Bơyan phang thun 2025-2026 phrâo laih rơgao, bruă hơduah ĕp, pơtum glăi tơlang tơhan djai pơsăn drơi jăn yua kơ lŏn ia, ƀing mơnuih djru bruă, mơnuih kơhnăk mơ̆ng Việt Nam tuh drah pơčah asar ƀơi dêh čar Kur amăng rơnuk blah ngă hlâo adih, hlăk pơčrong sai hăng khua mua gah dêh čar Kur, kĭ hră hơdor pioh pơkôl rim thun. Bruă ngă hrŏm, hyu ĕp, klơi pơsat, rŭ tơlang ƀing tơhan pơsăn drơi hơmâo ngă tong ten biă mă.

Hăng tơlơi gir run ƀu pơdơi ôh, grup K51 gah sang bruă khua tơhan Dak Lak laih anun hơmâo tơlơi đing nao, djru ba, lăi pơthâo tơlơi pơhing, pơčrâo brơi anih pơsat dor ƀing tơhan tuh drah rơnuk blah ngă, tơlơi djru ba mơ̆ng khua mua tơring čar Mondulkiri gah dêh čar Kur anun truh ră anai, hơmâo rŭ glăi 22 per tơlang tơleh tơhan djai pơsăn drơi jăn yua kơ lŏn ia Việt Nam, ba glăi pơ čar ta pô aka ƀu thâo krăn anăn sit nik ôh. Dua khul mă bruă hơmâo pơčrong sai ba yua boh thâo ia rơgơi, tŭ ư hơdră mă bruă, ngă yang iâu bơngăt atâo, jao hăng pơgiăng ba tơlang anun glăi pơ Dak Lak amăng lơ 27/5 pơ anăp, djơ̆ tui tơlơi phiăn ngă yang h’ŭ pơpŭ kơ tơhan pơsăn drơi jăn yua kơ lŏn ia gah dêh čar Kur hăng Việt Nam juăt ngă. Dua bơnah bơtŭ ư hơdôm tơlơi pơčrong sai bruă hơduah ĕp, klơi pơsat rŭ mă tơlang tơleh tơdah ƀuh dơ̆ng hrơi blan pơ anăp.