Hlue si hdră kčah, Phŭn bruă kriê dlăng bruă knuă srăng ktrâo atăt klei bi mŭt anôk bruă knŭk kna, bi leh êpul mă bruă, knuă druh hlue si hdră khuăt, tŭ dưn, rơ̆ng mkăp hdră bruă klă klơ̆ng. Dŭm klei ktrâo lač anei bi leh êlâo hruê 25/4. Mbĭt anăn, Phŭn bruă ăt mâo bruă klam ktrâo lač kơ hdră êlan prăk mlan, dăp knuă druh amâo thơ̆ng, bi leh êlâo hruê 30/7. Phŭn bruă ngăn prăk ngă bruă mbha prăk bi liê, msir klei kơ ngăn drăp, lăn ala, anôk bruă, ăt msĕ mơh bruă jao hră mơar, ngăn drăp bi leh êlâo hruê 25/4.

Phŭn bruă rŭ mdơ̆ng klam bruă ktrâo lač dăp anôk bruă mrâo kơ bruă sang čư̆ êa leh anăn dŭm anôk bruă djŏ tuôm. Khua knŭk kna mtă kơ dŭm phŭn, dhar bruă pral bi hgŭm, ktuê dlăng hnơ̆ng, mbha klă mnuih, bruă, rơ̆ng dŭm alŭ wăl pŏk ngă gru hmô bruă sang čư̆ êa mrâo mơ̆ng hruê 1/7/2025; mđing rơ̆ng klei găl kơ mnuih ƀuôn sang, boh nik hđeh sang hră tơdah dăp să, ƀuôn hgŭm, anôk bruă mdrao mgŭn kdriêk.