Thŭn 1982, êkei êdam Nguyễn Đăng Khoa nao mŭt hlăm êpul kahan 14,Trung đoàn 95, Sư đoàn 307, nao hlăm klei bi blah ti kdrăn mblah Campuchia ti čar Preah Vihear, bi knông hŏng Thailand. Êbeh 40 thŭn êgao, ñu dôk hdơr nanao dŭm klei bi blah, dŭm čô dĭng kan êbuh leh.

Hlăm ênuk hdĭp êđăp ênang, dŭm klei dôk hdơr leh anăn klei truăn mĭn kơ phung dĭng kna dôk đih ti anôk bi blah mtrŭt mjhar lĭng kahan hđăp Nguyễn Đăng Khoa. Thŭn 2002, ñu kčưm ngă hdră tui duah klang lĭng kahan djiê êngiă. Bi mlih lu kyua klei ngă hma, anôk dôk leh anăn lu bruă mkŏ mkra. Ƀiădah kyua klei gĭr mơ̆ng ñu, lu anôk bi kƀĭn lu klang lĭng kahan djiê êngiă dưi bi klă msĕ Dúi Dù, gò Me, leh anăn boh nik dưi ƀuh klang 5 čô lĭng kahan hlăm Sư đoàn 968 ba wĭt dơr ti čar Bình Phước hđăp.

Nguyễn Đăng Khoa brei thâo, hdră bruă ñu amâo djŏ knŏng dưi ktrâo atăt hŏng klei khăp dĭng kna, klei wĭt hdơr ênuk bi blah ƀiădah wăt hlăm klei êpei. Bruă tui duah lĭng kahan Trương Công Thanh hlăm thŭn 2013, ñu kreh êpei ƀuh kơ dĭng kna leh anăn mâo klei mtrŭt mdê mdô. Ñu nao duah ti Adŭ bruă mnuih mă bruă – kahan êka leh anăn yang ƀuôn kdriêk Tây Sơn, čar Bình Định hđăp čiăng êmuh kơ klei hưn leh anăn mâo arăng brei hră mơar kơ sa čô lĭng kahan mâo anăn Thanh, hŏng dŭm klei čih amâo mâo klă. Ƀiădah, hŏng klei đăo knang phĭt, ñu ksiêm dlăng mơ̆ng dŭm mta điêt, dlăng hră anăn phung lĭng kahan hlăm Trung đoàn 94 hlăm wưng anăn, leh anăn dưi ƀuh adei êkei mơ̆ng lĭng kahan čiăng êmuh kơ klei nao kahan, mmông djiê. Dŭm mta anăn ƀrư̆ hruê ƀrư̆ djŏ leh anăn ñu dưi duah ƀuh dĭng kna pô.

Yăl dliê kơ bruă pô mă leh anăn dôk mă, lĭng kahan hđăp Nguyễn Đăng Khoa brei thâo:

 “Bruă anăn mtrŭt kâo srăng ngă, kăn mâo pô mgô̆ lei, mă mơ̆ng ai tiê pô. Kâo ngă bruă anăn ƀuh jăk êdi, ƀuh klei hơ̆k wăt hlăm mđiă amâodah hjan, grăp mnĭt mmông mâo klei hưn kâo amâo thâo dôk kơ sang ôh. Kâo nao mtrŭt mjhar phung ayŏng adei hlăm êpul. Mtrŭt mjhar gŏ sang anôk huă ƀơ̆ng mdei msăn kơ găp djuê, drông dŭm êpul nao duah msat lĭng kahan mơ̆ng kbưi ka mâo anôk dôk, kyua tinei ka mâo sang jưh”.

Bruă ngă mơ̆ng Nguyễn Đăng Khoa  amâo djŏ knŏng jing bruă klam ƀiădah lŏ jing bi lar klei thâo khăo, klei hdơr knga. Đặng Quang Dũng, pô hrăm mbĭt hŏng ñu hlăm 20 thŭn brei thâo:

 “Nguyễn Đăng Khoa mơ̆ng ngă kahan wĭt kơ sang bi mguôp hŏng anôk bruă lĭng kahan kdriêk êlâo dih leh anăn să čiăng duah klang ba wĭt kơ msat lĭng kahan djiê êngiă. Gŏ sang, găp djuê mơ̆ng kbưi ăt kreh duah ñu čiăng bi mguôp duah klang lĭng kahan”

Hlăm êbeh 20 thŭn, Nguyễn Đăng Khoa duh myơr leh lu bruă tui duah klei hưn leh anăn klang phung dĭng kna. Dŭm klei đru mguôp mơ̆ng ñu mâo leh Đảng hŏng knŭk kna čih yap. Thŭn 2019, ñu mâo Khua lăn čar mđup brei mêđai tŭ dưi mrô 3 kyua dŭm klei đru mguôp hlăm klei kdơ̆ng mblah, đru hlăm bruă krŭ kdơ̆ng Campuchia. Giăm anei hĭn, thŭn 2023, ñu lŏ mâo hră pah mni mơ̆ng Khua phŭn bruă lĭng kahan kyua boh tŭ dưn êdah êdi hlăm bruă bi mguôp tui duah, bi kƀĭn leh anăn bi klă hlei pô lĭng kahan djiê êngiă wưng thŭn 2017 – 2022.

Hlue si Trần Thị Ngọc Mai,  K’iăng Khua Knơ̆ng bruă Sang čư̆ êa să Bình Khê, čar Gia Lai, kahan hđăp Nguyễn Đăng Khoa amâo djŏ knŏng jing mnuih mâo ai hŏng lăn čar ôh, jing mnuih ƀuôn sang bi hmô, ƀiădah lŏ jing phung nao êlâo năng mpŭ kơ phung knuă druh ti alŭ wăl.

 “Amiêt Khoa jing gru mngač kơ phung mda asei tui hlue, bruă ñu mă bi êdah ai tiê leh anăn bruă klam hŏng phung ƀĭng kahan pô, ai tiê ƀĭng kahan yuôm bhăn snăk. Mơ̆ng bruă anei lar bra ai tiê klei khăp leh anăn bruă klam hŏng êpul êya, ai tiê hdơr knga hŏng phung jhŏng ktang êngiă asei djiê leh kơ klei êngiê djuê ana. Hmei ƀuh myun snăk leh anăn mpŭ kơ klei êđăp ênang, klei êngiê drei dưi dưn hruê anei, leh anăn drei mâo bruă klam hdĭp leh anăn mă bruă čiăng năng hŏng klei phung nao êlâo săn leh asei.”

 Hdră bruă 20 thŭn hiu duah ƀĭng kahan mơ̆ng kahan hđăp Nguyễn Đăng Khoa jing klei bi êdah jăk kơ klei ƀuăn phung kahan, ƀĭng kahan amâo wơr ôh hlue hruê mlan. Ñu ngă leh, leh anăn dôk kuč mngač ai tiê hdơr knga, čiăng kơ phung êdah êdi mơ̆ng djuê ana, wăt tơdah ti anôk djiê, ăt srăng dưi wĭt hŏng ƀuôn sang./.