Hruê 25/4, čar Bình Dương  mkŏ mjing Knăm hưn mdah Hdră mtrŭn mơ̆ng Dhar bruă kƀĭn ala kơ bruă mkŏ mjing ƀuôn hgŭm An Điền, ƀuôn hgŭm An Tây hlăm wăl krah Bến Cát leh anăn mkŏ mjing ƀuôn prŏng Bến Cát. K’iăng Khua bruă kƀĭn ala Trần Quang Phương nao hlăm klei bi kƀĭn. Ƀuôn hgŭm An Điền, An Tây dưi mkŏ mjing mơ̆ng tur knơ̆ng jih ênhă mơ̆ng 2 să. Ƀuôn prŏng Bến Cát leh mkŏ mjing mâo 7 ƀuôn hgŭm leh anăn 1 să. Hlăm wưng êgao, Bến Cát mđĭ kyar bruă duh mkra, truh ară anei kluôm ƀuôn prŏng mâo 8 wăl tuh tia mkra mjing, 1 wăk mkra mjing sa anôk, msir mgaih bruă mă kơ 180 êbâo čô mnuih mă bruă.

Dŭm wăl tuh tia mkra mjing iêô jak 6.441 hdră bruă duh bi liê, hlăm anăn mâo hdră bruă mâo prăk bi liê ala tač êngao jing 816 hdră bruă hŏng 9,8 êklai USD. K’iăng Khua bruă kƀĭn ala Trần Quang Phương brei thâo, bruă mkŏ mjing ƀuôn prŏng Bến Cát jing klei yuôm bhăn, kruăk knăl sa knhuang đĭ kyar mrâo mơ̆ng alŭ wăl. Ñu mtă kơ khua gĭt gai ƀuôn prŏng Bến Cát lŏ dơ̆ng mđĭ lar ai ktang, klei găl mơ̆ng alŭ wăl čiăng mđĭ kyar bruă duh mkra- ala ƀuôn tŭ dưn.

 Snăn, yap truh ară anei, Bình Dương mâo 5 ƀuôn prŏng: Bến Cát, Tân Uyên, Thuận An, Dĩ An, Thủ Dầu Một.  Anei jing alŭ wăl mâo lu ƀuôn prŏng hĭn hlăm kluôm ala./.