Hlăm 2 thŭn, 2024 – 2025, Lâm Đồng hluê ngă hdră msir lăm 1.972 boh sang dôk êjai, sang tĭ ƀrôč đru kơ gŏ sang ƀun, giăm ƀun hlăm čar.

Hlăm anăn, 1.580 boh sang mkra mrâo lehanăn 392 boh sang lŏ mkra mđĭ, hŏng ênoh prăk 88,8 êklai prăk. Knŏng hlăm thŭn 2024, Lâm Đồng mâo mta kñăm msir lăm êbeh 1.000 boh sang dôk êjai, sang tĭ ƀrôč đru kơ gŏ sang ƀun, giăm ƀun, hlăm anăn mkra râo 840 boh sang, lŏ mkra mđĭ 166 boh. Hluê Phạm S, Kơiăng khua Anôk bruă sang čư̆ êa čar Lâm Đồng, truh ară anei, hdră msir lăm sang dôk êjai, sang tĭ ƀrôč ti čar Lâm Đồng mâo leh klei sa ai mơ̆ng lu êpul, mnuih, anôk bruă duh mkra đru mguôp êbeh 45 êklai prăk. Ênoh prăk anei srăng rơ̆ng hluê ngă hdră anei djŏ mta kñăm mâo kčah mtrŭn./.