Gia Lai nao duah, hrui mƀĭn klang kleh phung kahan djiê êngiă ti Campuchia
Thứ tư, 09:50, 13/11/2024
VOV Tây Nguyên
VOV Tây Nguyên
VOV4.Êđê - Aguah 12/11, Anôk gĭt gai 515 čar Gia Lai mkŏ mjing leh Knăm ba kahan nao ngă bruă klam tui duah, hrui mƀĭn klang kleh phung kahan ba anăp lehanăn phung thơ̆ng kơ bruă Việt Nam săn asei, djiê êngiă hlăm dŭm ênuk bi blah ti Campuchia.
Nao ti knăm anei, phung knuă druh, lĭng kahan Êpul K52, Adŭ bruă kđi čar, Knơ̆ng gĭt gai lĭng kahan čar Gia Lai dưi kah mbha jing dŭm êpul nao ngă bruă klam ti 3 čar Ngŏ Dưr Campuchia mâo: Preah Vihear, Stung Treng lehanăn Ratanakiri. Ngă bruă mơ̆ng ară anei truh kơ jih yan bhang krah thŭn 2025.
Ti knăm anei, phung khua čar Gia Lai mbĭt hŏng phung khua Knơ̆ng gĭt gai lĭng kahan čar Gia Lai mơĭt leh asăp čuă êmuh, mđĭ ai phung kahan nao ngă bruă klam gưl anei. Mbĭt anăn mtă kơ Êpul K52 hluê ngă kjăp klei kčah mtrŭn hlăm klei bi mjĕ, hluê ngă kjăp klei bhiăn kahan, klei kčah mtrŭn mơ̆ng Phŭn bruă lĭng kahan, kahan krĭng. Thâo klă klei mâo ti alŭ wăl, dŭm klei hâo hưn kơ msat kahan djiê êngiă, rơ̆ng jih klei hâo hưn dưi ksiêm bi mklă./.
Viết bình luận