Ară anei čar ktưn truh kơ thŭn 2025 srăng mghaih msir jih bruă anei. Tui si klei ksiêm yap mơ̆ng dŭm alŭ wăl, ară anei čar Daklak adôk 9.569 gŏ sang hlăk dleh dlan klei kơ sang dôk.

Nguyễn Hoàng Giang, Khua knơ̆ng bruă mnuih mă bruă phung knap mñai čar Daklak brei thâo, ngă bruă bi đru anei jing hdră êlan mơ̆ng kluôm ala hlăm thŭn 2025 mâo khua knŭk kna mtrŭt mjhar, čar Daklak ksiêm yap leh, păn kjăp ênoh sang tĭ rưč, lehanăn mkă tĭng kơ hdră êlan đru. Čar mkŏ mjing hdră mă bruă, čiăng kơ jih jang bruă rŭ mdơ̆ng sang kơ mnuih dleh dlan dưi bi sĭt, amâo lŏ mâo ôh mnuih dôk hlăm sang amâo mâo djăp ênoh čuăn./.