Anei jing êpul grup mdrao mgŭn mrô sa Japon, ngă bruă êngao kơ klei duah prăk mah, mâo sang hră gưl prŏng mdrao mgŭn, dŭm sang êa drao, êpul bruă đru kơ ala ƀuôn hlăm kluôm ala. Blŭ hrăm hlăm mmông drông, K’iăng Khua knŭk kna Lê Thành Long brei thâo, klei bi hgŭm Việt Nam – Japon dôk hlăm wưng đĭ kyar kăk siam.

Dŭm hdră bi hgŭm hŏng Japon ba klei tŭ dưn jăk hŏng bruă kriê dlăng klei suaih pral kơ mnuih ƀuôn sang Việt Nam. Đru mguôp hlăm boh tŭ mbĭt anei mâo klei gĭr mơ̆ng Êpul grup IHW leh anăn Takagi Kuninori. K’iăng Khua knŭk kna bi mni kơ Êpul grup IHW ksiêm hriăm, pŏk ngă dŭm hdră bi liê leh anăn mkŏ mjing sang êa drao hlue si gru hmô Japon ti Việt Nam; čang hmăng dŭm hdră bruă mơ̆ng IHW srăng tŭ jing, đru kơ mnuih ƀuôn sang Việt Nam mâo klei găl kriê dlăng klei suaih pral hŏng kdrăp mrâo, hdră mdrao mgŭn mrâo mrang, đăo knang leh anăn jăk.