Thŭn 2021, ti alŭ mrô 3, să Ea Bung mâo klei bi mmiă êlan mđoh mnuôr mbông êa. Mâo đa gŏ sang čŏng gang êlan mnuôr êa, jing dŏ tuôm yua leh mbĭt giăm 30 thŭn, ngă kơ lu gŏ sang nah tluôn lĕ hlăm klei amâo mâo êa mđoh kơ mnơ̆ng pla mjing. Klei amâo mâo thâo bi djŏ anăn dôk nanao snăn, tơl dŭm gŏ sang bi mmiă êa anăn bi đoh nao kơ sang să čiăng mghaih msir klei amâo mâo thâo bi djŏ, ƀiădah klei mghaih msir amâo mâo ba wĭt klei tŭ dưn ôh, knư̆ hĭn mơh klei amâo mâo thâo bi djŏ anăn êlam hĭn êjai.

Truh hrue 3/7 leh êgao, mơ̆ng leh dua hrue bruă sang čư̆ êa mrâo mâo mkŏ mjing, dŭm gŏ sang bi mmiă anăn lŏ lŏ bi đoh nao truh kơ ƀuôn hgŭm čiăng mghaih msir. Leh mâo mđing hmư̆ klei blŭ mgăl mơ̆ng dua nah bi kčŭt hdơ̆ng găp, phung khua kiă kriê ƀuôn hgŭm Êa  Bung lehanăn phung knuă druh klam kơ bruă anei trŭn nao truh ti anôk anăn, mă bruă klă mngač hŏng dŭm gŏ sang, lehanăn mâo dŭm hdră êlan kơ klei bi mgrăng. Knŏng dua mmông êdei kơ anăn jih jang bruă dưi mghaih msir, 4 gŏ sang bi tŭ ư mbha êa mơ̆ng mnuôr mbông êa pioh mđoh kơ mnơ̆ng pô pla tŭ dưn hĭn. Mâo lŏ ti knhal tuič mnuôr mbông êa, Lê Thị Liên, mnuih ti alŭ mrô 3 lač:

Phung khua kiă kriê ƀuôn hgŭm jih ai tiê, jĕ giăm hŏng mnuih ƀuôn sang, lač jăk kơ phung khua kiă kriê ƀuôn hgŭm đru leh kơ pô, dăp brei hdră čiăng kơ pô mâo êa djăp msĕ si yăng đar leh”.

Klei amâo mâo thâo bi djŏ kyua mmiă êa anăn dăl hlăm 4 thŭn mtam, ƀiădah knŏng mâo mghaih msir mă hlăm 2h đuič, kyua hŏng hdră mă bruă mrâo – jĕ hŏng mnuih ƀuôn sang, čŏng păn kjăp boh klei, asei pô mtam trŭn nao truh kơ ƀuôn sang, mâo klei bi blŭ hrăm, mđing hmư̆, lehanăn ruh mgaih. Tui si Đỗ Duy Toại – Khua knơ̆ng bruă sang čư̆ êa ƀuôn hgŭm Ea Bung, leh mâo mkŏ mjing bruă sang čư̆ êa hlue hdră êlan dua gưl, jih jang bruă kđi čar hlăm ƀuôn hgŭm, pral mâo mkŏ mjing mtam hdră “100 hrue kiă kriê bruă knuă”. Hlăm anăn, kñăm êdi jing: Trŭn nao hlăm ƀuôn sang, jĕ hŏng mnuih ƀuôn sang, mă mnuih ƀuôn sang jing knơ̆ng.

Ƀuôn hgŭm mâo mkŏ mjing leh dŭm êpul bruă trŭn nao truh kơ 3 alŭ dôk mâo lu klei amâo mâo thâo bi djŏ kơ lăn ala, kơ klei êđăp ênang yang ƀuôn čiăng bi tuôm, mđing hmư̆ lehanăn ruh mgaih jih mơ̆ng grăp mta klei.

