Kiăng ƀư̆ pơkra glăi bruă ngă anai, Jơnum min mơnuih ƀôn sang tơring čar Dak Lak jơnum jŭ yap glăi hnơ̆ng ngă bruă hăng pơsir tơlơi tơnap tap yua hơdôm khul wai lăng kơčăo bruă tuh pơ alin man pơdong ring bruă pioh kơ mơnuih ƀôn sang hăng bruă tuh tia pơkra ming ƀơi tơring čar pô tuh pơ alin. Khul ngă bruă anai, hơmâo jao brơi lu kơčăo bruă samơ̆ kiah mă yua prăk tuh pơ alin 10% akŏ bruă.

Thun 2026 Khul anai jao ngă 33 kơčăo bruă, hăng rơnoh prăk abih tih lĕ 917 klai. Khă hnun, hnơ̆ng ngă bruă pok pơhai hăng mă yua prăk dŏ kaih. Lu kơčăo bruă čuk pơkra jơlan, man pơdong sang bruă ƀơi anih tuai čuă ngui dơnao Lak, jơlan N6, jơlan Nguyễn Đình Chiểu pơtruh nao rai ataih hloh, jơlan nao rai amăng anih tuh tia pơkra ming sa ƀut Hòa Phú…bưp lu tơlơi tơnap amăng bruă duh glăi lŏn, aka ƀu tŭ ư hrŏm hăng mơnuih ƀôn sang. Lu kơčăo bruă dŏ gun yua ming pơkra glăi bruă tuh pơ alin, kơƀah prăk ƀudah aka ƀu hơmâo prăk tuh pơ alin. Ƀơi mông jơnum, lu tơlơi pơgôp hiăp lăi nao brơi kah pơpha kơčăo bruă hăng pơsir tañ tơlơi dŏ gun, pơ ala kơ bruă tuh pơ alin sui amăng ƀiă. Hăng kơčăo bruă kaih tuh pơ alin, ơi Đỗ Hữu Huy, Khua Jơnum min mơnuih ƀôn sang tơring čar Dak Lak pơtrun hiăp, brơi hruă kơjăp hnơ̆ng mă bruă hăng ngă tơpă tuh pơ alin kơ bruă čar. Tơdah kiăng, khom kah pơpha rơnoh prăk kiăng pơhlom rơnoh prăk mă yua.