Hlue si asăp mtă mơ̆ng khua gĭt gai Đảng Cộng sản Việt Nam Tô Lâm, Khua lăn čar Việt Nam Lương Cường, hrue (14/4) Khua gĭt gai China Tập Cận Bình kčưm klei hriê čhưn lehanăn mă bruă ti ala čar drei hlăm dua hrue, kñăm lŏ dơ̆ng bi kjăp klei hgŭm mbĭt mâo leh mơ̆ng đưm, jing dĭng kna êjai lehanăn jing ayŏng adei êjai, China – Việt Nam, lehanăn bi đăo knang hdơ̆ng găp mtrŭn agha êlan hĭn hlăm bruă mkŏ mjing yang ƀuôn thâo bi đru. 

Khua gĭt gai Đảng Tô Lâm lehanăn khua gĭt gai China Tập Cận Bình ti Bắc Kinh, China hlăk mlan 8/2024

Anei jing gưl hiu čhưn ala tač êngao tal êlâo hlăm thŭn 2025, klei hriê čhưn kơ Việt Nam tal 4 anei mơ̆ng Tập Cận Bình hŏng klei jing khua kiă kriê prŏng hĭn hlăm gưl păn bruă. Khua phŭn bruă hŏng tač êngao Bùi Thanh Sơn brei thâo hlăm klei Khua gĭt gai China Tập Cận Bình hriê čhưn anei mâo dŭm klei bi trông gưl dlông, hŏng khua gĭt gai Đảng Tô Lâm lehanăn khua lăn čar Lương Cường, grăp čô mâo klei bi blŭ hrăm, lehanăn srăng bi tuôm hŏng khua knŭk kna Phạm Minh Chính lehanăn khua bruă kƀĭn ala Trần Thanh Mẫn čiăng bi trông kơ djăp hdră hgŭm prŏng, lehanăn mđĭ hĭn klei bi mguôp dua ala čar hlăm djăp mta bruă./.