Grăp hruê, Lang Thị Yến Vy, hđeh adŭ 7, Sang hră gưl 2 Nguyễn Thị Định, să knông lăn Ia Rvê, čar Dak Lak găn êbeh 10 km čiăng nao sang hră. Dưi thâo, ti sang hră pô hriăm srăng dưi rŭ mdơ̆ng prŏng siam hĭn lehanăn yuôm bhăn dưi hlŏng dôk ti sang hră mtam, Yến Vy hŏk kdơ̆k brei thâo:

“Dŏng mŏng sang kâo truh ti sang hră hlăm brô 10 km. Hlăm yan hjan êlan êa čhông, êngăp êa lu lehanăn kâo kreh nao êlan diêr kbưi hĭn mŏng 14 – 15 km. Adiê mđiă êlan ƀhŭl mtŭk mtŭl êmăn êdi, ưĭt truh ti sang amao lŏ čiăng huă ƀơ̆ng. Dưi thâo sang hră srăng dưi mdơ̆ng mrâo kâo mơak êdi. Čang hmăng hnưm mao sang hră mrâo čiăng kơ phung hđeh hmei mâo klei găl hriăm hră jăk hĭn”.

Klei yăl dliê mŏng Yến Vy ăt jing klei dôk mđing uêñ mŏng dŭm êtuh čô hđeh hriăm hră lehanăn phung amĭ ama ti krĭng knông lăn Dak Lak hlăm lu thŭn êgao: Hdră duh mkra dleh dlan, bruă hriăm yuôm hŏng lu klei gun kpăk. Mơ̆ng dŭm klei anei, hdră mtrŭn duh bi liê rŭ mdơ̆ng Sang hră knŭk kna čiêm rông phung hđeh mnuih djuê ƀiă mlir gưl sa – gưl dua ti dŭm să knông lăn dưi pŏk ngă, pŏk sa klei čang hmăng mrâo kơ hdră “Mjuăt bi hriăm mnuih” ti krĭng knông lăn Dak Lak.

Hluê si hdră kčah wưng thŭn 2025 – 2030, čar srăng rŭ mdơ̆ng 5 boh Sang hră knŭk kna čiêm rông phung hđeh mnuih djuê ƀiă mlir gưl sa – gưl dua ti 4 să knông lăn lehanăn 1 să siă knông krĭng knông lăn. Dŭm sang hră dưi duh adŭ hriăm, anôk dôk, sang huă ƀơ̆ng, krĭng mjuăt ktang asei mlei, adŭ hriăm tin học, kdrăp êa doh lehanăn dŭm hdră nah tluôn mkăn, rơ̆ng kơ phung hđeh dưi hriăm, dôk dơ̆ng ƀơ̆ng huă hŏng klei jăk găl

 Nguyễn Văn Hoa, Khua anôk bruă sang čư̆ êa să Ia Rvê, čar Dak Lak brei thâo, anei klă sĭt jing klei mơak prŏng hŏng bruă knŭk kna alŭ wăl lehanăn mnuih ƀuôn sang krĭng knông lăn. Mnuih ƀuôn sang dŭm djuê ana hlăm să sa ai, mjing djăp klei găl čiăng hnưm dưi bi leh hdră anei. 

“Anei jing sa bruă yuôm bhăn čiăng kơ phung hđeh dôk dơ̆ng ƀơ̆ng huă tinei mtam, mnuih ƀuôn sang dŭm djuê ana mđing dlăng lehanăn sa ai čiăng kơ phung čô anak dưi nao sang hră jăk găl.

          Trương Công Thái, kơiăng khua knơ̆ng bruă sang čư̆ êa čar Dak Lak brei thâo, hlăm ênoh 5 boh Sang hră mlir gưl krĭng knông lăn dưi rŭ mdơ̆ng ti čar, mâo 4 boh sang hră dưi duh bi liê hŏng ngăn prăk Gưl dlông, 1 sang hră dưi ba yua phŭn prăk mơ̆ng Phŭn bruă Lĭng kahan hŏng ênoh duh bi liê hlăm brô 630 êklai prăk. Grăp sang hră mkăp djŏ hŏng klei čiăng hriăm kơ hlăm brô 1.000 – 1.200 čô hđeh. Anei jing dŭm hdră bruă mâo boh tŭ yuôm bhăn hlăm ala ƀuôn lehanăn bruă kđi čar, amâo djŏ knŏng mkăp kơ bruă mjuăt bi hriăm ƀiădah lŏ siă suôr hŏng hdră êlan đru kơ ala ƀuôn, bi hơĭt krĭng mnuih ƀuôn sang dôk, rơ̆ng hdră lĭng kahan – răng mgang klei êđăp ênang krĭng knông lăn. Kyua anăn, dŭm knơ̆ng, dhar bruă, alŭ wăl mđing bi hgŭm kjăp hlăm bruă pŏk ngă bruă rơ̆ng kjăp klei kčah mtrŭn, hnơ̆ng tŭ jăk.

Mđing bi hgŭm hlăm bruă mkŏ mjing mơ̆ng hdră rơ̆ng klei bi knar, mtăp mđơr truh kơ anộk bruă mphŭn rŭ mdơ̆ng dŭm hdră bruă wăt bruă ksiêm dlăng hlăm klei hluê ngă brei rơ̆ng djŏ hdră kčah mtrŭn”.

Hluê si Lê Thị Thanh Xuân, Khua knơ̆ng bruă Sang hră mơar mtô bi hriăm čar Dak Lak, gru hmô Sang hră knŭk kna čiêm rông phung hđeh mnuih djuê ƀiă mlir gưl amâo djŏ knŏng mkăp kơ krĭng knông lăn dleh dlan. Anôk bruă mtô bi hriăm lehanăn dŭm alŭ wăl hlăm čar srăng ksiêm dlăng gru hmô anei čiăng mđĭ lar hlăm wưng ti anăp. Knơ̆ng bruă srăng đru kčĕ hŏng Knơ̆ng bruă Sang čư̆ êa čar mkŏ mkra hdră mđĭ kyar bruă Sang hră mlir gưl, mjing klei găl kơ phung hđeh dưi hriăm mơ̆ng gưl điêt hlŏng truh kơ gưl tlâo.

Hluê gru hmô anei dŭm alŭ wăl srăng mâo hdră kčah čiăng mđĭ lar dŭm gru hmô mđĭ kyar dŭm gưl hriăm prŏng hĭn čiăng kơ phung hđeh mâo klei găl hriăm mơ̆ng gưl điêt, gưl sa, gưl sa truh kơ gưl tlâo, mjing klei găl kơ phung hđeh hriăm hră jăk hĭn”.

Dŭm boh sang hră dưi rŭ mdơ̆ng ri krĭng knông lăn Dak Lak amâo djŏ knŏng mâo boh tŭ yuôm hlăm anôk bruă nah gŭ ƀiădah dŭm hdră anei lŏ ba klei čang hmăng prŏng mơ̆ng bruă Đảng, bruă knŭk kna lehanăn mnuih ƀuôn sang hlăm bruă “Ba klei thâo săng” ti krĭng lăn adôk dleh dlan anei. Mơ̆ng dŭm adŭ hriăm mrâo, anôk dôk prŏng siam, sa ƀăng bhă mrâo dôk pŏk mlar hŏng phung hđeh ti krĭng knông lăn, ba klei čang hmăng kơ sa Dak Lak đĭ kyar hơĭt kjăp, anôk klei thâo săng dưi duh mngač hlăm êdei anăp mơ̆ng krĭng knông lăn Ala čar./.