Hlăm knăm, phung bi ala lŏ wĭt bi hdơr kơ klei mkŏ mjing leh anăn đĭ kyar čar Dak Lak, hŏng klei mpŭ myơr brui mgưi, kwang mnga, bi êdah klei hdơr kơ phung lĭng kahan cộng sản, phung mnă hđăp ti Sang mnă Ƀuôn Ama Thuôt, dŭm gưl phung khua gĭt gai, knuă druh, lĭng kahan leh anăn mnuih ƀuôn sang dŭm djuê ana Dak Lak amâo mâo uêñ kơ klei dleh dlan, săn asei čiăng mkŏ mjing leh anăn mđĭ kyar čar Dak Lak.

Lại Đức Đại, k’iăng khua knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak brei thâo, knăm myơr brui mngưi jing bruă grăp tuôr dưi mkŏ mjing ti wăl kriê pioh ala čar sang mnă Ƀuôn Ama Thuôt. Thŭn anei hdră lŏ yuôm bhăn hĭn êjai dưi mkŏ mjing djŏ wưng bi hdơr 120 thŭn mkŏ mjing čar Dak Lak, 84 thŭn hruê mkŏ mjing bruă Đảng čar leh anăn mđing truh bi hdơr dŭm knăm prŏng mơ̆ng lăn čar.