Hơ̆k mơak mbĭt hŏng mnuih ƀuôn sang alŭ 8 hlăm hruê knăm bi mguôp djuê ana, Khua knŭk kna Phạm Minh Chính bi ala kơ khua gĭt gai Đảng, knŭk kna, mơĭt kơ jih jang mnuih ƀuôn sang klei kkuh drông, klei êmuh hrăm leh anăn klei hơêč hmưi jăk siam hĭn.

Khua knŭk kna Phạm Minh Chính hmăng hmưi leh anăn đăo knang, mnuih ƀuôn sang alŭ 8 leh anăn čar Lạng Sơn bi lar ai ti bi mguôp hlăm alŭ, wăl krah, kdriêk, čar, kluôm lăn čar leh anăn tar rŏng lăn hŏng dŭm mta mnơ̆ng dhơ̆ng klă klơ̆ng. Mbĭt hŏng anăn jing ngă jăk klei mjĕ giăm  “Đảng gĭt gai, knŭk kna kiă kriê, mnuih ƀuôn sang ngă phŭn”, mtrŭt mđĭ klei mlih mrâo čiăng mkŏ mjing klei kdlưn hĭn, mbruă čiăng nao kbưi hĭn, ñŭ kma čiăng đĭ kyar, bi mguôp čiăng mâo thiăm ai ktang, hluê ngă tŭ jing kluôm dhuôm dŭm mta kñăm, bruă klam thŭn 2024, mkŏ mjing tur knơ̆ng kjăp kơ klei đĭ kyar hmar, hơĭt kjăp hlăm wưng kơ anăp, mđĭ hnơ̆ng klei hdĭp ai tiê mơ̆ng mnuih ƀuôn sang thŭn êdei đĭ hĭn kơ thŭn êlâo.