Phương Phú Thủy, tơring čar Lâm Đồng hơmâo akŏ pơjing hluai tui bruă pơmut hrŏm 3 boh phương hơmâo Phú Thủy, Thanh Hải hăng Phú Hài amăng tơring čar Bình Thuận hơđăp. Pơsit tong bruă pơplih mrô lĕ bruă jao akŏ phun, pơplih phrâo, tơdơi kơ ngă tui gong gai ƀon lan 2 gưl, phương Phú Thủy tañ akŏ pơjing Grup djru boh thâo phrâo hăng bruă djru brơi ngă hră pơ-ar; akŏ pơjing 23 Grup yua boh thâo phrâo hơmâo 130 čô ding kơna hăng pơjing hơbô̆ bruă pơtô brơi mơnuih ƀôn sang yua boh thâo phrâo. Ayong Phan Anh Tiến, Khua khul hlăk ai phương Phú Thủy brơi thâo, ngă tui pran ba jơlan hlâo, pran hur har mơng hlăk ai, rơbêh 4.400 čô ding kơna hlăk ai amăng phương ba jơlan amăng bruă pơtô brơi, hrưn đĭ yua boh thâo phrâo rah, djru brơi mơnuih ƀôn sang thâo yua boh thâo ia rơgơi dong:

“Khul hlăk ai phương juăt hyu pơtô pơblang, pơtop hrăm pơplih yua boh thâo phrâo brơi ding kơna hlăk ai. Ƀing hlăk ai nao tơl sang, poh tơl amăng kiăng djru brơi neh met wa, sit biă ñu lĕ ƀing than rơma hăng mơnuih drơi jăn ƀu klă mă yua măi telephôn rơgơi, ngă pơmut amăng VNeID gưl mrô 2. Thâo mơ-it hră pơ-ar amăng plang internet kiăng djru ngă brơi. Lơm črâo ba ƀing tha rơma aka ƀu thâo yua boh thâo phrâo, ƀing ta kiăng črâo nao črâo rai lu wŏt mơn, ƀơƀrư̆ kiăng neh met wa thâo. Amăng ha wŏt hrơi tơjuh khul hlăk nao pơkiăo nao ƀing hlăk ai nao djru bruă ƀơi anom bruă djru ngă hră pơ-ar kiăng djru brơi mơnuih ƀôn sang ba rai hră pơ-ar”.

Giăm 10 blan rơgao hrŏm hăng hơđong amăng pok pơhai anih anom, Ping gah phường Phú Thủy, tơring čar Lâm Đồng hơmâo ngă tui hơnong pơkă pơplih mrô tañ ƀiă, tŭ yua ƀiă dong hăng giăm mơnuih ƀôn sang ƀiă. Hơdôm hơbô̆ bruă, bruă mă: “Glông duh prăk ƀu kiăng brơi tơl tơngan”, pơphun ngă bruă 60 hrơi mlăm ngă brơi mrô anăn yua điện tử pơlir hăng pok pơhai hơbô̆ bruă “Rĭm čô mơnuih ƀôn sang-Sa anăn păn mă yua”; bruă pơphun 90 hrơi mlăm ngă pơdrông sah, ngă pơtong glăi tơlơi mrô jŭ yap, tơlơi pơhing kơ lŏn mơnai amăng phương; 90 hrơi mlăm pơmut hră pơ-ar pơdô̆ rơkơi bơnai; lăng glăi tơlơi pơhing amăng măi lăi pơthâo anih wai pơgang apui ƀong…pơgôp hrưn đĭ tŭ yua amăng bruă wai lăng kơnuk kơna hăng djơ̆ pran mơnuih ƀôn sang, anom bơwih ƀong sĭ mơdrô. Ơi Nguyễn Hữu Thông, Khua git gai Ping gah phương Phú Thủy pơsit tong, Ping gah phương pơsit tong pơplih yua boh thâo phrâo hăng mă yua boh thâo phrâo amăng pok pơhai gong gai ƀon lan lĕ hơnong pơkă yôm phăn kiăng lăng glăi bruă git gai, wai lăng mơng gong gai kah hăng mơng rĭm čô mơnuih Ping gah:

“Boh than ba glăi mơng pơplih yua boh thâo phrâo, mă yua boh thâo phrâo amăng bruă pok pơhai gong gai ƀon lan mơng Phú Thủy glăk pơtrut pơsur. 100% mrô ƀing apăn bruă mă yua măi mok wai lăng hră pơ-ar điện tử, pơsir hĭ bruă amăng internet. Bruă pơsir hĭ hră pơ-ar mơng ataih mơng phương rơbêh 70%, sa, dua bruă dŏ glăi ăt ngă klă ƀiă dong. Amăng thun 2025 pơplih ngă hră pơ-ar phương Phú Thủy dong tal 3 amăng rơbêh 124 boh să, phương, kual bul pơtâo. Phương ƀơƀrư̆ dưm dăp hră pơ-ar măi mok hăng pơjing anih djă pioh hră pơ-ar hrŏm, pơtrut kơtang amăng bruă ngă hră pơ-ar mơng ataih ngă gêh gal brơi mơnuih ƀôn sang hăng anom bơwih ƀong sĭ mơdrô”.

