Hlăm hdră nao čhưn ti Malaysia, tlam 21/11, Khua gĭt gai Đảng Tô Lâm lehanăn Khua knŭk kna Malaysia Anwar Ibrahim hrăm mbĭt gĭt gai klei bi kƀĭn phung čih klei mrâo hưn mthâo kơ boh tŭ hdră bi trông. Ti anôk bi kƀĭn, Khua gĭt gai Đảng Tô Lâm lehanăn Khua knŭk kna Malaysia brei thâo, 2 ala čar mâo leh klei bi mklă mkra mđĭ klei bi mjĕ Việt Nam – Malaysia truh ti hnơ̆ng ƀĭng hgŭm phŭn kluôm dhuôm.

Mơ̆ng anăn, srăng đru kơ 2 ala čar lŏ dơ̆ng bi kjăp lehanăn mđĭ hĭn klei bi hgŭm, mjĕ mjuk, klei đăo knang bruă kđi čar plah wah duâ ala čar hluê tur knơ̆ng mpŭ kơ hdră bhiăn tar rŏng lăn, klah hjăn, ngă phŭn mil pô, klei kluôm ênŭm krĭng lăn lehanăn klei bhiăn bruă kđi čar, djŏ guôp hŏng boh klei bruă duh mkra – ala ƀuôn lehanăn hdră bhiăn mơ̆ng grăp ala čar lehanăn amâo čhŭ luă hlăm bruă mdê bi ala čar. Mta phŭn mơ̆ng Hdră bi hgŭm kluôm dhuôm mâo mđĭ hĭn klei đăo knang lehanăn bi hgŭm hlăm bruă kđi čar, lĭng kahan, răng mgang klei êđăp ênang, mjing tur knơ̆ng hơĭt kjăp, đru răng mgang wăl anôk êđăp ênang, hơĭt kjăp kơ klei đŭ kyar hluê hdră mđĭ hĭn klei bi trông dŭm êpul, pŏk ngă tŭ dưn klei bhiăn bi blŭ hrăm bi hgŭm dôk mâo, mbĭt anăn ksiêm dlăng mkŏ mjing klei bhiăn mrâo djŏ guôp hŏng klei čiăng, klei tŭ dưn mơ̆ng jih dua tĭng hlăm boh klei mrâo./.