VOV4.Jarai-Mơguah lơ 27/4, Khua mua pơ ala mơnuih ƀôn sang tơring čar Dak Nông tal III, rơwang bruă thun 2016-2021 jơnum pơčrông sai sa bruă yom phara, kơ jơlan hơdră tuh pơ alin hơdôm kơčăo bruă tuh pơ alin kơ bruă čar mơ̆ng thun 2022-2025 laih anun pơčrông sai kơ bruă ruah khua, dăp bruă.

Khua mua pơ ala mơnuih ƀôn sang Dak Nông pơsit hră pơtrun tuh pơ alin kơ bruă čar mơ̆ng thun 2021-2025

Ƀơi mông jơnum anai, khua mua pơ ala mơnuih ƀôn sang tơring čar Dak Nông hơmâo pơčrông sai hăng tŭ ư hơdôm Hră pơtrun pơsit tuh pơ alin kơ bruă čar mơ̆ng thun 2022-2025. Tui hăng anun, rơnoh prăk him lăng tuh pơ alin črăn anai truh 11 rơbâo 700 klai prăk, lu hloh mơkrah pơkă hăng hlâo kơ anun.

Him lăng amăng 5 thun pơ anăp Dak Nông amra tuh pơ alin rơbêh 170 kơčăo bruă, phun ñu pơkra glăi hiam jơlan nao rai amăng tơring čar, pơdong pưk sang amăng plơi prong djơ̆ hơdră; tuh pơ alin pơjing bruă mă amăng kơnuk kơna mă yua điện tử laih anun plơi prong rơgơi….

Ăt amăng mông jơnum anai mơ̆n, khua mua pơ ala mơnuih ƀôn sang tơring čar pơčrông sai bruă mă pơđĭ kyar nao hrom pơgang hơđong tơlơi hơdip mơda mơnuih ƀôn sang, pơhlôm, pơgang klin, laih dơ̆ng kơtưn wai pơgang kông ngăn glai klô hăng pơgang anih hơdip jum dar.

Ƀing khua mua hơmâo pơsit hră pơtrun ruah pơhrua dơ̆ng ding kơna apăn bruă Jơnum min mơnuih ƀôn sang tơring čar kơ ơi Trần Văn Diêu, khua anom bruă kơ Jơnum min mơnuih ƀôn sang tơring čar Dak Nông.

Nay Jek: Pơblang