Lăng yom bruă rô nao rai dua bơnah dêh čar hơmâo laih atur hiam klă hăng lu anŏ gêh găl, Khua dêh čar rơkâo kơtưn pơčrong sai brơi grup khua mua dua bơnah čuă jơmư, bưp nao rai, biă mă ñu khua mua gưl dêh čar, kiăng ngă kơjăp tui tơlơi đăo kơnang bruă kơđi čar hăng pơtrut bruă ngă hrŏm tŭ yua sit nik amăng tơlơi bơwih ƀong huă, sĭ mơdrô, tuh pơ alin, kơtưn gir kiăng pơđĭ rơnoh prăk pơhrui glăi dua bơnah lu hloh.

Lăi pơtong, dêh čar Estonia hơmâo anŏ gêh găl kơtang boh thâo ia rơgơi, tơlơi pơmin ană mơnuih pơjing rai, pơblih pơčeh phrâo hăng ba yua mrô, Khua dêh čar ơi Lê Minh Hưng rơkâo gah dêh čar gơyut kah pơpha tơlơi thâo thăi, djru ba boh thâo ia rơgơi, djru pơđĭ tui boh tŭ yua hăng hnơ̆ng pơhno nao rai bơwih ƀong huă kơ Việt Nam thâo. Khua ding jum pơtom hiăp dêh čar Estonia, Margus Tsahkna lăi pơtong, dêh čar Estonia lăng yom tơlơi ngă giăng mah rô nao rai hăng Việt Nam, lăng kơ Việt Nam jing bơnah ngă hrŏm yom ƀơi kual Dơnung ngŏ  ASIA, laih dơ̆ng kiăng pok pơhư prong bruă ngă hrŏm, biă mă ñu pơtô hrăm mơnuih mă bruă thâo rơgơi, tŭ yua hloh gah bruă ia rơgơi tơlơi pơhing măi mok phrâo, bơwih ƀong huă ba yua mrô hăng pơčeh ia rơgơi tơlơi pơmin ană mơnuih pơjing.