Tong krah ia rơsĭ tơbung jum dar, bul pơtâo plao ia rơsĭ Phú Quý, tơring čar Lâm Đồng lăng kah hăng asar pơtâo priă bơngač mơ̆ng lŏn adai pơjing rai. Ataih mơ̆ng anih hơdip ik ăk jua pơhiăp lu mơnuih, hăt he, bơngơ̆t bơngañ amăng plơi prong jưh jom Hà Nội, amai Ngô Thị Hồng Ánh hơduah nao ĕp lăng hăng anih pơ-iă pơ-iong, angin rơbŭ laih anun tơlơi hơdip tơpă hiam mơ̆ng mơnuih ƀôn san dŏ ƀơi bul pơtâo plao ia rơsĭ Phú Quý.

Anai ƀu djơ̆ lăi tal blung a ôh ñu juă tơkai rai pơ anun, trun ƀơi plao ia rơsĭ hiam rô̆ anai, samơ̆ tơlơi khăp mơ̆ng lŏn mơnai glai klô, tơlơi thâo rơnôm mơ̆ng ană plơi kual lŏn gong gai phara Phú Quý ăt ngă kơ pran jua ñu kiăng glăi bưp đôč gơyut mơ̆ng hlâo, gơyâo mơ̆ng hơđăp. Hơdôm hrơi dŏ glăi, găn rơgao tong krah plao ia rơsĭ jơngeh mơtah ƀlĭk, amai Ánh ƀuh ñu pô dŏ amăng anih hơdip hiam klă, bă hăng tơlơi hiam tơpă hnơ̆ng.

“Kâo ƀuh rai ngui pơ Phú Quý găn rơgao lu tơlơi mơak biă mă. Mơnuih ƀôn sang pơ anai đing nao pơgang ayuh hyiăng ngă rơgoh djah djâo, djop pô pơhiăp tom mơak rơhmač soh hăng ƀing tuai rơnguai. Rơnoh gơnam sĭ mơdrô blơi yua ƀơi Phú Quý lăp mơ̆n huăi pơđĭ nua ôh. Hơdôm bruă ngă dŏ glăi pơ anai hlâo kơ anai, truh tal anai kâo rai pioh glăi amăng pran jua mơak soh”.

Tơdơi kơ pơmut glăi glăi jing tơring čar Lâm Đồng phrâo hăng anih tuai hyu ngui prong hloh truh pơ Dak Nông hăng Bình Thuận hơđăp, pok jơlan pơđĭ kyar prong hloh. Ră anai, tuai dưi hyu ngui truh pơ klâo akiăng prong kah hăng: Đà Lạt -dang bơnga kah hăng kual Mi kô̆ amăng kual lŏn adai pơ-iă; Muí Né-asar pơtâo priă yom mơ̆ng tuai hyu ngui kual Dơnung Ngŏ ASIA hăng Tà Đùng-kah hăng Tong wing ia rơsĭ Hạ Long ƀơi kual Dap Kơdư. Ayong Lê Văn Thức, Khua kông ty tuai čuă ngui ƀơi Đà Lạt kah pơpha, anai lĕ jơlan tuai hyu ngui djop djel, pơhưč biă mă lăng čư̆ siăng glai klô trun pơ ia rơsĭ mơtah.

“Kâo đăo sit jơlan glông nao rai pơ anăp adih amra čuk pơkra hiam klă, pơtruh mơ̆ng Đà Lạt trun nao pơ Mũi Né, mơ̆ng Đà Lạt nao pơ Gia Nghĩa ƀudah mơ̆ng Tà Đùng jing nao pơ klâo akiăng tơpă tui anun mơak biă mă”.

Hrŏm hăng Lâm Đồng, tơlơi pơhưč bruă tuai hyu ngui ăt hlăk bang hyu truh pơ lŏn mơnai glai klô Dak Lak. Tong krah tơring lu kông ngăn gru grua, anih kah hăng hrơi mông dŏ glăi amăng jua čing hơgor tơ-ua hyu djop anih čư̆ siăng kriăng pơtâo, tơlơi hiam mơak puăi tlao mơ̆ng ană mơnuih laih anun gru grua hiam phara biă mă amăng kual lŏn anai, lŏn drơ̆t mriah Bazan jing mơnong, tek djơ̆ hơtai boh pran jua ƀing tuai mơ̆ng ataih. Tal blung a juă tơkai ƀơi kual lŏn Bazan, ơi Nguyễn Văn Minh, tuai mơ̆ng ƀôn prong Đà Nẵng hling hlang biă mă hăng lu mơta gru grua hiam phara biă mă ƀơi Dak Lak:

“Gru grua hiam čing hơgor mơak biă mă hăng tơpai čeh mơñum hrŏm, ia tơpai jơman čơđŏp biă mă amăng pran jua. Anai lĕ tal blung a kâo rai ngui, hyu lăng plơi pla, ƀing ngă bruă ba tuai hyu ngui ăt mơak lăi pơthâo tong ten biă mă”.

