê êrô êbat plah wah 2 čar krĭng Ngŏ – Yŭ Dak Lak ăt đĭ lu hŏng dŭm tuor leh anăn êpul gŏ sang. Amai Nguyễn Thị Điểm, pô drông tuê ti Rosa Alba Resort Tuy Hòa, Dak Lak brei thâo:

 “Kâo ƀuh giăm anei êjai bi mŭt mbĭt dŭm čar bruă hiu čhưn êngiê mtluk mtlak hĭn, phung tuê lu êdi. Ti Rosa hmei mâo hlăm djăp krĭng kwar, ƀiădah giăm anei ƀuh mơ̆ng Yu Dak Lak jing lu êdi. Kâo hmăng hmưi bruă hiu čhưn ênguê msĕ sơnei phung tuê srăng hriê lu hĭn”.

Găl guôp hŏng klei bi mŭt mbĭt, dŭm anôk bruă hiu čhưn ênguê dưi ba yua dŭm klei găl êa ksĭ – dliê. Msĕ si sang huă mnăm Đăk Phú, ƀuôn hgŭm Tuy Hoà, anăn dưi čih mơ̆ng dua čar Dak Lak leh anăn Phú Yên, ayŏng Trương Tấn Tài, pô kiă sang huă mnăm brei thâo, anôk bruă amâo djŏ knŏng mkŏ êa ksĭ – dliê ƀiădah mnơ̆ng ƀơ̆ng huă ăt mâo klei mlih.

 “Hmei phŭn pŏk mơ̆ng hruê 1/6 mơ̆ng mlan 5 phung tŭk knă nao leh ti dak Lak ksiêm dlăng grăp sang huă mnăm, mnâo mnañ, dhar kreh ti krĭng Dak Lak čiăng ba wĭr tinei dŭm mta mnơ̆ng ƀơ̆ng jiă kma knhuah gru dhar kreh msĕ si mnŭ ăm, êsei brông, trŏng tlê…Dưi ba čhĭ lu, phung tuê sa ai êjai hriê tinei dưi ƀơ̆ng mnơ̆ng ƀơ̆ng krĭng dlông mơ̆ng Dak Lak leh anăn kan hdang mơ̆ng êa ksĭ”.

Leh bi mŭt mbĭt, nah yŭ Dak Lak êdah êdi hŏng bruă hiu čhưn ênguê wăl mnơ̆ng hdĭp, dliê, bruă hiu čhưn ênguê yang ƀuôn, čĭng čhar, mnơ̆ng ƀơ̆ng Lăn Dap Kngư. Bi ti krĭng Ngŏ mâo klei găl kơ bruă hiu čhưn ênguê êa ksĭ, dŭm mta kan hdang. Dŭm klei yăl dliê kơ pô djiê êngiă Nam Tiến ti Ƀuôn Ama Thuôt dưi yăl dliê kơ krĭng Vũng Rô leh anăn dŭm boh kŭm păn amâo mâo mrô, dŭm kdrŭn găn krông Sêrêpôč leh anăn klei mblah dưi Ƀuôn Ama Thuôt. Ngô Văn Định, k’iăng khua êpul hgŭm bruă hiu čhưn ênguê Dak Lak lač, dŭm klei êdah êdi mơ̆ng 2 čar hđăp êjai bi mŭt mbĭt jing klei găl kơ 2 krĭng Ngŏ Yŭ đĭ kyar jăk hĭn.

 “Hmei srăng bi mbŏ dŭm klei êlâo dih jing klei kƀah mơ̆ng dua čar čiăng mkŏ mjing mnơ̆ng dhơ̆ng čiăng kơ dua alŭ wăl mâo čiăng đru kơ phung tuê. Tal 2 jing pŏk mlar, mđĭ hnơ̆ng tač êdeh phiơr Tuy Hoà jing tač êdeh phiơr Prŏng čiăng drông phung tuiê hriê ti Tuy Hoà leh anăn nao ti Dak Lak. Tal 3 jing mkŏ mjing êpul mnuih mă bruă đru kơ bruă hiu čhưn ênguê Dak Lak mrâo, dhar kreh srăng ñŭ kma, klei ngă bruă srăng đĭ hĭn”.

Klei bi mŭt mbĭt mkŏ mjing kơ bruă hiu čhưn ênguê Dak Lak klei găl mkŏ wĭt leh anăn êlan đĭ kyar mrâo. Klei bi mguôp plah wah dŭm mta mnơ̆ng hiu čhưn ênguê phŭn mbĭt hŏng bruă mđĭ hnơ̆ng bruă mkŏ mkra leh anăn mtô mjuăt mnuih mă bruă hnơ̆ng tŭ jăk dưi hmăng hmưi đru mtrŭt mđĭ bruă hiu čhưn ênguê đĭ kyar ktang hlăm wưng kơ anăp.