Hlăm klei bi kƀĭn, phung bi ala kƀĭn bi trông, mguôp klei blŭ hlăm boh sĭt mđĭ kyar bruă hiu čhưn êngiê ti grăp alŭ wăl leh anăn klei yăl dliê mđĭ kyar klei mâo hlăm grăp krĭng kwar čiăng mjing mnơ̆ng dhơ̆ng hiu čhưn ênguê mdê hjăn, lu jơr. Hlăm anăn, Phú Yến mâo hang ksĭ dlông 189km, lu anôk mnei, krĭng kplang, mâo Anôk kriê pioh ala čar yuôm bhăn jing kdrăn boh tâo Đá Đĩa leh anăn lu anôk kriê pioh dhar kreh hƀuê ênuk sui thŭn. Dak Lak mâo klei hiu čhưn ênguê jăk siam mdê hjăn, dhar kreh, đang kphê liă lia, drai êa siam leh anăn wăl dhar kreh čing čhar Lăn Dap Kngư. Tơdah bi mŭt Phú Yên leh anăn Dak Lak jing sa, klei mkŏ klei găl “dliê- êa ksĭ” ƀrư̆ jing yuôm bhăn.

Đặng Hoàng Vũ, Knơ̆ng bruă Sao Mai Beach Resort, ti Phú Yên lač, bruă bi mklă klei mnia blei plah wah 2 čar adôk dleh dlan, mkŏ êlan klông ka ngă djŏ hŏng klei găl êrô êbat, dŭ mdiăng mnơ̆ng dhơ̆ng leh anăn tue, jing klei ngă gun kpăk kơ bruă msir mgaih čiăng kơ klei găl dưi pral mkŏ:

“Brei mđĭ leh anăn pŏk mlar hĭn čiăng kơ êlan mơ̆ng Dak Lakj truh ti Phú Yên leh anăn Phú Yên hŏng Dak Lak srăng găl ênưih hĭn, rơ̆ng kơ hdră bruă dŭ’' mdiăng hlăm wưng pral hĭn. Leh anăn brei mâo klei mkŏ leh anăn mjing mnơ̆ng dhơ̆ng jăk, êlam kơ hiu čhưn ênguê, êdah êdi mơ̆ng dua anôk bruă bi mguôp čiăng mjing sa pŏk rup kluôm kơ hiu čhưn ênguê, ba boh tŭ dưn jăk hĭn”.

Phung bi ala ăt kčĕ lu klei blŭ djŏ tuôm kơ klei mkŏ mjing tuôr, gưl nao hiu, hdră bi mguôp plah wah 2 alŭ wăl, hdră êlan bi đru čiăng mđĭ bruă hiu čhưn ênguê.

Hồ Văn Tiến, Khua Êpul hgŭm hiu čhưn ênguê Phú Yên brei thâo, hlăm boh klei Phú Yên leh anăn Dak Lak mprăp bi mŭt, bruă hiu čhưn ênguê 2 čar ƀrư̆ brei gĭr hĭn čiăng ba hiu čhưn ênguê jing bruă duh mkra phŭn.

“Hmei srăng mkŏ mjing dŭm bruă ngă bi hgŭm êlam hĭn, mđĭ klei bi trông  êpul plah wah Phú Yên hŏng Dak Lak brei ngă lu hĭn, gĭr mâo lu hĭn dua blư̆. Mâo hdră êlan đru hdơ̆ng pô kơ dŭm hdră êlan bi hrŏ ênoh djŏ guôp, đru hưn mthâo mnơ̆ng dhơ̆ng, bi hgŭm hâo hưn, hưn mdah leh anăn mđĭ bruă hiu čhưn ênguê, amâo djŏ knŏng hlăm ala čar ôh ƀiădah srăng mkŏ mjing klei bi hgŭm hŏng tač êngao, êlâo hĭn jing ti dua ala čar China leh anăn Dhŭng Korea, jing dua alŭ wăl mâo klei găl lu tue hriê čhưn hŏng čar lu hĭn”.

Sa boh phŭn yuôm bhăn ăt mâo 2 êpul bi trông čhai, bi tŭ ư hlăm gưl anei, anăn jing hdră bi mŭt mkŏ mjing leh anăn bruă ngă mơ̆ng êpul leh bi mŭt čar. Hlue anăn, mĭn tĭng êpul hgŭm srăng bi mŭt kơ klei bhiăn mkŏ mjing, anôk bruă kriê dlăng, phung hlăm êpul leh anăn dŭm êpul mă bruă, rơ̆ng klei bi mŭt djŏ hnơ̆ng klei gĭt gai mơ̆ng 2 čar. Nguyễn Thụy Phương Hiếu, K’iăng Khua Knơ̆ng bruă dhar kreh, mjuăt asei mlei leh anăn hiu čhưn ênguê Dak Lak lač kơ klei mĭn:

“Ăt čang hmăng dua êpul mkŏ mjing hdră msir bi mŭt, kyua tơdah dua čar bi mŭt, dua knơ̆ng bruă bi mŭt kơh dua êpul hgŭm srăng bi mŭt leh anăn pŏk ngă lu bruă. Êpul hgŭm dua alŭ wăl srăng hrăm mbĭt mkŏ mjing mnơ̆ng dhơ̆ng mbĭt leh anăn mđing kơ mnơ̆ng dhơ̆ng hiu čhưn ênguê hlăm mlam. Mâo klei kčĕ kơ hdră êlan čiăng kơ dŭm anôk bruă duh mkra đĭ kyar”.

Kơ hdră msir mđĭ bruă hiu čhưn ênguê, Êpul hgŭm hiu čhưn ênguê čar Dak Lak leh anăn  Phú Yên bi tŭ ư mkŏ mjing mnơ̆ng dhơ̆ng jăk, hiu čhưn ênguê hlăm lam, kčĕ hdră êlan đru kơ anôk bruă duh mkra; Hdră đru ênoh kơ anôk bruă duh mkra 2 alŭ wăl čiăng bi mguôp hưn mdah ti Hà Nội, Hồ Chí Minh leh anăn ala tač êngao…

Êlâo anăn, Êpul hgŭm hiu čhưn ênguê Phú Yên mâo leh dua hruê ksiêm dlăng mnơ̆ng dhơ̆ng hiu čhưn ênguê, anôk truh mơ̆ng Dak Lak čiăng kơ anăp mkŏ mjing mnơ̆ng dhơ̆ng hiu čhưn ênguê mkŏ “êa ksĭ hŏng dliê kmrơ̆ng liă lia”. Êpul hgŭm hiu čhưn ênguê čar Dak Lak ăt bi tŭ ư hdră kčah nao ksiêm dlăng mnơ̆ng dhơ̆ng hiu čhưn ênguê ti Phú Yên hlăm krah hruê kăm mlan 7 kơ anăp čiăng mprăp boh phŭn mkŏ mjing mnơ̆ng dhơ̆ng hiu čhưn ênguê hlăm čar leh bi mŭt.

Hŏng klei ƀuăn rơ̆ng leh anăn kčĕ bi hgŭm, klei anei kruăk sa nhuang yuôm bhăn hlăm bruă mđĭ hiu čhưn ênguê Phú Yên leh anăn Dak Lak đĭ kyar ktang leh anăn kjăp, mjing sa anôk hiu čhưn ênguê jăk siam mrô sa ti krĭng kwar Krah - Lăn Dap Kngư leh anăn hlăm hla kak hiu čhưn ênguê Việt Nam hlăm wưng ti anăp.