Hŏng klei kdrăp k’ah, h’uh mđao, Khua knŭk kna Phạm Minh Chính mơak mâo drông 60 čô phung nai mtô jing kdlưn hĭn, mnuih mâo leh lu bruă đru mguôp kơ klei mjuăt bi hriăm mơ̆ng lăn čar, bi ala brei kơ 1,6 êklăk čô phung nai mtô hlăm kluôm ala. Khua knŭk kna mñă, anăp nao hlăm sa ênuk gưl kpưn đĭ, klei mjuăt bi hriăm jing bruă mđing hĭn tal êlâo, klei mjuăt bi hriăm tui tiŏ hdră êlan mlih mrâo, mkŏ mjing hŏng klei kjăp hĭn.

Čiăng mâo ngă bruă yuôm bhăn anei, Khua knŭk kna mtă kơ dŭm phŭn dhar bruă, lŏ dơ̆ng mđing hĭn kơ bruă sang hră mơar, mđĭ kyar dhar kreh sang hră mơar. Khua knŭk kna mñă, grăp čô nai mtô brei jing gru bi hmô mngač hlăm knhuah dôk dơ̆ng ƀơ̆ng huă, khăp kơ bruă, khăp kơ mnuih, mđrăm mbĭt bi mkŏ mjing kơ sa klei hdĭp lăn čar pô mgi dih đĭ kyar./.