Hlăm klei bi kƀĭn, phung ngă lŏ hma, anôk bruă duh mkra leh anăn êpul hgŭm bruă mơĭt leh giăm 400 klei êmuh, lač kơ 25 klei akâo kơ hră mơar, mkŏ mjing krĭng mnơ̆ng dhơ̆ng mkra mjing, ba yua klei kreh knhâo - kdrăp mrâo, bi mklă phŭn agha, mkra mjing êlam, hră ênua bruă lŏ hma, wăl hdĭp mda krĭng ƀuôn sang leh anăn klei êđăp ênang ala ƀuôn.

 Phung bi ala bi trông kơ lu mta hdră msir phŭn msĕ si bi hrŏ klei amâo jăk kyua yan adiê ngă, mđĭ kyar bruă lŏ hma thâo mĭn, pŏk mlar anôk ba čhĭ - mđĭ hnơ̆ng jăk leh anăn ai bi ktưn bruă lŏ hma, mđĭ êpul hgŭm bruă - hdră bi hgŭm, mđĭ klei brei brei čan prăk, lăn ala leh anăn hâo hưn kơ anôk ba čhĭ.

Lu klei blŭ amâo ư ai ti anăp klei hiu mplư hlăm bruă mnia blei, mgưt mnơ̆ng dhơ̆ng lŏ hma Đà Lạt ngă luč liê kơ phung ngă lŏ hma. Lương Thị Yến Vân, Khua Êpul hgŭm bruă Vườn Nhà Đà Lạt, brei thâo:

“Sa kg boh tei nan prăng kâo pla mjing snăn ênưih hĭn jing 100 êbâo prăk, tơdah ƀhu krô 10 kg kơh mâo 1 kg. Yap wăt prăk pui, mnuih mă bruă snăn ênoh bi liê jing 1,2 êklăk prăk/kg boh tei prăng ƀhu krô.  Khădah snăn mnơ̆ng ti êngao msĕ si ti sang mnia Đà Lạt arăng čhĭ knŏng 250 êbâo prăk/kg, hlăk êjai amâo mâo ya hră mơar bi mklă phŭn agha ôh ƀiădah ăt dưm hlăm hbŭ leh anăn mƀlir anăn tei nan prăng ƀhu krô Đà Lạt.  Leh anăn msĕ si boh hông mtah, ba wăt container leh anăn mƀlir pla ti Đà Lạt. Kâo ƀuh amâo mâo ti anôk bruă djŏ tuôm răng mgang klei dưi kơ phung ngă lŏ hma ôh, hmei ngêñ snăk kơ klei snăn.”

Khua gĭt gai dŭm Knơ̆ng, dhar bruă wĭt lač leh lu boh phŭn, bruă ka dưi wĭt lač djăp ênŭm srăng dưi čih pioh leh anăn wĭt lač hŏng hră mơar kơ mnuih ƀuôn sang.

Blŭ hrăm ti anôk bi kƀĭn, Khua Knơ̆ng bruă Sang čư̆ êa čar Lâm Đồng Hồ Văn Mười mñă klă ai tiê “wĭt lač djŏ, msir mgaih pral”. Čar ƀuăn rơ̆ng msir mgaih klei akâo djŏ klă kơ phung ngă lŏ hma;; dŭm boh phŭn êgao klei dưi srăng dưi hưn hŏng Gưl dlông. Kơ klei mnơ̆ng dhơ̆ng anôk mkă ba tinei leh anăn mgưt mnơ̆ng dhơ̆ng alŭ wăl, Hồ Văn Mười bi mklă srăng msir mgaih pral.

Leh klei bi kƀĭn anei, hmei srăng gĭt gai dŭm anôk bruă djŏ tuôm, hlăm anăn bruă klam yuôm bhăn mơ̆ng êpul kahan ksiêm, Knơ̆ng bruă tuh tia mnia blei, kriê dlăng anôk ba čhĭ leh anăn dŭm anôk bruă mkăn. Bruă anei amâo dleh đei ôh tơdah drei ngă ktang”.

Klei bi kƀĭn dưi čang hmăng mjing boh kdrŭt kơ bruă lŏ hma Lâm Đồng mđĭ kyar kjăp, mđĭ prăk hrui wĭt leh anăn klei hdĭp mda kơ ƀĭng lŏ hma hlăm boh klei bi mlih yan adiê ƀrư̆ dleh ktuê dlăng.