Adiê hjan ti krĭng akŏ êa krông Lũy đĭ, ngă êngăp êa giăm 800 boh sang ti să Lương Sơn, čar Lâm Đồng leh anăn ngă kơ êlan dơ̆ng êran pral Phan Thiết – Dầu Giây găn să Tân Lập êngăp lu anôk. Hjăn klei klưh hroh ti kčŭn čư̆ Mimosa (êlan dơ̆ng ala čar mrô 20), Êpul bruă djŏ tuôm mjêč ba nao êdeh êdâo, truh yang hruê 4/12 dưi msir bi leh leh anăn dua nah êlan dưi găn êrô.

Čar Lâm Đồng dôk lŏ dơ̆ng ksiêm dlăng boh klei yan adiê, ktuê dlăng krĭng wăl huĭ hyưt kñăm rơ̆ng êđăp ênang kơ mnuih ƀuôn sang leh anăn mđĭ lar êlan klông dưi găn êrô hlăm ktuê êlan phŭn.

Aguah mbruê 4/12, êa ti krông Cái Nha Trang lŏ dơ̆ng đĭ leh sa mlam hjan prong, ngă kơ lu anôk ktuê hang krông êa êngăp êlam. Êa mơ̆ng akŏ čư̆ čhiăng Khánh Hoà đoh ti kplang Nha Trang, ti lu anôk êa êkăl, đoh êtăng leh anăn doh hlăm sang mnuih ƀuôn sang. Mnuih ƀuôn sang ktuê hang krông brei thâo êa đĭ pral hĭn mkă hŏng hruê êlâo, lu gŏ sang mbĕ đuê̆ phung mduôn, hđeh điêt leh anăn ngăn dŏ, otô nao kơ anôk dlông.

Ti ƀuôn hgŭm Yŭ Nha Trang, kahan ksiêm, kahan ƀuôn, phung êdam êra hâo hưn brei răng, mtô kơ mnuih ƀuôn sang ktuê dlăng klei êa lêč čiăng hmao bi mdrơ̆ng. Đa đa êlan dơ̆ng êa lip kơ ngă klei êrô êbat dleh dlan.