Anŏ či đing nao amăng thun anai, jing tơring čar Gia Lai, pô pơphun Thun Tuai čuă ngui gưl dêh čar thun 2026. Ơi Phạm Anh Tuấn, Khua Jơnum min mơnuih ƀôn sang tơring čar Gia Lai brơi thâo, tơring čar hlăk gir run pơƀuh brơi rup rap, bruă ngă hiam na nao, lir hơbit tong ten plah wah gru grua hiam kual čư̆ siăng glai klô hăng tơlơi adoh suang jar kmar rơnuk phrâo. Anai lĕ anŏ pơkĕ phi, lir hơbit, ngă atur pioh kơ Gia Lai pơblih kơtang, ba bruă tuai hyu ngui jing tơlơi bơwih ƀong huă phun hăng anăp nao djă pioh anŏ kơđŏm anăn păn Dap Kơdư sô̆ ia rơsĭ amăng hră lơkak jar kmar.

“Tơring čar Gia Lai ƀuăn amra pơphun tŭ yua Thun Tuai čuă ngui gưl dêh čar thun 2026 hăng pran jua mă bruă rơgơi hloh, rơnuk rơnua, jĕ giăm, djă pioh gru grua piho kwo ƀing tuai nao ngui lêng kơ mưn amăng pran jua hiam klă tơpă hnơ̆ng, phara hloh hăng lăp hơdor pioh”.

Tơdơi pơmut anm bruă kơnuk kơna, djop tơring čar amăng kual Dap Kơdư-ter hang ia rơsĭ dơnung tong krah hơmâo anih pơđĭ kyar phara, pơtum kual glai klô-ia rơsĭ-dap kơdư hăng gru grua hiam djop djuai ania. Mơ̆ng tơlơi hơmâo sit nik anun, lu sang bruă hlăk mă tơngan gum hrŏm akŏ pơjing anăn gơnam sĭ mơdrô kơ tuai čuă ngui pơtruh nao rai djop kual, pok pơhư anih pioh kơ tuai hyu ngui, dŏ glăi, ĕp lăng. Ơi Nguyễn Minh Trí, sa čô khua anom bruă ba tuai hyu ngui tơring čar Dak Lak-Khánh Hòa brơi thâo:

“Sa arăt jơlan hơmâo lu anih či weh nao, jơlan hyu ngui anun hơmâo ia rơsĭ, hơmâo glai klô, hơmâo anih gru grua hiam, mơnong ƀong huă. Amra pơtruh nao rai Dak Lak hăng Khánh Hòa jing gơnam sĭ mơdrô djop djel. Amăng 3 hrơi, lơ̆m tuai nao pơ Khánh Hòa, či mơnơi ia rơsĭ, ia hnoh, ia ania, hơmâo glai klô, drai ia rô trun hiam biă mă”.

Kual lŏn glai klô čư̆ siăng ia rơsĭ mơtah, ƀu kơnong anŏ pơtruh nao rai gah lŏn mơnai, jơlan glông đôč ôh, dŏ jing anŏ mut tơma hrŏm kông ngăn hăng mơak pran jua. Lơ̆m mơnuih ƀôn sang thâo hluh hăng pơpŭ kơ gru ama grua amĭ, pơpŭ kơ lŏn glai, ia rơsĭ gơnam rơ̆k, boh pơtâo čur rơ̆k san hô ia rơsĭ laih anun gong gai kơnuk kơna ƀuăn djru hrŏm pơjing bruă mă hiam klă, djơ̆ lăp hloh, tơlơi anun sit mơ̆n pơhưč tuai rơnguai hyu ngui, amra jing tơlơi bơwih ƀong huă phun, hơđong kơjăp, ba anăn dêh čar Việt Nam hmư̆ hing khin hơtai laih anun hơmâo lu ia iom gru grua hiam djop djuai ania dêh čar.