Tui tơlơi sit nik amăng hơdôm boh să, phương amăng tơring čar Lâm Đồng brơi ƀuh, pơplih yua boh thâo phrâo glăk ƀơƀrư̆ yak nao pơplih amăng hơdră pok pơhai ngă. Sit biă ñu, lơm bruă mă hơtun glăi lu pơ ƀon lan, pơplih mrô jing “anih djru ba” yôm phăn. Yua mơng mă yua boh thâo phrâo, ƀing apăn bruă, gưl să pơsir hĭ bruămă tañ, djơ̆ ƀiă, laih dong kơtưn pơlir hơbit, pơlăi nao rai tơlơi pơhing hăng gưl tơring čar brơi hmao tlôn. Kiăng mơnuih ƀôn sang ƀơi kual plơi pla, kual ataih, asuek, kual tơnap tap amăng tơring čar ƀu brơi pioh glăi pơ tlôn tơdơi kơ rơwang tŏ tui amăng pơplih mrô, ƀing apăn bruă ƀơi ƀon lan amăng tơring čar Lâm Đồng amra ngă bruă glêh glar ƀiă. Ơi Đặng Thiện Viên, kơ-iăng Khua Jơnum min mơnuih ƀôn sang să Liên Hương, tơring čar Lâm Đồng brơi thâo:

“Să Liên Hương lĕ lu kual plơi pla, mơnuih ƀôn sang ngă hră pơ-ar kơnong djă nao hră pơ-ar đôč. Ră anai ƀing apăn bruă amăng să lơm pơsir hĭ bruă ngă pơ-ar, kiăng ngă brơi amăng hră pơ-ar brơi mơnuih ƀôn sang, laih dong črâo brơi ngă amăng măi mok kiăng dưi yua boh thâo phrâo tui tơlơi črâo trun mơng tơring čar”.

Hruă ngă tui tơlơi pơtrun mrô 57 mơng Ding jum kơđi čar, tơlơi pơtrun mrô 71, mơng Kơnuk kơna kơ pơtrut tañ yua boh thâo ia rơgơi, boh thâo măi mok, pơplih pơčeh phrâo hăng pơplih mrô dêh čar, tơring čar Lâm Đồng glăk pơtrut kơtang amăng pơplih mrô tui akŏ bruă rơwang thun 2026-2030. Amăng anun, pơsit gơnam măi mok hăng anih djă pioh lĕ atur; đing nao pơđĭ kyar anih djă pioh tui jơlan gah pơplih phrâo, ha amăng plĕ; pơjing hơdôm anih djă pioh hră pơ-ar pơhlôm brơi “djơ̆, djop, agaih, dưi yua, pơmut djơ̆, yua hrŏm” kiăng pơlir hơbit, pơƀuh nao rai klă kơplah wah hơdôm anih anom…Ơi Võ Thành Công, Khua anom bruă boh thâo ia rơgơi tơring čar Lâm Đông brơi thâo:

“Gơnong bruă glăk pok pơhai anih djă pioh hră pơ-ar kơ kual lŏn mơnai yua hrŏm. Akŏ bruă anai prong biă mă bơdjơ̆ nao 11 gơnong bruă, sang bruă. Tơdơi kơ akŏ bruă anai pơgiong amra jing anih djă pioh brơi đơ đam tơring čar, amăng anun amra hơmâo hơdôm măi mok yua phara amăng hơdôm gơnong bruă, sang bruă hơmâo ba mă yua hrŏm kiăng sem lăng kơ bruă git gai wai lăng”.

Hăng tơlơi gir run amăng bruă pơplih mrô, truh ră anai 100% bruă ngă hră pơ-ar gưl tơring čar hăng să amăng tơring čar Lâm Đồng hơmâo pơhlôm bruă tŭ mă, ngă brơi, brơi glăi ha amăng plĕ, djơ̆ hrŏm amăng đơ đam tơring čar. Bruă yua boh thâo phrâo amăng ngă hră pơ-ar, boh than pơsir hĭ bruă ngă hră pơ-ar truh giăm 90%. Bruă ĕp lăng, mă yua tơlơi pơhing, hră pơ-ar mrô giăm 93%. Lâm Đồng hơmâo rơbêh 14.000 mrô kĭ hơmâo mă yua. Anăp nao hơnong pơkă pơjing gong gai mrô, bơwih ƀong mrô hăng mơnuih mơnam mrô, ƀon lan glăk tŏ tui tuh pơ alin, hrưn đĭ klă măi mok, laih dong pơtô hrăm boh thâo phrâo brơi ƀing apăn bruă kiăng dưi ngă klă ƀiă dong amăng bruă djru brơi mơnuih ƀôn sang, anom bơwih ƀong sĭ mơdrô./.