Klei kƀĭn mkŏ online hŏng 34 čar, ƀuôn prŏng hlăm gưl dlông, 3.321 ƀuôn hgŭm, anôk bruă knơ̆ng hlăm kluôm lăn čar. Khua knŭk kna Phạm Minh Chính lač klă, klei hmăi mơ̆ng klei bi mlih yan adiê, klei truh yan adiê ƀrư̆ hruê ƀrư̆ dleh dưi ksiêm dlăng, amâo mâo jăk, dleh dưi đăo knăl, hŏng angĭn êbŭ mrô 3 (Wipha) thŭn anei, khădah mâo dŭm gưl bruă, dhar bruă, alŭ wăl čŏng ngă leh dŭm hdră êlan gang mkhư̆, bi mdrơ̆ng hŏng angĭn êbŭ, bi hrŏ klei hmăi amâo mâo jăk.

Ƀiădah, angĭn êbŭ tlă leh ti Nghệ An hŏng hnơ̆ng hjan lu ngă truh klei hmăi kjham. Khua knŭk kna Phạm Minh Chính mñă brei mbha bruă, bi klă bruă klam đru kčĕ, gĭt gai gang mkhư̆, bi mdrơ̆ng hŏng klei yan adiê ngă brei găl guôp, mbha bruă klam mơ̆ng grăp čô hlăm êpul gĭt gai hŏng ai tiê klă pô, klă bruă, klă bruă klam, klă hdră kčah, klă boh tŭ dưn, klă klei dưi, čiăng mơ̆ng anăn dưi ksiêm wĭt, bi klă djŏ hŏng boh sĭt. Khua knŭk kna Phạm Minh Chính ăt mñă kơ bruă sang čư̆ êa alŭ wăl dua gưl ngă jăk bruă gang mkhư̆, bi mdrơ̆ng hŏng klei truh yan adiê leh anăn tui duah đru dŏng.