VOV4.Jarai-Ăt amăng hơdră mă bruă jơnum lok 11, khua mua pơ ala tal 14, tlam lơ 31/3 gah yŭ tơlơi git gai mơ̆ng Khua phrâo pơ ala mơnuih ƀôn sang dêh čar, ơi Vương Đình Huệ, khua mua pơ ala hơmâo pơsit hĭ hră pơtrun pơdơi bruă 3 čô kơ-iăng khua git gai pơ ala mơnuih ƀôn sang dêh čar. Lu hră plĕ tŭ ư, laih anun abih bang hlong pơsit pơdơi bruă 3 čô kơ-iăng khua pơ ala mơnuih ƀôn sang dêh čar.

Khua pơ ala mơnuih ƀôn sang dêh čar pơthâo : Pơdơi bruă  kơ-iăng khua pơ ala mơnuih ƀôn sang dêh čar tal 14 hăng yă Tòng Thị Phóng, ơi Uông Chu Lưu laih anun ơi Phùng Quốc Hiển. Hră pơtrun anai ngă tui mơtam dơ̆ng mơ̆ng hrơi khua mua pơ ala tŭ ư pơsit hĭ. Tui hăng anun, Jơnum min git gai pơ ala mơnuih ƀôn sang dêh čar lăi pơthâo hră čih anăn ƀing tơbiă anăn pioh ruah ngă kơ-iăng khua git gai pơ ala mơnuih ƀôn sang dêh čar.

Hrơi anai, lăi pơthâo boh tơhnal bơkơtuai amăng grup hăng pơblang rơđah, čih pioh tơlơi pơgôp hiăp mơ̆ng ƀing pơ ala nao jơnum pioh ruah mơnuih ngă kơ-iăng khua git gai pơ ala mơnuih ƀôn sang dêh čar. Khua mua pơ ala ruah kơ-iăng khua git gai pơ ala mơnuih ƀôn sang dêh čar hăng hơdră plĕ hră hơgŏm. Giong anun, bơkơtuai ƀơi sang jơnum prong hmư̆ Hră lăi pơthâo bruă mă mơ̆ng thun 2016-2021 mơ̆ng Sang bruă jŭ yap prăk kơnuk kơna.

Nay Jek: Pơblang