 “Êngao kơp klei mă bruă ti anôk bruă ƀuôn hgŭm, snăn lŏ bi trŭn nao truh hŏng ƀuôn sang, čiăng mđing hmư̆ klei blŭ mơ̆ng mnuih ƀuôn sang, ya mta klei adôk ka djŏ mnĭ anei ka dưi mghaih msir, snăn mghaih msir mtam bruă anăn. Leh 22 hrue mă bruă săn ƀuôn hgŭm mâo mă bruă leh hŏng 3 boh alŭ. Anăn yơh jing klei jĕ hŏng mnuih ƀuôn sang, mghaih msir bi jih dŭm bruă dôk gun kpăk, bi klă mngač hŏng mnuih ƀuôn sang anăn yơh jing klei yuôm bhăn. Amâo mâo djŏ ôh msĕ si êlâo dih dôk hlăm anôk mă bruă, dôk guôn mnuih ƀuôn sang hriê hưn snăn kơh pô thâo…”

 Hlăm boh klei mrâo, hdră mă bruă mrâo, Ea Bung ăt bi êdah amâo mâo djŏ ƀiă ooh klei dleh dlan. Anôk bruă ară anei ka djăp ôh anôk kơ 30 čô knuă druh mă bruă, ƀai hĭn lŏ thiăm truh 70 čô, kdrăp mă bruă kƀah, klei duh bi liê ka bi knar. Nguyễn Văn Phú – K’iăng khua knơ̆ng bruă sang čư̆ êa să, klam kơ bruă ngă hră mơar lač:

 “Tal êlâo jing kơ kdrăp mă bruă, êlan dăng kông, lehanăn dŭm bruă mkăn truh ară anei ka djăp ôh. Mbĭt anăn, knuă druh mă bruă dăp hriê ka mâo klei mjuăt bi hriăm, klei ktrâo atăt… Êlan klei pui kmlă hđăp amâo mâo djăp ôh, hmăi amâo mâo jăk kơ klei mă bruă hlăm klei drông mnuih ƀuôn sang, ngă luič hrue mmông kơ mnuih ƀuôn sang, lehanăn dleh dlan kơ knuă druh mă bruă”.

Jih jang klei dôk dleh kpăk anăn mâo leh ƀuôn hgŭm hưn mdah, êjai mă bruă hŏng khua knơ̆ng bruă sang čư̆ êa čar Daklak hlăm hrue 23/7. Leh mâo phung khua kiă kriê čar hriê, amâo mâo djŏ knŏng mđing hmư̆, jĕ hŏng alŭ wăl nah gŭ, ƀiădah dưi lŏ bi êdah klei tŭ mơ̆ng bruă mkŏ mjing sang čư̆ êa dua gưl đuĕ nao jĕ giăm hĭn hŏng mnuih ƀuôn sang. Tạ Anh Tuấn, Khua knơ̆ng bruă sang čư̆ êa čar Daklak lač:

 “Hmei mâo leh klei mtă kơ knơ̆ng bruă kreh knhâo ksiêm jih jang kơ kdrăp mă bruă, lehanăn hdră bi mlih mrô hlăm čar, čiăng mâo hdră êlan duh bi liê mtam, amâodah lŏ mkra mđĭ. Bi kơ bruă pui kmlă snăn adŭ bruă mơ̆ng knơ̆ng bruă sang čư̆ êa čar mă bruă hŏng knơ̆ng bruă pui kmlă ngă mtam bruă lŏ dhiang ba bi djăp pui kmlă. Ti  anôk mâo mnuih ƀuôn sang hdĭp, mâo bruă knuă mă snăn ba pui kmlă truh tinăn, luôm jih êlan pui kmlă đĭng blŭ djă hiu hlăm krĭng kplŭt”.

 Leh 3 hrue kăm mă bruă mơ̆ng hdră êlan bruă sang čư̆ êa dua gưl ti alŭ wăl, mnuih ƀuôn sang Ea Bung hlăk dơ̆ng ƀuh klei mlih mrâo mơ̆ng bruă sang čư̆ êa – amâo mâo djŏ knŏng êpul mă bruă dưi lŏ dăp wĭt, ƀiădah bi mlih wăt hdră êlan mă bruă, klei mă bruă, ai tiê klei mă bruă. Grăp mta bruă mâo ruh mgaih, grăp klei blŭ mâo mđing hmư̆… anăn yơh jing klei bi klă êdah êdi mơ̆ng hdră êlan bruă sang čư̆ êa dua gưl – lŏ mâo mkŏ mjing hŏng klei khuăt, giăm mnuih ƀuôn sang lehanăn kyua kơ mnuih ƀuôn sang./.