Jing sa čô anak mnuih djuê ana Êđê, amai H-Pha Ayŭn - đảng viên mda asei, Khua bruă Đoàn să Čuôr Dăng, kdriêk Čư̆ Mgar, čar Dak Lak – tuič jih ênai mdêč čing hlăm grăp knăm mơak. Ktưn hưn hŏng dhar kreh djuê ana đưm, mđing uêñ hlăk čing čhar ƀrư̆ luič ram, amai gĭr “lŏ iêu wĭt ênai čing” hŏng bruă ngă klă sĭt.

Hŏng bruă klam jing khua bruă Đoàn să, amai akâo mkŏ mjing adŭ mtô bi hriăm tông čing kơ phung đoàn viên, êdam êra alŭ wăl, mbĭt hŏng găp hlăm anôk bruă đoàn, nao truh grăp gŏ sang jak iêu phung mbruă khua thŭn wĭt mtô. Mơ̆ng adŭ hriăm ƀiă mnuih tal êlâo, truh kơ ară anei, să Čuôr Dăng mkŏ mjing leh dua boh adŭ mtô tông čing lehanăn sa êpul hgŭm hriăm klei duê.

Amai H-Pha Ayŭn brei thâo, ti dŭm adŭ hriăm tông čing, amâo djŏ knŏng mtô bi hriăm kơ klei thâo tông mdêč čing… ƀiădah lŏ ba klei khăp mơai kơ ai ênai, ai tiê čing čhar truh kơ phung hđeh. Ai tiê anăn jing klei bi hgŭm mguôp êpul êya, hdơr knga kơ aê aduôn atâo atiêt lehanăn klei thâo săng hlăm bruă kriê pioh kjăp knhuah dhar kreh djuê ana:

Phung hđeh kriăng nao hgŭm êdi. Phung hđeh dưi bi êdah klei thâo pô, mơ̆ng anăn thâo săng klei đua klam lehanăn klei ktưn hưn djuê ana. Hluê hŏng dŭm êpul hgŭm bi hriăm tông čing lehanăn klei duê mơ̆ng să, phung hđeh dưo mjĕ mjuk, nao hlăm klei bi lông gưl să, kdriêk lehanăn čar. Mơ̆ng dŭm hdră bruă anăn, phung hđeh dưi kriê kjăp lehanăn bi lar bra knhuah jăk siam hlăm dhar kreh djuê ana pô”.

         Bi ti Sang hră gưl tlâo Ƀuôn Hô, wăl krah Ƀuôn Hô, pŏk rup nai mtô Phạm Thị Thu Thảo – Khua bruă Đoàn sang hră, đảng viên mda âsei mơ̆ng anôk bruă mtô bi hriăm čar – jing leh juăt mưng hŏng phung hđeh lehanăn ƀĭng mă bruă. Hŏng bruă klam phŭn hlăm hdră Đoàn – Êpul ti sang hră, nai mtô ba mdah leh klei bi lông mkra kdrêč video bi hdơr kơ dŭm knăm mơak prŏng, mkŏ mjing dŭm gưl wĭt čuă ƀuôn sang, knhuah gru hƀuê ênuk, lăn mnga êa mơak jăk siam alŭ wăl, mkra fanpage Đoàn sang hră kreh hưn mthâo kơ gru mngač mnuih jăk, bruă jăk lar bra klei jăk hlăm sang hră. Mơ̆ng dŭm hdră anei, lu phung hđeh amâo djŏ knŏng hriăm jăk ƀiădah lŏ tă hdră elan hdĭp jăk čiăng jăk mnuih ƀuôn sang tŭ dưn. Nai mtô Phạm Thị Thu Thảo brei thâo:

“Hluê hŏng dŭm mmông kkuh hla čhiăm gru, mjuăt bi hriăm, sang hră mjing nanao klei găl kơ phung hđeh nao hgŭm hlăm dŭm êpul, mơ̆ng anăn mđĭ klei thâo, mjuăt bi hriăm knhuah khăp kơ ala čar. Thŭn 2024 – 2025, mâo leh 2 včô hđeh dưi hriăm mbŏ klei thâo kơ Đảng.

Jing đảng viên mda asei hlăm Anôk bruă Đoàn knơ̆ng kriê dlăng bruă hdră bhiăn čar Dak Lak, amai Hoàng Thị Diễm Xuân – Khua bruă Đoàn, amâo djŏ knŏng jing knuă druh jih ai tiê kơ bruă ƀiădah lŏ ba klei khăp mơai hluê hŏng dŭm gưl “Mjuăt bi hriăm hdră bhiăn” kơ dŭm krĭng taih kbưi.

Amao uêñ êlan kbưi, amai mbĭt hŏng găp ba hră hâo hưn kơ hdră bhiăn bi hgŭm hŏng dŭm êpul êya alŭ wăl mkŏ mjing klei bi tuôm, blŭ hrăm, ktrâo lač kơ klei ngă hră mơar hŏng hdră khuăt, ênưih thâo săng. Amai ăt jing mnuih mkŏ mjing gru hmô “Phung êdam êra ba anăp đru kơ mnuih ƀuôn sang hluê ngă hdră knŭk kna online” ti Anôk bruă ngă hră mơar knŭk kna čar. Gru hmô anei đru leh giăm 15 êbâo čô ngă leh klei ngă hră mơar hlăm thŭn êgao – đru mguôp hluê ngă hră mơar hŏng klei mrâo mrang, đru mkŏ mjing bruă knŭk kna giăm mnuih ƀuôn sang kyua mnuih ƀuôn sang.

Hŏng dŭm klei đru mguôp êdah êdi, amai Hoàng Thị Diễm Xuân mâo bruă Đoàn čar Dak Lak bi mni jing đảng viên mda asei êdah êdi thŭn 2025. Ƀiădah hŏng amao, klei mơak hĭn jing amâo mdei duh myơr kyua êpul êya, kyua mta kñăm mkŏ mjing Knŭk kna hluê ngă djŏ hdră bhiăn mơ̆ng dŭm bruă ngă đ’điêt ti krĭng ƀuôn sang.

“Hluê hŏng dŭm hdră thơ̆ng kơ bruă lehanăn hdră đoàn, hmei ba leh hdră bhiăn truh giăm mnuih ƀuôn sang hĭn, đru kơ mnuih ƀuôn sang mđĭ klei thâo săng, hluê ngă djŏ hdră bhiăn, mjing klei mưng hdĭp lehanăn mă bruă djŏ hdră bhiăn”.

Dưi ƀuh, khădah mă ya bruă mdê mdê, ƀiădah hŏng ai hlăk, klei hur har kơ bruă lehanăn ai tiê ba anăp, phung đảng viên mda asei ti Dak Lak dôk đru mguôp lar bra klei đăo knang, krŭ wĭt klei čang hmăng duh myơr lehanăn lŏ čuê čih ktuê êlan kơ ênuk gưl hđeh mkŏ mkra ƀuôn sang mdrŏng sah, kreh dhar./.