Tui si phŭn bruă lĭng kahan hưn, jih jang êpul êya bruă lĭng kahan mơ̆ng gưl trung đoàn kơ dlông mâo ngă leh truh 1.800 mta bruă kñăm kkuh mơak hrue bi hdơr, hŏng ênoh jih jang êbeh 260 êklai prăk; ară anei hlăk dôk bi leh êbeh  1.400 mta bruă, lehanăn êbeh 400 hlăk dôk ngă. Dŭm êpul êya bruă lĭng kahan, lehanăn alŭ wăl mâo klei bi hgŭm kơ mkra wĭt dŭm anôk bi hdơr kơ 32/34 čô lĭng kahan hâo hưn kơ klei mtlaih êngiê, hŏng ênoh jih jang truh 2,56 êklai prăk. Ară anei mâo bi leh klei đru kơ 24 gŏ sang, adôk 8 gŏ sang srăng bi leh êlâo kơ hrue  22/12 thŭn anei.

Jih jang lĭng kahan mâo klei bi đru ngăn prăk, đru mdơ̆ng sang hdơr knga tla ai, sang bi đru, sang kơ ƀĭng kahan, lăm lui sang sô tĭ… kơ mnuih ƀuôn sang ti dŭm alŭ wăl, truh ară anei mâo ngă leh êbeh 24.900 boh sang. Hlăm anăn, bi leh êlâo kơ hrue 22/12 jing 15.600 boh sang, dŭm adôk ƀuăn srăng bi leh hlăm thŭn  2025, hŏng êbeh 1.624 êklai prăk. Thiếu tướng Đoàn Quang Hòa, Khua anôk bruă hdră êlan, khua knơ̆ng bruă kđi čar hlăm lĭng kahan yang ƀuôn Việt Nam lač:

“Knŏng bruă đru rŭ mdơ̆ng sang dôk kơ ƀĭng kahan, mâo knơ̆ng bruă kđi čar mtrŭt mjhar, mkŏ mjing ti Định Hóa, Thái Nguyên mlan 11/2023, mâoleh 40 anôk lehanăn êpul êya lĭng kahan ƀuăn đru mdơ̆ng truh 3.857 boh sang hŏng ênoh prăk jih jang 242,5 êklai prăk. Leh mâo klei mtrŭt mjhar, jih jang dŭm anôk bruă êpul êya lĭng kahan lŏ dơ̆ng hâo hưn, mtrŭt mjhar, iêo jak hrue ai, lehanăn bi mkrum ngăn prăk pioh đru kơ phung dôk hlăm klei dleh dlan kơ sang dôk. Ênoh boh sang bi đru mâo ƀĭng kahan mdơ̆ng truh ară anei jing  12.863 boh sang, jing kdlưn hĭn hŏng ênoh kčah truh 4.863.”

Phŭn bruă lĭng kahan mâo leh klei kiă kriê đru prăk mơ̆ng Binh đoàn 15 mdơ̆ng 4 boh sang roong hŏng ênoh êbeh 12 êklai prăk. Kahan alŭ wăl 1 đru hlăm bruă mkŏ mkra krĭng ƀuôn sang mrâo ti să Tam Kim lehanăn Hoa Thám, kdriêk Nguyên Bình, čar Cao Bằng hŏng ênoh bi liê jih jang êbeh 70 êklai prăk.  Đại tá Nguyễn Xuân Thủy, K’iăng khua anôk bruă mjuăt bi hriăm lĭng kahan lač:

“Phŭn bruă lĭng kahan đru mdơ̆ng sang hră gưl 1, lehanăn gưl 2  Điện Biên ti să Thanh Xương, kdriêk Điện Biên, čar Điện Biên hŏng ênoh prăk truh 120 êklai prăk; đru 10 mta bruă kơ lĭng kahan nao đru kơ bruă bi hrŏ ƀun hŏng klei kjăp, bruă mkŏ mkra krĭng ƀuôn sang mrâo, bruă rŭ mdơ̆ng dŭm anôk bruă kơ klei hdĭp mda ala ƀuôn, mă mơ̆ng keh kyua mnuih ƀun hŏng ênoh prăk jing 23,8 êklai prăk.”

Mprăp kơ klei bi hdơr 80 thŭn hrue mkŏ mjing lĭng kahan yang ƀuôn Việt Nam, 35 thŭn hrue jih jang mnuih ƀuôn sang đru bi răng mgang lăn čar, mrâo anei, Anôk bruă kăp kčĕ đru kơ bruă hâo hưn gưl dlông, phŭn bruă lĭng kahan, Phŭn bao hâo hưn, mtô mblang bi mguôp mkŏ mjing klei bi kƀĭn hŏng phung ngă bruă klei mrâo hưn mdah kơ bruă bi hdơr.

Mơ̆ng anăn, mâo leh lu bruă ngă bŏ hŏng klei yuôm bhăn, msĕ si anôk bruă kđi čar lĭng kahan yang ƀuôn Việt Nam kiă kriê, hgŭm hŏng gưl dlông bruă êdam êra Cộng sản Hồ Chí Minh mkŏ mjing klei bi lông tui duah klei thâo săng kơ knhuah gru “80 thŭn hrue mkŏ mjing êpul lĭng kahan yang ƀuôn Việt Nam lehanăn 35 thŭn hrue jih jang mnuih ƀuôn sang răng mgang lăn čar”, mâo leh lu phung êdam êra sa ai. Klei bi lông čih hlăm kluôm ala “Yăl dliê ti đại đội” lehanăn klei bi lông video clip “Kahan pô kâo khăp”. Mdah klei kdŏ muiñ hŏng akŏ jing jang mnuih ƀuôn sang răng mgang lăn čar, lehanăn mkŏ mjing klei kdŏ muiñ lĭng kahan hŏng phung êdam êra, phung hriăm gưl prŏng tal 10. Anôk bruă Đảng kahan gưl dlông, hlăm phŭn bruă lĭng kahan gĭt gai leh dŭm anôk bruă êpul êya lĭng kahan mâo klei bi mguôp kjăp hŏng dŭm anôk bruă klei mrâo gưl dlông lehanăn alŭ wăl mđĭ hĭn bruă hâo hưn kơ bruă lĭng kahan, bruă răng mgang lăn čar, mkŏ mjing klei bi ktưn “Pưng myưng knhuah gru – Čih kơ boh tŭ dưn lĭng kahan – bi năng hŏng anăn pia lĭng kahan Awa Hồ”.

Boh nik, djŏ hlăm wưng bi hdơr, klei rang mdah bruă lĭng kahan hŏng ala tač êngao mơ̆ng Việt Nam tal 2 ti tač êdeh phiơr Gia Lâm, ƀuôn prŏng Hà Nội srăng mkŏ mjing mơ̆ng hrue 19-22/12, hŏng hnơ̆ng prŏng, anôk răng mdah jing prŏng hĭn mkă hŏng gưl tal êlâo. Knăm bi hdơr 80 thŭn hrue mkŏ mjing lĭng kahan yang ƀuôn Việt Nam lehanăn 35 thŭn hrue jih jang mnuih ƀuôn sang răng mgang lăn čar, srăng mkŏ mjing kdrăm k’ah hlăm aguah hrue 20-12-2024 ti Sang bi kƀĭn ala čar./.