Khua dêh čar lăng yom tơlơi gir run, kơtưn lu amăng bruă mă, kiăng hơmâo boh tơhnal mơ̆ng Ding jum Gru grua, Pơrơguăt drơi jăn hăng Tuai čuă ngui amăng bruă ngă tui djop jơlan hơdră, akŏ bruă laih anun bruă jao mơ̆ng kơnuk kơna; biă mă ñu hơmâo lăi pơthâo, pơdah thâo hră pơar kĭ pơsit, pok pơhai ngă tui Hră pơtrun mrô 80 mơ̆ng Ding jum kơđi čar laih anun lăi pơthâo amăng mông jơnum lok sa khua mua pơ ala mơnuih ƀôn sang dêh čar tal XVI hăng ngă hră pơtrun kơ bruă pơđĭ kyar gah anom bruă gru grua.

Hrơi blan pơ anăp, Khua dêh čar lăi lĕ, kiăng kơđiăng hloh amăng bruă mă akŏ pơdong ping gah brơi tơpă, rơgoh, kơjăp tong ten hloh, khom pơđĭ tui tơlơi glăm ba mă bruă mơ̆ng pô ngă khua sang bruă. Khua dêh čar pơtrun hiăp brơi ngă tui khut khăt jơlan hơdră tơhnal pơkă mơ̆ng dêh čar gah gru grua, kiăo tui djơ̆ tơlơi pơtrun, bruă ngă, tơhnal pơkă, mơnuih tŭ mă. Ngă anŏ pơblih kơtang hloh pơđĭ kyar bruă rơjang drơi jăn, pơrơguăt drơi jăn; tuh pơ alin djơ̆ lăp, phun. Akŏ pơjing dăp glăi bruă mă tŭ yua hloh hăng pơđĭ tui rơnoh pơhno amăng bruă mă, ba bruă tuai čuă ngui dêh čar jing anom bruă bơwih ƀong huă phun.