Hlăm knăm anei, phung khua gĭt gai čar Kon Tum bi mni kơ bruă sang hră mtô bi hriăm hŏng êpul phung nai ti čar hlăm dŭm thŭn êgao pŏk ngă, hlue ngă hrăm mbĭt bruă klam, hdră msir kơ klei mlih mrâo klă klơ̆ng, kluôm kơ bruă sang hră mtô bi hriăm ti alŭ wăl. Êdah êdi jing mđĭ lar kjăp bruă mtô bi hriăm phung hđeh 5 thŭn, mtô hđeh sang hră gưl sa leh anăn gưl dua; dŭm hdră bi lông mtô leh anăn hriăm, mtrŭt mjhar hriăm hră, mkŏ mjing ala ƀuôn hriăm hră dưi mđing uêñ.

Gưl anei, nai mtô Thái Khắc Hoà, Khua adŭ bruă Sang hră mtô bi hriăm ƀuôn prŏng Kon Tum ktưn hưn tŭ drông anăn knăl Nai mtô êdah êdi kyua Khua lăn čar mđup brei. Phŭn bruă sang hră mtô bi hriăm mđup brei hră pah mni kơ 2 čô nai êdah êdi thŭn 2024 ti čar Kon Tum; Khua Knơ̆ng bruă sang čư̆ êa čar Kon Tum mđup brei Hla čhiăm gru thŭn hriăm 2023-2024 kơ 16 êpul.